التجاوزات بالنسبه للمخطوبين

[Mary Naeem]

التجاوزات بالنسبه للمخطوبين
**********************

مبدئيا انتو بتكونوا شايفين ان ده من كتر حبكم لبعض مش قادرين تبعدوا عن بعض ولا تسيطر علي نفسك وده طبعا مش حقيقه ده مبرر فقط للخطيه
...
1-
لازم تبقوا متأكدين مليون الميه انكم بالطريقه دي بتهدوا اي حب بينكم مش بتبنوه وبرضو متقدروش تقولوا عايزين نبني بيتنا علي الصخر لانكم بالفعل بدأتوا تبنوا فيه بس علي الرمل واي ريح خفيفه هتهده

2-انا عارفه ان ممكن يكون غصب عنكم محتاجين تقربوا لبعض بس متنسوش ان كل حاجه ف وقتها بتكون احلي وان لو استعجلتوا لما ييجي وقتها مش هتحسوا بيها

3-لما تيجي تتقابلوا متقعدوش ف مكان مقفول عليكم انتو بس سيبوا الباب موارب ومتقعدوش جنب بعض اوي يعني يكون في مسافه كويسه عشان مايثيرش اي شي جواكم ولما ييجي مروح بلاش تنزلي انتي توصليه خلي حد من اخواتك او هو يعني اكيد عارف السكه

4-وانتو بتتكلموا ف التليفون بلاش تعيشوا الرومانسيه اوي ويكون النور مطفي يفضل يكون شغال وتكوني قاعده علي كرسي او بتتمشي او واقفه مفهوم طبعا ليه

5-ف الوقت اللي تحسوا فيه بضعفكم او انكم ممكن تغلطوا حد يبادر ويقول للتاني قوم نصلي وبكده انتو بتأكدو لربنا انكم عايزين تعيشوا صح وتدخلوه ف حياتكم

6- مهما كانت درجه حبكم لبعض انتو متعرفوش الزمن مخبيلكم ايه وحتي لو كان فرحكم بعد يوم واحد مفيش حاجه مضمونه ممكن تحصل اي حاجه تفركش كل حاجه بيبقا ف الاكليل والجوازه بتتفركش وده حصل بالفعل فكري لو ربنا مأردش بعد الشر كده تكملوا مع بعض انت شكلك قدام نفسك هيكون ايه وقدام جوزك بعد كده او لو صادفتي الشخص ده ف يوم اكيد هتضايقي من نفسك اوي يبقا علي ايه من الاول ما امنع نفسي حتي ولو بالغصب ومفيش حاجه اسمها مش قادرين سوري يعني ده هيكون شغل عيال

7-لازم تعترفوا انتو الاتنين وابونا يساعدكم بتداريب روحيه كتيره
في ناس بالفعل بتبقا حست ان ده فعلا غلط ومش وقته وعايزين يبطلوا انا احي الطرفين بصراحه وطالما اتفقوا ان ده هيزعل ربنا منهم يبقوا هيقدروا يعدوا منها

اما بقا لو طرف موافق تحت بند الحب وانك لو معملتيش كده يبقا مش بتحبيني والطرف الاخر رافض ف دي بتكون اصعب شويه بس لازم تتفقوا من دلوقتي ولو معرفتوش طرف يقنع التاني يبقا تأكدوا انكم طالما مقدرتوش تتفقوا ف الخطوبه عمركم ماهتقدروا تتفقوا بعد الجواز واسأليه لو عرف ان اخته بتتجاوز مع خطيبها هيكون رد فعله ايه وده هيبينلك اذا كان حابب ان حبكم يكون طاهر ونقي زي ماهو عايز لاخته ولا اهم حاجه ارضاء نفسه ورغباته وبس
†_†

[Rena Jesus]

فعلا موضوع مهم جدااااااااااااااااااااااا
ميرسى ربنا يفرح قلبك
ويبارك تعب محبتك

[walaa farouk]

ميرسي على الموضوع الجميل

[Mary Naeem]

شكرا على المرور