رحلة في زمن الكورونا - اسكتش لأحد السعف - إعدادي

[walaa farouk]

المشهد الأول :
يجلس ريمون وبريني يقطع خضار وهو يشاهد تابلت بينما تجلس بريني بجواره تبكي
ريمون: أيوة.. بالظبط كده .. قطعتين من البصل المبشور مع حبة من الكزبرة المنقوعة في زيت الزيتون
بريني: إيه ده! انت بتعمل إيه ؟!
ريمون: تعالي تعالي ساعديني .. ده شيف يوناني بيعمل أكلات تحفة على اليوتيوب .. بيعمل أكلة اسمها (بابريوس)
بريني: ههه اسمها إيه؟
ريمون: بابريوس
بريني: أنا بجد مبسوطة أوي إن ديه أخرتك يا ريمون.. الحظر خلاك بقيت قاعد بتعمل بابريوس .. أنا فخورة بيك
ريمون: انتي بتتريقي .. طب على الأقل أنا قاعد عواطلي دلوقت بس عشان الكورونا .. أحسن من إللي قاعد عواطلي طول عمره مش بيعمل حاجة
بريني: لو سمحت أنا مسمحلكش .. انا دكتورة في علوم الدعايا والبروباجندا الصامتة
ريمون: ال إيه يا ماما؟
بريني: البروباجندا الصامتة
ريمون: لا الف سلامة عليكي.. أيوة يعني انتي بتفيدي البشرية بإيه
بريني: حاجات كتييير أوي .. أنا ، أنا ، أنا باعمل أبحاث
ريمون: أيوة والأبحاث ديه بتفيد البشرية في إيه؟
بريني: بتساعد الناس إللي هتعمل أبحاث بعدي
ريمون: يعني أنا دلوقت كريمون عايش في شبرا في وقت الكورونا المنيل ده إيه من شغلانتك
بريني: إيه! ما هو أمثالك مش هيعرفوا يستفيدوا من عبقريتي الفذة
ريمون: هههه يعني شغلانة ملهاش لازمة
بريني: يا سلام طب اتفضل إنت قول لي انت بتشتغل إيه
ريمون: أنا (ايفينت اورجانيزر)
بريني: ههه متعهد أفراح يعني
ريمون: متعهد أفراح!! لا واضح إنك دكتورة في الجامعة .. ده انتي بطيخة خالص .. ايفينت اورجانيزر .. يعني بنظم الحفلات والايفنتات الكبيرة
بريني: متعهد أفراح برده
ريمون: ماشي يا ستي أنا متعهد أفراح .. على الأقل متعهد الأفراح شغلانة ليها لازمة وبتجيب فلوس كتير .. يعني الناس بتحتاجني لما تتجوز .. انتي بقي الناس بيحتاجوكي إمتى
بريني: لما يحبوا يدرسوا ويفهموا البروباجندا الصامتة
ريمون: أنا رأيي إن انتي إللي تصمتي خالص .. أنا متأكد إن الشغلانة ديه مش بتجيب فلوس أصلا زي شغلانتي
بريني: يا ابني أنا باكسب فلوس كتير أوي
ريمون: انسي أكيد مش أكتر مني
تدخل ميرا
ميرا: مساء الخير.. حضراتكم إللي مقدمين في مبادرة المركز بتاعنا علشان تلاقوا شغل لأنكم اترفدتوا من شغلكم بعد أزمة الكورونا
ريمون: إيه! احم اه
بريني: إيه الإحراج ده
ميرا: لا مفيش إحراج ولا حاجة .. البلد كلها شغلها إتاثر بسبب حكاية الكورونا مش انتو بس
ريمون: ياااه نفسي بجد في ايفينت كبيير أوي وجماهير وأنظمه .. فين أيام زمان .. بس فعلا الشغل كله واقف .. وحضرتك بتشتغلي إيه؟
ميرا: أنا معايا دكتوراة في الطاقة النووية وعلاقتها بنسبية الزمن التراكمي في البعد المغناطيسي وباشتغل حاليا في مبادرة عاملها معهد سانبيترسبرج في موسكو لل(ريلاتيف تايم).
بريني: كل ده .. معلش يعني .. طبيعة شغلك بتعملي إيه بالظبط ؟
ميرا: معظم الوقت بنبقي في المعمل بنراقب حركة الجزئيات
ريمون: يعني شغلانة ملهاش لازمة .. أنا قلت من الأول البنات مكانها المطبخ محدش صدقني
ميرا: بغض النظر .. إحنا عندنا ايفينت كبير اوي وكنا محتاجين فيه ايفينت اورجانيزر ودكتورة في علوم البروباجندا .. عشان كده إختارناكم
ريمون: معلش انتو ازاي عندكم ايفينت كبير كده في وقت الكورونا ؟
ميرا: لا ما هو احنا مش هنبقي في وقت الكورونا
بريني: معلش مش فاهمة!
ميرا: أنا أفهمكم .. إحنا توصلنا لطريقة تخليكم تسافروا بالزمن لمدة يوم واحد .. إحنا هنخليكم تسافروا لايفينت مهم جدا .. ايفينت تاريخي من ألفين سنة .. ريمون هنحتاجك تفهم هم كانوا بينظموا الايفينت ده إزاي .. وتساعدهم بخبرتك .. بريني هنحتاجك تراقبي طريقة اقناع الناس ساعتها .. الايفينت هو دخول ملك لمدينة .. عايزين نفهم ليه الناس كانت مرحبة أوي وبتحب الملك ده
ريمون: وهنقبض كام في الليلة ديه
ميرا: ريمون هتاخد مليون جنيه
ريمون: إيه!
بريني: لسه برده مقتنع إن الستات مكانها المطبخ!
ميرا: وبريني 10 مليون
ريمون: نعم ! يعني اظبط الايفينت واساعد وانقل خبرات وهي تقعد بس تراقب الناس وتاخد قدي عشر مرات
ميرا: إحنا الأهم بالنسبة لينا نفهم الناس كانت بتحب الملك ده ليه .. هو ده السؤال الصعب بالنسبة لينا.. هو ده الاتفاق عاجبك .. ولا تكمل تقشير بصل عشان بابريوس
بريني:اه و يا ريت تتكلم معايا بأسلوب أحسن من كده بعد كده
ميرا: يلا متضيعوش وقت عشان لازم تبقوا هناك بعد ساعة تقريبا


المشهد الثاني :
ريمون وبريني بعد ما عادوا بالزمن
بريني: إيه ده الله .. إحنا في القرن الأول الميلادي
ريمون: إيه ده ثانية واحدة يعني مفيش كورونا!
بريني: أيوة يا ابني مفيش هنا كورونا
ريمون: إيه ده أخيرا .. لا لا مش مصدق نفسي .. أخيرا (يدعك مناخيره وعينيه وكل وشه)
بريني: إنت بتعمل إيه
ريمون: خلاص مفيش كورونا ادعك وشي براحتي .. يا وحشتني أوي الحركة ديه .. أخيرا
بريني: بس بقي خلينا بقي نركز في إللي جايين عشانه .. دلوقت الحدث إللي إحنا مفروض هنشوفه دلوقت هو دخول المسيح أورشليم ... إحنا محتاجين حد من إللي نظموا الموضوع وحد من إللي كانوا بيحبوا المسيح وشايفينه ملك عشان ناخد منهم المعلومات إللي محتاجينها
ريمون: أنا شايف في حد هناك أهو .. شكله كده من الناس إللي فاهمة
يدخل يوحنا
بريني: وعرفت إزاي ؟
ريمون: يا بنتي عيب عليكي .. الناس إللي بتفهم ديه باعرفهم من أول نظرة
بريني: طب إيه رأيك إنه هيطلع حد عادي وميعرفش حاجة عن الموضوع
ريمون: يا كابتن .. يا كابتن
بريني: كابتن إيه انت بتنادي على حد في القهوة
ريمون: ملكيش دعوة انتي .. باقولك إيه روحي إعملي الأكل مع الستات وسيبيني أشوف شغلي .. يا كابتن
يوحنا: أيوة .. انت بتناديني
ريمون: أيوة .. معلش هو انت تعرف أي حاجة عن الحدث بتاع انهارده .. قصدي دخول يسوع أورشليم
يوحنا: اه طبعا .. أنا يوحنا أقرب تلميذ ليسوع يعني أعرف كل حاجة عن الموضوع .. هو أنا تقريبا أكتر حد يعرف أنا وكام تلميذ تاني
ريمون: (يتريق علي بريني) قولي تاني كده .. سامعة أكتر واحد عارف عن الموضوع .. أنا مش عارف انتي إيه لازمتك معايا فعلا .. أنا قلت تروحي تعملي أكل .. طب معلش ممكن أسالك على كام حاجة؟
يوحنا: آه بس انتو شكلكم غريب أوي .. انتو جواسيس ولا ايه؟!
ريمون: إيه! لا يا عم جواسيس إيه !
يوحنا: أيوة جواسيس .. أو ناس عايزين يقتلوا يسوع.. انا هانده حد يقبض عليكم
ريمون: يا عم يوحنا جواسيس إيه بس
يوحنا: أومال انتو مين .. تقدر تقولي ؟!!
بريني: إيه .. إحنا من بلاد الجرمان إللي بعد روما .. إحنا من القبائل الجرمانية هناك ولبسنا غريب كده عشان الرومان بعد ما احتلونا عايزنا نتخلى عن الثقافة بتاعتنا بس إحنا لا يمكن نعمل كده .. ده جزء من ثقافة قبيلتنا العريقة
ريمون: إيه الكلام الغريب إللي انتي بتقوليه ده!!!
يوحنا: منطقي برده ، أنا فعلا سمعت عن القبائل الجرمانية وحروبها مع الرومان المحتلين .. انتي شكلك مش جاسوسة .. إنما هو أنا شاكك فيه
بريني: ها لسه شايف إني أروح أعمل أكل ومليش لازمة.. أنا هاقوله إنك جاسوس من الحامية الرومانية وأخليه يوديك على دار الولاية على طول
ريمون: بصي هو أنا مش فاهم تهديدك أصلا .. بس عامة اتفضلي اتفاهمي معاه
بريني: يوحنا معلش إحنا كنا عايزين نسألك هو انتو عملتوا إيه خليتوا الناس تحب يسوع وتهتفله
يوحنا: ولا حاجة
ريمون: افندم!
يوحنا: ولا حاجة
بريني: أومال الناس هنا بتحب يسوع ليه
يوحنا: عشان هو بيحبهم .. الموضوع بسيط جدا .. الناس مش بتحب ملك زي قيصر يحكمهم بالقوة ويبقي سياسي ذكي .. على قد ما حبيت يسوع إللي بيشفيهم وبيحبهم .. إللي عايزهم فعلا يعيشوا حياة أحسن .. عشان كده إحنا ماكناش محتاجين نقنعهم يهتفوله .. هم بيهتفوا من نفسهم لأنهم بيحبوه .. هم من نفسهم بيحبوا يسوع
ريمون: طب معلش يعني .. هو يسوع بيشتغل إيه ؟
يوحنا: ملك
بريني: أيوة ملك إيه .. هو مش بيحكم ولا بيقود جيش ولا حاجة .. هو كل إللي بيعمله إنه بيمشي في الشارع يعمل خير للناس
يوحنا: يسوع ملك بس مش بالمعني التقليدي .. ملك مش عشان يبقي حاكم مدينة .. لكن عشان يبقي ملك في حياتك .. ملك على الانسان إللي بيقبله .. ملك مش عشان هو محتاج عظمة لكن عشان يخلي الانسان إللي بيقبله يعيش سعيد .. ملك بيخليك تحبه مش تخاف منه وتكرهه .. هو ملك بس بمفهوم جديد شوية .
ريمون: أيوة يعني إيه أهمية إللي بيعمله ده؟
يوحنا: أحيانا في حاجات بتبان من بره ملهاش لازمة لكن مع الوقت بتكتشف إنها مهمة أوي .. إنت ممكن تفتكر إن الملك إللي بيقود الجيش ويحكم هو بس إللي بيعمل حاجة مهمة .. لكن الملك إللي زي يسوع إللي بيملك على حياتك ويخليك إنسان جديد .. إللي بيديك حياة أبدية بيعمل حاجة أهم من إللي بيعمله أي انسان تاني.