عجيبة هي أحكامك يا رب

[souad jaalouk]

+الأستاذ سامى ٤٠ سنه بيشتغل محاسب فى شركه خاصه .. الأستاذ سامى خادم فى خدمة المرضى من حوالى ٢٠ سنه .. وفى يوم ١٣ مايو اللى فات كان يوم إتنين ،وده كان معاد محدد لخدمته الصبح قبل شغله ، كان بيروح يخدم راجل مُسن مريض عايش لوحده ، واليوم ده الراجل جاتله غيبوبة سكر ونقله المستشفى وبسبب كدا إتأخر حوالى ٣ ساعات على شغله ... راح الشركه وبسبب تأخيره مديره كلمه بلهجه حاده وقاله .. هى مش شركة أبوك عشان تيجى براحتك .. بالرغم ان مديره ده أصغر سناً من الأستاذ سامى لكن ماحطش ده فى الإعتبار وكلمه بكل وقاحه .. لكن الأستاذ سامى قابل كلامه بكل هدوء وإتأسف على التأخير وقاله أوعدك مش هاتتكرر تانى .. عدت الأيام لغاية ما جه يوم ١٠ يونيو يوم الأتنين اللى هو اليوم بتاع خدمة الرجل المُسن ، اليوم ده حصلت حاجه غريبه .. الراجل طلب من الأستاذ سامى انه نفسه يخرج تعب من العزله ، الأستاذ سامى قاله بس انا كدا هاتأخر على شغلى ، بص له الراجل بنظره زى نظرة الأطفال وقاله .. وغلاوة ربنا عندك نفسى أخرج .. بص الأستاذ سامى فى ساعته ولقى انه فاضل ربع ساعه على شغله ، إتنهد وفكر شويه وبعدها ، إبتسامه كبيره إترسمت على وشه وقال ، وهو يعنى ربنا أغلى من الشغل ، يلا ياعم نخرج ونتفسح .. وخد الراجل على كرسى متحرك وخرجوا ، والراجل كان مبسوط جداا بكل لحظه ، على حد وصف الأستاذ سامى لما قال ضحكة الراجل كانت زى ضحكة الطفل الفرحان بلعبه جديده .. للأسف اليوم ده الأستاذ سامى إتاخر على شغله ، وبسبب كدا إتبعتله جواب فصل مؤقت من الشغل بسبب إهماله المتكرر فى مواعيد عمله .. وإتحول للتحقيق .. كانت صدمه شديده عليه ، بس هو هايعمل ايه ؟؟ ازاى يوفق مابين خدمته لربنا وشغله ..؟؟ بص للسما وقال .. يعنى ده جزاتى ؟؟ أخدمك بكل محبه وفى الأخر تسيبهم يفصلونى من الشغل .. كتر خيرك يارب .. فضل الأستاذ سامى يلف البلد كلها على شغل ومش لاقى بسبب ان كل الأماكن طالبين شباب وهو سنه كبير .. وهو ماشى فى الشارع لقى نفسه قدام كنيسته ، وقف قدامها وقال .. انا زعلان منك يارب ، مش هادخلك بيت تانى.. ومشى . إمبارح يوم السبت الشركه إتصلت به ، وحددت معاه ميعاد انه هايقابل صاحب الشركه وهايحقق معاه .. إنهرده الصبح الساعه ١٠ كان الأستاذ سامى متواجد فى الشركه عشان الميعاد المحدد .. وبالفعل دخل عشان يقابل صاحب الشركه .. ولما سأله صاحب الشركه بتتأخر ليه ، حكاله الأستاذ سامى على خدمته للراجل المُسن ، وانه عايش لوحده وولاده سايبينه ومالوش حد فى الدنيا يخدمه ويراعيه .. ولو مش مصدقنى ، الورقه دى فيها اسمه وعنوانه ممكن تروح وتسأل .. مسك صاحب الشركه الورقه وقراها وظهر على وشه علامات الحزن الشديد ، بعد كدا طبقها وبص للأستاذ سامى وقام من مكانه وراح وطبطب على كتفه وقاله .. أنت تعرف ان الراجل ده يبقى أبويا ... زمان لما تعبنا من خدمته ومرضه ، رجعناه البيت ووصينا مشرف خدمة المرضى بخدمته .. انهرده بس إتأكدت من كلامه لما قال.. أنتم سبتونى لكن اللى خلقنى مستحيل يسيبنى .. وفعلاً ربنا بعتله إنسان أمين زيك يحافظ عليه ويرعاه .. أستاذ سامى .. من أجل أمانتك ، أنا هاكافأك وهاعينك مدير القسم ، ويوم خدمتك هاعتبره يوم إستثنائى تيجى فيه براحتك .. مبروك .. كل ده والأستاذ سامى فى حاله إندهاش غريبه وبيسأل نفسه. هو فيه ايه ؟؟ طلع من الشركه وفضل ماشى وهو بيفكر فى كل اللى حصل ، لغاية ماوصل عند الكنيسه ووقف عند الباب وقال ..عجيبه هى أحكامك يارب

منقول من . طريق الألام

[walaa farouk]

مشاركه جميله
ربنا يبارك خدمتك

[Mary Naeem]

عجيبه هى أحكامك يارب
جميلة جدا
ربنا يبارك حياتك