مدرب ولا حكم

[walaa farouk]

* عارفين ايه الفرق بين المدرب والحكم؟

أى لاعيب فى اى ماتش واى لعبة بيبقى عنده مدرب وحكم الاثنين بيوجهوه انه يتجنب الخطا بس كل واحدة وله طريقته. يعنى الحكم مثلا شغلته انه يشاور على اى خطأ يعمله اللاعب لكن لو بيلعب كويس مش بيتكلم معاه هى شغلته انه يشاور على الغلط وبس. المدرب بقى بيشاور للاعيب على الصح والخطأ بس لو فى حاجة عملها خطأ بيوجهه ويشجعه انه يحاول تانى والمدرب بيبقى مهتم اكتر انه ازاى يطور اداء اللاعيب فبيفضل ماشى معاه واحدة واحدة لحد ما يوصلوا مع بعض للهدف. احنا بقى كل واحد فينا يا إما جواه حكم (بيقول الصح والخطأ بس) يا إما جواه مدرب بيمشى معاه خطوة خطوة وبيتعلموا مع بعض من التجربة والخطأ.
.
* طب ازاى اعرف ان انا جوايا مدرب مش حكم؟؟؟؟؟
.
• اولا: لاحظ

المدرب من ضمن مهامه انه يلاحظ اللى بيحصل للاعب. يعنى ايه الكلام ده؟ يعنى احنا محتاجين نلاحظ ايه اللى بيحصل لجسمنا لان جسمنا بيتكلم بصدق اكتر من عقلنا. يعنى لاحظ ضربات قلبك, التنفس, مشاعرك ايه فى كل موقف؟ عاوز تدافع ولا غضبان ولا شاعر بالتحدى ولا خايف؟ لاحظ كمان افكارك مركزة على ايه فى الموقف. هل مركزة على انك تدافع عن نفسك ولا بتحاول تفهم اللى بيحصل؟ هل هدفى انى احمى نفسى ولا بحاول افهم الأخرين؟ لاحظ كمان نبرة صوتك. هل هى عالية ولا مناسبة؟ وايه الرسالة اللى ملامحك عاوزه تنقلها؟ لاحظ كمان الاخرين وايه الرسايل اللى عاوزين ينقلوها من كلامهم؟ ايه سلوكياتهم الغير لفظية؟ نظراتهم بتقول ايه؟ ايه شكل البيئة اللى حواليهم؟

بعد ما المدرب يلاحظ بيعمل ايه؟
.
• ثانيا: يفسر

كل حاجة من اللى لاحظناها ممكن يبقى ليها اكتر من تفسير مش تفسير واحد وده اللى لما المدرب اللى جوانا يوصله بيساعدنا كتير اننا ناجل انفاعالاتنا وسلوكياتنا لحد ما نوصل لحقيقة اللى لاحظناه لان المدرب اللى جوانا لو ماعملش كده وحاول يفسر هنلاقى نفسنا بنظلم او نتهم او نلوم من غير دليل واضح وده طبعا ممكن يوقعنا فى مشاكل او بيوظ علاقاتنا او يخسرنا فرص ممكن تكون سبب فى نجاحنا. وعشان كده التفسير بعد الملاحظة حاجة مهمة جدا فى التعامل مع المواقف اليومية.
.

• ثالثا: توقف قليلاً Pause

الخطوة دى من اهم الخطوات اللى بيعملها المدرب لأنه محتاج انه يتصرف بناء على قرار حكيم وصائب. طب هو محتاج يوقف ليه؟ هو محتاج يوقف شوية علشان يحمى نفسه من اندفاع المشاعر ويستنى لحد ما تهدى وبعدها يكون قادر يشوف الصورة بدون اضافات فيوصل للقرار الصح اللى يخليه يعمل السلوك الصح او السلوك المناسب. خطوة التوقف دى هى الخطوة اللى بيبتدى يحصل فيها التحول وهى احد العناصر المهمة جدا فى تنمية مهارة الذكاء الوجدانى او العاطفى. وطبعا دى مهمة من مهمات المدرب الشاطر.
.
• رابعاً: اعد التوجيه

المدرب المحترف بعد ما بيلاحظ ويفسر ويوقف يقدر بعدها يعيد التوجيه من تانى للاتجاه المطلوب واللى فيه فايدة اللاعب (انتى/ انت) فيساعدك تحافظ على علاقاتك وعلى وقراراتك.
.
• خامساً: تأمل ما حدث

المدرب الداخلى الشاطر بيحاول دايما يفكر لاعيبته بالنجاحات اللى عملوها ويخليهم يشوفوا ده ويحسوا بيه عشان يبقى عندهم صورة حقيقية عن نفسهم بيخليهم يشوفوا تاثير اللى عملوه على اللى حواليهم وازاى حياتهم وعلاقاتهم بقت احسن؟ وكانت حياتنا هتبقى عامله ازاى لو ملاحظناش وفسرنا ووقفنا ووجهنا؟ وده بيساعد اللاعب (احنا) اننا نستمر ونكمل فى نفس الطريق.
.
• سادساً: احتفل

المدرب الداخلى الشاطر مش بينسى انه يحتفل بالانجاز وبيشوف ان ده امر ضرورى (احتفل بنفسك) الاحتفال بيثبت جوانا حقيقة اللى حصل. بيقولنا اننا حلوين واننا نقدر. وبيفتح عينينا على ان فى حياة حلوة مستنيانا ونستاهلها. احتفل بكل انتصار مهما كان صغير وافتكر ان الانتصارات الصغيرة اللى فى حياتنا هى اللى بتجهزنا للخطوات الكبيرة.
.
• سابعاً: كرر

المدرب الشاطر مش بيكتفى انه عمل حاجة حلوة وبس لكن كمان بيسعى انه يكررها كتير لحد ما تبقى جزء من شخصية اللاعب (انتى/انت) وبالممارسة اتقانه ليها بيزيد والوقت والمجهود اللى بيبذله بيبقى اقل وده بيدى مساحة للمدرب بعد كده انه يعلم اللاعب (انتى/ انت) حاجات تانية ومهارات تانية عشان كفائته تزيد ويقدر يحقق نجاحات تانية.

المدرب الداخلى هو طريقة تفكيرك هو الطريقة اللى بتتعامل بيها مع نفسك هو موقفك من قرارتك وسلوكياتك هو الكلام اللى بتقوله لنفسك وقت الضغوط والمشاكل والاخفاقات...حاول تشوف المدرب اللى جواك بيتعامل معاك ازاى وانت عاوز منه ايه وهيوصلك لفين.