اسكتش المجوسي الرابع

[Ramez5]

اسكتش المجوسي الرابع

المشهد الأول: المجوس الأربعة بيتكلموا مع بعض



المجوسي 1 : أنا اكتشفت إكتشاف عظيم إمبارح

المجوسي 2 : وأنا كمان أكتشفت إكتشاف عظيم امبارح

المجوسي 3 : إنت كمان؟؟!!! بس اكيد مش هيكون أعظم من إكتشافي

المجوسي 4 : واضح كده إنه هيكون نفس الحاجة إللي شفتها إمبارح

المجوس: (مع بعض) نجمة كبيييييرة بتلمع

المجوسي 1: أيوه ... دي كانت أكبر نجمة بتلمع شوفتها في حياتي

المجوسي 2 : طب وإنت عارف ده معناه إيه؟

المجوسي 3 : أيوه طبعا عارف ... معناه إنه فيه ملك عظيم إتولد إمبارح

المجوسي 4 : أيوه وعشان كده لازم نجهز نفسنا

المجوسي 1 : أنا عن نفسي جبت هديتي ... جبتله دهب عشان هو ملك عظيم

المجوسي 2 : وأنا جبتله لبان عشان هو كاهن عظيم

المجوسي 3 : أنا بقى جبتله مر عشان هو هيتألم كتير وهيموت عشان خاطر كل العالم

المجوسي 4 : ممممم إنتوا كلكم جبتوا هداياكم ... وأنا كمان المفروض أجبله هدية كبيرة ... أنا عايز أجبله أعظم هدية ... ممممم أوك أنا جاتلي فكرة

المجوسي 1 : إيه هيا يا ترى؟؟؟

المجوسي 4 : أنا هابيع كل حاجة عندي وهاشتري أكبر وأغلى جوهرة عشان تليق بالملك والكاهن العظيم إللي هيتألم ويموت عشان خاطر كل العالم

المجوسي 2: بس ده هياخد وقت طويل قوى

المجوسي 3 : وإحنا لازم نبدأ رحلتنا دلوقتي ونمشي ورا النجمة قبل ماتختفي

المجوسي 1 : أوك نتمنالك حظ سعيد ونتمنى إنك تلحقنا

المجوسي 4 : أوك أتمنى لكم رحلة سعيدة وأتمنى أشوفكم قريب



المشهد الثاني:



المجوسي 4 : أوووك أنا كده جاهز عشان أبدأ رحلتي عشان أقابل الملك ، هو أه أخدت وقت كبير لحد ما بعت الحاجات إللي عندي بس خلاص خلصت وبقى عندي دلوقتي التلات جواهر الكبيرة دول إللي تليق بالملك



الراوي : وفعلا بدأ المجوس 4 رحلته وشايل شنطة على كتفه حاطط فيها التلات جواهر وقرب على المدينة وفجأة شاف 2 سيدات بيجروا وبيبكوا .....



المجوسي 4 : إيه اللي بيحصل هناك ؟؟؟ ده أكيد فيه حاجة صعبة حاصلة ... إيه ده وإيه الدخان إللي طالع هناك ده ؟؟؟ والستين دول بيعيطوا ليه ؟ خليني أروح وأشوف.

المجوسي 4 : معلش لو كنت باضايقكم بس ممكن أعرف إنتوا ليه بتبكوا؟؟؟

سيدة 1 : دي مصيبة ... دول أخدوا كل حاجة

سيدة 2 : أيوه كل حاجة ... فلوسنا وحيواناتنا و كل حاجة

سيدة 1 : وحرقوا بيوتنا كمان

المجوسي 4 : مين اللي عمل كده؟

سيدة 2 : عصابة كبيرة جت من ورا الجبال وخدوا كل حاجة ... هنعمل إيه دلوقتي؟ مبقاش عندنا أي حاجة

سيدة 1:إزاي هنأكل عيالنا ... دول كده هيموتوا

المجوسي 4 : (يكلم نفسه ) اممم دول بقوا غلابة أوي ... إزاي هايعيشوا... أنا لازم أساعدهم ... بس أنا مش معايا فلوس مانا بعت كل حاجة واشتريت التلات جواهر...مممم أنا ممكن أديهم واحدة وأقدم الإتنين التانين للملك... دول فعلا محتاجين مساعدة!

خدوا دي ( ويديهم جوهرة)

سيدة 1 : دي لينا ؟؟؟؟ كل دي ؟؟

المجوسي 1 : اه دي ممكن تساعدكم أنكم تبنوا من جديد قريتكم وتجيبوا أكل ولبس لأولادكم

سيدة 2 : أنت بجد شخص طيب قوي ... إحنا متشكرين ... شكرا شكرا

سيدة 1:شكرا جداااا ربنا يباركك

سيدة 2: أرجوك تعال معانا إحنا لازم نعرف ناس القرية بتاعنا عليك

المجوسي 4 : أنا أسف أنا فعلا لازم أمشي دلوقتي عشان عندي رحلة طويلة عشان أنا عندي ميعاد من شخص مهم ومش عايز أتأخر ... أنا فعلا لازم أمشي ... باي



المشهد الثالث: شخص جريح نايم على الأرض



المجوسي 4 : أخيرا هاكمل طريقي ... إيه ده مين إللي على الأرض هناك ده ؟ ده راجل غلبان أنا لازم أروح له واشوف يمكن يكون محتاج مساعدة

الجريح: اه اااااه ساعدني ... ساعدني

المجوسي 4 : أنا هنا عشان أساعدك ... أنت سامعني؟؟

الجريح: ايوه ... من فضلك ساعدني

(المجوسي4 يدي الجريح ميه ويبدأ ينضف جروحه ويبدأ يتكلم معاه)

المجوسي 4 : كده إنت بقيت أحسن ... إحكيلي بقى إيه اللي حصل معاك؟

الجريح: أنا كنت مسافر من أورشليم رايح أريحا ... طلعوا عليا 3 أو 4 حرامية معرفش منين و وقفوا حواليا وضربوني وخدوا كل حاجة حتى حماري خدوه وسابوني بين الحياة والموت.

المجوسي 4 : طب ومفيش حد جه يساعدك؟

الجريح: أه في إتنين جم بس وقفوا وبصوا عليا من بعيد ومشيوا ... أنت كمان هتمشي؟؟ أصل شكلك مستعجل!

المجوسي 4 : لا لا أنا مش هاسيبك ... هو أنا اه فعلا مسافر عشان أزور شخص مهم بس أنا الأول هاخد بالي منك . ومتقلقش هات إيدك وياللا نمشي من هنا .

الجريح: إنت طيب قوي ... أنا مش عارف أشكرك إزاي

المجوسي 4 : فيه فندق هناك ... تعال نروحه



(ومشيوا سوا هما الاتنين لحد ماوصلوا للفندق وقابلوا صاحب الفندق)



المجوسي 4 :مساء الخير ... كنت عايز أسأل حضرتك هل فيه أوضه فاضية لصاحبي؟

صاحب الفندق: مساء النور ...أيوه طبعا فيه أوضه ... يااااه ده شكله تعبان قوى

المجوسي 4 : فعلا هو حصلتله حادثة ومحتاج يتعالج حالاً ... وهيحتاج أكل وميه ولبس وحد ياخد باله منه وكمان هيحتاج حمار عشان يرجع بيه بلده.

صاحب الفندق:بس ده هيحتاج فلوس كتيير ... أنا هبقى مبسوط لو ساعدته بس أنا معنديش اللي أساعده بيه

المجوسي 4 : أه أوك أنت أكيد هتحتاج فلوس ... أنا واخد بالي من كده ... إتفضل الجوهرة دي ودي هتغطي كل التكاليف ( ويعطيه الجوهرة)

( الجريح وصاحب الفندق ينظرا للجوهرة)

الجريح: بس ده كتير قوي ... أنا مش عارف إذا كنت هاقدر أردلك ثمنها ولا لا ... أشكرك أشكرك

المجوسي 4 : لا مش عايزك تردلي حاجة ... ( لصاحب الفندق) خللي بالك من صاحبي

صاحب الفندق : أكيد

المجوسي 4 : أنا لازم أمشي دلوقتي عشان زي ماقلتلك أنا عندي ميعاد مع شخص مهم جدا ... ياللا سلام ... (يكلم نفسه) كده يبقى متبقي جوهرة واحدة بس أتمنى إنها تعجب الملك ... أنا كده إتأخرت قوي أنا مبقتش شايف النجمة أنا أروح أورشليم وأسأل هناك عليه



المشهد الرابع: يصل أورشليم ويقابل 2 سيدة ويسألهم عن بيت لحم



المجوسي 4 : أخيرا وصلت أورشليم لما أسال بقى عن الملك اللي إتولد في بيت لحم أكيد الناس سمعت عنه

ممكن أسألك حضرتك سؤال؟

سيدة 1 : أكيد ...إتفضل

المجوسي 4 : تعرفي الطريق لبيت لحم ؟ أصلي لازم أقابل حد هناك

سيدة 2 : بيت لحم !!! بلاش تروح هناك دلوقتي بس لو عايز تروح إمشي في الطريق ده وهتلاقيها

المجوسي 4 : إنتوا ليه بتقولولي بلاش تروح دلوقتي؟ إنتوا مسمعتوش عن الملك؟؟

سيدة 1 : الملك إتولد في بيت لحم !!!

سيدة 2 : إحنا كل اللي سامعينه عن بيت لحم إن كلها عيااااط

المجوسي 4: ليه؟

سيدة 1 : هيرودس سمع عن الملك الجديد اللي إتولد هناك .. فيه 3 مجوس جوله وقالوا له إنهم جايين عشان يسجدوا له

سيدة 2 : وهو متضايق جدا عشان هما مارجعوش تاني عشان يقولوا له على الملك الجديد

سيدة 1 : عشان كده أمرالجنود بتوعه إنهم يقتلوا كل الأطفال إللي في بيت لحم إللي عندهم سنتين وأقٌل من كده ... وقتلوهم كلهم.

ومشي المجوسي 4 وهو حزين

المجوسي 4 : أنا متأخر قوي دلوقتي ...أنا مش عارف أروح فين

وفجأه لقى ولد صغير جه وبدأ يصلي

الطفل: أشكرك يا رب لأنك واخد بالك مننا يارب ساعدني عشان إحنا مش عندنا أكل ناكله في العيد ... ماما معندهاش أكل وبابا مش لاقي شغل وإخواتي جعانين ... من فضلك يارب خد بالك منهم ... أنا مش عارف أعمل إيه لكن أنا مصدق فيك ومصدق إنك هتساعدنا .

المجوسي 4 : إزيك

الطفل : إزيك

المجوسي 4 : إنت شكلك زعلان قوي ... أنا عايز أساعدك وأمسح لك دموعك

الطفل: شكراً ... بس أنا لازم أمشي دلوقتي

المجوسي 4 : طب ممكن تقبل مني دي ؟؟ ( ويديه جوهرة)

الطفل: دي ليا ؟ دي شكلها حلو أوي

المجوسي 4 : إديها لباباك ومامتك ... وأتمنى إنك تقضي عيد حلو

الطفل : ( بيجري ومبسوط) دي ليا ؟ أشكرك ... أشكرك قوي ... إنت أنقذت حياتنا ... أشكرك يا رب

المجوسي 4 : أنا كده بقيت مفلس رسمي ...مفيش جواهر مفيش بيت مفيش ملك مفيش أي حاجة أنا خسرت كل حاجة



تظهرله صورة بتلمع للطفل يسوع ولابس تاج فيه تلات جواهر وقال له ... قوم وكفايه عياط ... كل جواهرك هنا وصلوا ليا ...كل مرة إديت جوهرة لواحد من إخواتي إللي فعلا محتاجين إنت كنت بتديهالي... كل هداياك وصلتني ... حبك ورعايتك وإهتمامك وقلبك الطيب كانوا أعظم هدية أتمنى إن العالم كله يسمع بقصتك دي... روح قول لكل الناس أن دي الهدية إللي أنا عايزها في الكريسماس ... قلوبكم .

[بشرى النهيسى]

جميل جدا

الرب يباركك

[Mary Naeem]

ترنيمة جميلة
ربنا يفرح قلبك