من يوم لسنه

[Mary Naeem]

من يوم لسنه

الاخوه الاعضاء اتمني انكم تكونوا بصحه وسعاده وفي الموضوع دا انا حابب اتكلم عن ايه اللي ممكن اعمله مع الكلب من سن الفطام لحد ما يتم سن السنه لتحسن عاداته السيئه ونظام الغذاء اللي ممكن اقدمه للكلب والكماليات المستخدمة وعلي فكره الموضوع مش هيكون مفيد اوي لاصحاب الخبرات بس ممكن يساعد الناس اللي نفسها تربي كلاب بس مش عارفه وللامانه التدريبات دا منقول


يلا نبتدي


طبعا كل المربيين الجدد بيسألو ايه الكلب اللي ممكن اربيه


نقدر انشاء الله نرد علي السوال دا بحاجه بسيط هانت محتاج الكلب في ايه بالظبط وايه المكان اللي انته تسيب الكلب فيه


يعني انت عاوزه حراسه اراضي ولا منشأت ولا محتاجه جوه بيت


بصو مبدئيا كدا الكلب اللي ليه افضل شعبيه هو الجيرمن ليه لانه تاني اذكي كلب بعد الكولي طبعا وفي نفس الوقت سهل التدريب والشراسه طبعا متوفره في الكلب وممكن كمان يعيش مع اسره في بيت


اما لو منشأت او ارضي دي بتكون قصه تانيه ودي بيكون فيها كذا كلب بس التوظيف بيكون ليه عوامل زي مساحات الاراضي والمنشأت اللي هيحرسها بس نقدر نقول علي الانواع اللي ممكن نربيها في المساحات الواسعه


زي ا لروت وايلر والجيرمن شيبرد والجريت دان والدوبر مان دي طبعا بعض الانواع مش كلها المهم علشان مطولش عليكم ندخل في الموضوع


انا دلوقتي جبت كلب عمره 50 يوم وانا اخترت السن دا لان دا السن اللي بنصح الهواه الجدد لشرائه ليه لسببين اولا يكون تم سن الفطام ودي مهمه جدا لان الكلب اللي مش مفطوم بيكون ليه رعايه خاصه بتكون صعبه شويه علي المبتداء وفي نفس الوقت الراضاعه من الام في الفتره دي بتحصن الكلب من الامراض زي الانسان بالظبط والنقطه التانيه ان المربي يقدر يشكل الكلب علي مزاجه وعلشان اكونا خليت زمتي من ربنا ممكن برضوا انصح بالهواه الجدد بسن ال4 شهور دي علشان الغش التجاري لان السن دا بيكون الكلب شكله وتفاصيله بانت


العادات السيئه في الفتره دي بتكون في كام نقطه هي التبول في اماكن متفرقة او العض او الخوف من الغرباء عدم قبول الطوق والسلسله فقدان الشهية للكلب في سن مابين ال3 شهور ل 6 شهور وطبعا المشكله اللي الكل بيعاني منها اننا نسيب الاكل للكلب ونلاقي الكلب نشر الاكل في كل مكان


بس انا عاوز اقول انه الموضوع كله محتاج صبر وخلي بالكم اي واحده مننا واحنا بني ادمين ابوه وامه بيحولوا يغيروا عادات فينا ومش بيزهقوا هو عمتا اللي انا عاوز اقوله ان الموضوع كله صبر مش اكتر وانشاء الله هتلاقوا نتيجه وافتكروا ان اللي احنا بنتعامل معاه في الاخر هو حيوان ف الصبر مطلوب والرحمه كمان مطلوبه


نبتدي بأول مشكله وهي تحديد مكان الحمام للكلب


دا بسيط انشاء الله بعد تحديد الحمام للكلب والكلب يعمل الحمام في حته تانيه نعمل ايه


اول حاجه انت بتسيب الكلب يعمل سواء بول او براز في اي مكان وبتحاول تنقل البول او البراز في المكان اللي انت عاوزه وتسيب الكلب يعمل تاني في اي حته وهنا يجي دور المربي بأنه بيزعق للكلب وبنبره حاده وبيضرب الكل علي اخر ضهرة طربه خفيفه طبعا وتخلي الكلب يشم الحمام وتشيله وتوديه للمكان اللي انت محدده وسبت في الحمام بتاعه


مره علي التانيه هتلاقي الكلب اتعلم المكان الي يعمل فيه الحمام

تاني موضوع هو العض


نلاقي طبعا ناس كتير جدا بتواجهم مشكله العض ان كل ما المربي يلعب مع الجرو يلاقي الكلب يعض فيه وفي الرجل والبناطيل


واللي الناس ديما بتجهله ا ندي سعات بتكون مداعبه من الكلب لان المربي لو عندو كذا جرو هتلاقي ان اللعب بنهم بيكون عض وشد وضرب لان ملوش غير ايد وبوق بس عمتا بتكون في حاله تانيه فممكن سلوكه دا انه مش حاسس ان المربي مصدر امان لي

بالبلدي انك مش مصدر امان ليه حاول تلعب معاه كتير ولما يكررها اشخط في الاول بس براحه مش جامد سمع كلامك شجعه كررها في وقتها حاول تزعق تاني واعترض وحسسه بدا بأنك تبعده عنك تدخله بيته مثلا ومع التكرار هتلاقيه بيبطل العاده دي وخصوصا لما بيعرف ان مصدر الخير والاكل والامان بتاعه اللي هو المربي مش بيحب الحاجه دي وبيعقبه عليها كمان
ونحاول نسبله ديما حاجه يعض فيها في السن دي زي العضاضه البلاستك اللي بتتباع عند اي حد بتاع كماليات

الموضوع الثالث الخوف من الغرباء


ودي بتكون ليها عده عوامل زي ايه ان الكلب نفسه بيكون جبان شخصيته مش قويه طب نعمل ايه في السن دا


اولا ممنوع منعا باتا ان حد يلعب مع الكلب بتاعك نهائيا ولا يأكله ولاينضف مكانه دا علي الاقل لحد لما يتم السنه ليه


لان الكلب مجموعه غرائز زي الاكل والاهتمام والجواز


اول حاجتين انت طبعا ومفيش غيرك يوفرهم للكلب علشان يكون عنده انتماء لمربيه ويكون الكلب عارف انك انت اللي بتتطعمه وتهتم بيه


اما بالنسبه للعب مع الغرباء يفضل عدم لعب الكلب مع اي حد غير بعد ما يتم التسع شهور ليه لان المرحل دي بنبتدي ندرب الكلب علي الشراسه واحب اشرح ليه ممنوع اللعب مع الكلب من الغرباء نحاول نفكر بتفكير الكلب وسوري في التشبيه يعني بس نقول انا لما الاقي اللي مهتم بيا بيلاعبني والغريب بيلاعبني اما انا هقلق من مين وهجهم علي مين الا البني ادمين كلها انا بلعب معاه فمن هنا بتبتدي تتهز شخصيه الكلب والجبن بيكون سببه انه وهو صغير الناس بلاعبه اما لما بيكبر الناس بتستني انهم لما يجيوا علي الكلب انهم يلاقوا الكلب هجم عليها وهوه وعمل الشغل اللي الناس بتحب تشوفه من الكلب فبيلاقوا نتيجه عكسيه تماما فلتفادي الموضوع ده ممكن نتبع اللي اتقال في الموضوع وانشاء الله يجيب نتيجه ولكن طبعا في تدربيات نقدر ندرب الكلب عليها وانشاء الله هنتكلم عن التدريبات بستفاضه في وقت لاحق


عدم قبول الطوق والسلسله.


دا بقا امر بيمر بيه اي حد عنده كلب


ليه اولا لازم نلبس الكلب وهو صغير صوق قماش نلبسلهوله ساعه او ساعتين في اليوم علشان يتعود عليه هتلاقي في الاول هرش ويحاول يشيله المربي بقا يبداء يليه عنه باللعب ومثلا


دا الطوق اما السلسله احنا اتفقنا ان الكلب بلاش نخلي حد يعلب معاه وفي حاجه انا كمان مقولتقاش اللي هي ايه ان انا لما احاول انزل الكلب انزل في وقت متأخر علشان يشوف ناس قليله ومش هتلعب معاه وفي نفس الوقت هيتعود علي البني ادمين


نرجع لموضوعنا اول ما هتلبس الكلب الطوق والسلسله هتلاقيه افش في الارض ومش هيتحرك


ودي حلها سهل لبس الكلب السلسله والطوق وسيبه واعد اللعب معاه سواء بكوره او بأي حاجه تاني بمعني اوضح حاول تخليه يتحرك لوحده وهو لابس السلسله


وبعد كدا وهو ماقف امسك السلسله وحاول تتحرك بيه اول ما يتحرك شجعه بكلمه برافو مثلا وكافئ الكلب بأي حاجه هو بيحبها من الاكل وحاول تنزل بيه علي السلم لو رفض اربط الكلب وحط علي السلم حاجه هو بيحبها زي قطعه لحمه صغيره وعدي درجتين وحط حته تانيه وفوت 5 سلالم وحط حته اخيره وتمسك حته في اديك تاكلهاه والسلسله طبعا طويله سيب الكلب في مكانه وانزل انت وانت ماسك السلسله وخد حته اللحمه بأديك ووريهاليه وقوله خد ا ويلا تعالي بدون نفكير الكلب هيطير علي الاكل اول ما ينزل تشجعه ببرافو وكمل باقي السلالم وهتلاقي الكلب اول ما انت تفتح باب الشقه هتلاقي الكلب بيسبقئك علي الشارع ومره علي مره الموضوع هيتحل معاك انشاء الله


فقدان الشهية للكلب في سن مابين ال3 شهور ل 6 شهور

ده بيكون ناتج عن ان الكلب بيغير الاسنان الخاصه بيه زي الانسان بالظبط اللي من الاعضاء هنا اب هيكون فاهم قصدي بمعني ان لو عنده طفل بيسنن هيلاقي منه مزاج سئ و فقدان شهيه


في الكلاب الموضوع محتاج مسايسه يعني اكل الكلب بأيدك وبكدا هتلاقي المشكله اتحلت


الوجبات للكلب


بتكون مكنوه من مرحلتين


المرحله الاوله لحد من سن 45 يوم ل 6شهور


والمرحله الثانيه بتكون من سن 6 شهور لاخر عمر الكلب


المرحله الاوله بتكون مكونه من 3 وجبات يوميه وللعلم حاول انك متسبش الاكل اكتر من 20 دقيقه ادام الكلب دا علشان تعوده انه او ما الاكل ينزل ادامه يكله وميعدش مدلع ولو مكلش الوجبه شلها وتزله الاكل علي معاد الوجبه التانيه

الوجبات بتكون كالتالي

الافطار والعشا بيكونوا واحد

وطبعا هنسأل نفطر الكلب ايه اولا في المرحله الاوله بتكون معتمده علي اللبن خفيف الدسم دا علشان نأسس الكلب في الكالسيوم في الجسم وطبعا مش بنكتفي باللبن بندي الكلب دي كال دوا بشري او كالسيكال تكمله للكالسيوم
او فول او جبنه قريش او عيش بالبن او سريالاك كل واحد وعلي حسب قدرته الماديه وزي ما قول انت ودماغك في تأكيل الكلب والفطار زيه زي العشا
اما الغدا فدا حكايته حكايه ليه في كذا جاده
لكن اساسي في التوفير ونفخ الكلب وتنظيم عمليه الهضم ليه نحط العيش اللي برده في الاكل وناس كتير هتقلي اصل الكلب مش هياكله عنده حق طبعا بس احنا نعمل ايه ساعتها نقطع العيش حتت صغيره ونحطها في الشوربه ونسبها لما تدوب وبعد كدا اهرسها واحطها مع الاكل وبكدا الكلب مش هيقدر يفصلها عن اللحمه
ونشوف ايه اللي ممكن اقدمه للكلب عندي في البيت بما اني جيبه من وهو جرو المفروض اني امشيه علي دماغي انا عن نفسي كنت معود كلبي ياكل الخضار يعني الباميه الملوخيه البطاطس الفاصوليا وكل ده بشيله من الدمعه واهرسه مع العيش او الرز كويس واحط عليهم شويه شوربه + صنف اللحوم
اللحوم اللي ممكن ااكلها للكلب عندي و مجرحش نفسي بسعرها
الكبده المستورده ودي بلاش نقدمها كتير يعني واجبه واحده في اليوم بحد اقصي مرتين في الاسبوع وكيلو الكبده بيعمله 15 جنيه بعمله علي 4 مرات يعني بيعد معايا 4 ايام
وممكن هياكل والهايكل الكيلو ب5 جنيه وبعمله للجرو في وجبتين او 3 بالكتير
السوسيس مستورد دا كان الكيلو ب 15 جنيه ودا كنت بقطعه حتت صغير وبحط معاه رز او المكرونه واخلطهم ببعض واقدمها
في الكلاوي المستورد او القلوب كل الحاجات دي واحد بس الاعتماد هنا بيكون علي التكلفه
كدا احنا تكون قولنا كل الاكل اللي الكلاب الي ممكن تكله لحد سن الست شهور
اما من 12 شهر فيما فوق بيكون وجبتين في اليوم وزن الوجبه من 500 ل 700 جرام وبتتلخص في وجبه الغدا اللي انت عودت كلبك عليها في سن الفطام للست شهور
في بقا حاجات انا بسميها رفاهيه اللي الكلب من غيرها هيعيش مش هيموت ولو خدها هتفرق معاه جسمانيا
زي كورسات الحقن
المكملات غذائية زي الدراي فود مثلا ودا خصيصا انا بحب اني احرم منه الكلب ليه لاني بستخدموا في المكفأت في التدريب يعني كل لما يعمل حاجه عجباني اديله واحده وبعد التمرين اديله شويه صغيريين يأزأز فيهم علشان يفهم ان الحاجه اللي بيحبها هيخدا لما ينجح في اللي انا بكون عاوزه منه
محسنات عضلات ودي بودر بتكون للبت بول ومش موجوده في مصر بتتجاب من برا زي روسيا مثلا
الكماليات الخاصه بالكلاب
طوق-سلسله – فرشاه لو الكلب لونج هير – مقص اظافر لو انت مش سايب الكلب في مكان واسع لانه لو في مكان واسع الاظافر هتتبري لوحدها من الجري في المكان
وبكدا اكون انتهيت من المعلومات اللي ممكن اقدمها لاي واحد مقبل علي تربيه الكلاب ودي هتكون معاه من سنه يوم لسنه
وبعد السنه انشاء الله هضيف موضوع جديد لوحد بيكون مختص بالتدريب
واتمني اني اكون قدرت اوصل المعلومات للناس زي متعمل معايا هنا من المشرفين السابقين اللي بشكرهم فعلا

[بيدو توما]

مرسي على المعلومات الجديدة
سنحاول أن نطبق بعض منها وشكراً
الرب يباركك ويفرح قلبك دائماً..آمين

[Mary Naeem]

شكرا على المرور

[بنت معلم الاجيال]

شكرا ربنا يعوض تعب محبتك