مفيش حاجة اسمها عقاب في عالم الطفل

[Rena Jesus]

مفيش حاجة اسمها عقاب في عالم الطفل، في حاجة اسمها (تقويم الطفل)، مخ الطفل مبيفهمش يعني ايه عقاب!
يعني ايه الكلام ده؟

يعني اللي بتعمله وانت بتعاقب الطفل بالضرب او بالصريخ في وشه انك بتعمل ارتباط شرطي بين (فعل معين) و(ألم بيحدث ليه) سواء ألم نفسي أو جسدي..
يعني لو كسرت دي هتضرب..
هو هنا فقد مفهوم انه المفروض ميكسرش دي، ليه دي المفروض متتكسرش؟ هي دي مهمة؟
يعني ايه ممكن اقرب من دي ومش ممكن اقرب من دي وايه اللى ف كسرها يا ترى غلط ..

انت لغيت بالنسباله كل الأسئلة دي، وبقى كل تركيزه الهروب من الألم الجسدي اللى انت مهدده بيه.. انه ميتضربش!
مبقاش محل تفكير الطفل في الفعل وتدويره وقياسه في مخه وعمل حساباته العقليه حوالين الفعل نفسه وهل هو لائق ام غير لائق،
بقى محل تفكيره الهروب من الألم النفسي ال انت ربطهوله بالفعل لو عمله.. بقى تفكيره في الهروب من العقاب

الطفل ذكي جدا .. الذكي ده بقى دلوقتي –بسبب اسلوب عقابلك ليه- بقى بيستخدم كل ذكاءه عشان يعمل اللى هو عايزه، بدون ما يتعاقب
انت دلوقتي بتربي طفل كداب .. طفل هيحاول يعمل كل حاجة عشان يخدعك .. طفل ملوش كلمة، طفل بيخدع وبيكذب، ربيت مجرم صغير

طيب لو ابني او بنتي عملوا حاجة غلط، الصح اتصرف ازاي؟
اول مرة الطفل بيرتكب الخطأ بتتفاعل معاه بهدوء تام ..
بتاخده على جنب، تفهمه اننا هنتكلم دلوقتي عشان في حاجة غلط حصلت. بتشحذ حواسه إن في حاجة كبيرة حصلت وانكم محتاجين تتكلموا فيها.
بتاخده بكل هدوء تفهمه، وتكرر كلامك مرة واتنين، هو عمل ايه،
تفهمه الأداة اللى بوظها دي وظيفتها إيه وكده معادتش عندنا ايه كان بيتعمل وبقى مش هيتعمل لانه بوظها،
مش تتكلم معاه انه عمل غلط، تتكلم معاه الغلط اللى عمله ده، بيضرنا ازاي، عشان يعرف ان الامر حقيقي، مش مجرد سلطوية منك ف يعمل ايه وميعملش ايه

لو الطفل كرر الفعل مرة تانية بتقوله احنا مش اتفقنا اننا مش هنعمل ده تاني؟
بهدوء بتحاول تفهم منه حاجته في تكرار الفعل ده تاني، ليه هو احتاج يكرره؟
ليه عمل كده تاني؟ في حاجة هو عايزها عشان كده كرر الفعل ده تاني وخلف كلمته معاك
(عايز يلعب مثلا فبيلعب بحاجتك لانه فقد اهتمامه بلعبه السابقه \ بتجبله لعبه جديدة)

ليه رميت الطبق؟ انت عايز تعمل ايه وانت بترمي الطبق؟ حاول ف المرة التانية تعوض النقص ال عشانه كرر فعلته،
وفهمه انك سامحته المره دي، وخد منه (وعد) بـ(اتفاق) صريح.. انه مش هيكرر الفعل ده تاني.
"خليه ينطق الجملة نطق كامل انه مش هيعمل كذا كذا تاني"
خليه يقولك (انا بوعدك يا ماما اني مش هعمل كذا كذا كذا) لازم الطفل يحس بكلماته ويدرك مسئولية كلامه
وهتفهمه انك المره دي اخدت كلمة منه، وانك مسامحة المره دي وانك مش هتعاقبه في مقابل انه وعدك انه مش هيعمل كده تاني

انت كده بتربي شخص مسئول،
لو كرر الفعل لمرة تالته؟
هنا انت مصدوم لانك اخدت منه كلمه، صوتك هبيبقي أكثر حدّية .. ،
هتفهمه انك مخاصمه تماما عشان هو وعدك ومنفذش..
(هنا انت سايب الفعل نفسه وبتتكلم معاه ف الاتفاق اللى حصل بينكم)
هتقوله انا اتفقت معاك وانت منفذتش، انت مطلعتش قد كلمتك ولا وعدك..
انا زعلان منك ومخاصمك ومصدوم فيك عشان انت كدبت عليا
وانا مخاصمك ومش هتكلم معاك ولا هلعب معاك

دلوقتي احنا بنقوم إنسان بنعلمه يلتزم بكلمته ووعوده
التقويم هنا عشان ملتزمش بكلمته، مش عشان الفعل نفسه، لان الفعل وقتي زائل، بيتغير، الدنيا متهدتش يعني لما مطلعش من حمام السباحة اما قلتله اطلع، بس الدنيا اتهدت لما ملتزمش بكلمته، لان كده شخصيته المستقبلية في كامل حياته مُهددة بانه يكون شخص ملوش كلمة وغير مسئول.

الفعل اللى عمله زائل ، الالتزام بالكلمة أبدي..
عشان كده احنا بنكلمه انه ملتزمش بوعده لينا
انت كده بتصنع شخص ذو مسئولية.

- "انا زعلان منك ومخاصمك".. أو "مش هلعب معاك النهارده"،
ده المفروض يكون هو أقوى عقاب ممكن يقع على الطفل، انت كده خلاص زعلان منه ومش بتكلمه!
المفروض هو دلوقتي مبهدل الدنيا عشان انت تصالحه..

العقاب: "أنا مخاصمك".. وهو مُستجيب ومحتج وحاسس ان كل حاجة ف الدنيا اتاخدت منه بمجرد انك مخاصمه

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمرورك الغالى

[walaa farouk]

ميرسي على مشاركتك الجميلة

[Rena Jesus]

ميرسى لمرورك الغالى

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[Rena Jesus]

ميرسى لمرورك الغالى