|
 |
 |
 |
|
رقم المشاركة : ( 1 )
23 - 08 - 2020, 12:04 PM
|
|||||||||||
|
|||||||||||
 في الحقيقة احيانا كثيرة الواحد يبقي واقف قدام ربنا مخزى و يقوله بتحب فيا ايه.. بعد كل السنين دى و لسه مجرد واحد بيحاول يتوب بميوعة.. يوم اه و عشرة لا.. لخبطة السنين.. شهوات و زنا و حب مال و أنانية و غضب و كبرياء و إدانة و تعلق بالعالم في مفرداته و تقصير في خدمة و بيت و انسانيات و مشاعر.. قلب حجرى.. سطحية عبادة و مجد ذاتى و غيره و غيره و حاجة تسد النفس .. ليه باقي عليا يعنى..؟ الرد في اشعيا.. لَوْلاَ أَنَّ رَبَّ الْجُنُودِ أَبْقَى لَنَا بَقِيَّةً صَغِيرَةً، لَصِرْنَا مِثْلَ سَدُومَ وَشَابَهْنَا عَمُورَةَ. فيه حاجة باقية فيك لسه حلوة.. لولاها يبقي مصيرنا الهلاك زى سدوم و عمورة... يعنى انا سدوم و عمورة الا حتة.. اهى البقية اللى في حياتى دى لسه مخلياه مش راضي يسلمنى .. دور على البقية دى و امسك فيها بايدك و سنانك.. فيك العبر زيي بس ما بتكذبش.. خليك ماسك في البقية.. معطاء و حنين ع الفقرا.. امسك في دى.. بتخدم بقلب.. بتراعى بيتك بصدق.. بتسبح ب ترنيمة.. بتقرا مزمور.. ليك شفيع مصدق شفاعته.. أمين في عشورك.. حنين على الحيوانات و مساند للضعيف .. بتخفف وجع الآخرين و تحس بيهم. . امسك في اى بقية باقية عندك هى دى اللى ممكن تكون سبب نجاتى و نجاتك.. لو فضلت ماسك فيها و بتزودها حييجى يوم تمسك فيها بايدك الاتنين و ترمى اللى متقل روحك و تتشعلق في جذع النجاة... ربنا ده حنين اوى.. بتاع البواقي.. فيه اللى لما يتبقي لقمتين في طبق يقول ماترمهوش.. سيبه حرام... اهو ربنا يشوفنى مشوه بكل خطية و فيا اللى يستاهل الحرق بس وسط ده يمكن عندى لقمة باقية في حياتى. . يقول لملايكته سيبه ما ترمهوش.. حرام 
|
 |
|
| قد تكون مهتم بالمواضيع التالية ايضاً |
| الموضوع |
| البقية المقدسة لله |
| البقية المقدسة |
| حنة التقية العاقر |
| المرأة التقية |
| البقية الأمينة |
العرض العادي
