عادات فكرية مدمرة

[روشا الفرفوشه]

دى بعض نمازج لطريقة التفكير المسممة اللى لازم تتخلص منها (لو اكتشفت انك بتستخدمها)

قراية الافكار
ساعت الواحد يبقى فاكر انه مكشوف عنه الحجاب او متوهم انه عندو قدرات خارقة فى التحليل فبيفترض اللى الناس بيفكروا فيه وبيحسوا بيه ويصنع قصص وروايات خيالية ويتعايش معاها فى خياله على اعتبار انها حقيقة
مثال : فلان ده مش بيحبنى ..ليه ؟انا حاسس ده واحساسى ميخيبش
فلانة مستتقلة دمى ومش طيقانى ... هى كدة !!!

التعميم والمبالغة
ودده صاحب مبدأ : يا ابيض يا اسود
لو فشل فى حاجة معينة اذن هو فاشل فى كل حاجة
اى حدث سلبى بيعممه
مثال : بنت اتخانت من شريك حياتها
الرجالة كلهم خاينين
وهلم جر : البنات كلهم تافهين
الولاد مش مخلصين
مافيش حب حقيقى
التعميم ده مستفز جدا وعلامة مميزة على قلة النضج
و المبالغة اخته
زى اللى لو حصلته مشكلة يبالغ فى وصف مشاكله ويعتبر حياته كلها مشاكل ويهمل اى حاجة حلوة فيه

الة الزمن
وده اللى بيبقى اسير كلمة "لو"
بيبقى عايز يركب الة الزمن ويرجع يغير مستقبله
ياه لو انا احلى شوية
ياه لو كنت اتولدت غنى
يا لو ارجع ساعتها وارفض زوجى الحالى
وده نوع من التفكير مش عايز يتحمل المسئولية ولا عايز يحط حلول تخليه يتقدم فى الحاضر ...ده اسير الاحباط واليأس لانه هيفوق من احلامه على الواقع اللى مش بيرحم نوعه

التصنيف
انا مجرد "بنت وحشة"
انا مجرد "شخص فاشل"
انا "عديم الموهبة"
واحيانا "انا مافيش زيى"
ده خلاص صنف نفسه وصدق تصنيفه !
فى الحالة دى الشخص بيصدق رسايل الشيطان ابو كل كداب اللى بيتكلم بضمير المتكلم وبيوصلك اد ايه انت شخص حقير علشان يقلل من قيمتك ويصيبك بالاحباط والغضب واليأس وينسيك انك ابن الملك وينسيك انك مش محتاج نجاح او اعمال معينة علشان ربنا يحبك
او العكس ينفخ يك ويخليك تنسى اعتمادك على ربنا

اللوم
وده بيرمى كل مشاكله على شماعات
انا فاشل فى الدراسة : اصل هما بيزعجونى ومش مخلينى اذاكر
انا مليش اصحاب : اصل محدش ليه امان
انا لسة متجوزتش : ربنا عايز كدة !!
انا بتعصب : اصل هما بينرفزونى
انا سقطت : علشان انا مسيحى وهما مضطهدنى
ده نوع بعيد كل البعد عن تحمل المسئولية ومش عايز يعترف انه عليه جزء من المشكلة

رثاء الذات
وده اول لما تحصل مشكلة يلعب دور الضحية ويفضل يرثى ذاته
انا قدمت حب ولقيت كره
انا كنت بعمل اللى محدش يعمله واترفضت
اه يا نفسى المسكينة
ورثاء الذات كتير بيكون مغرى جدا وخاصة مع الشعور بالوحدة ...لكن الاستسلام له مش هيولد غير الغرق فى حالة من اليأس والجمود