7 علامات على الشعور بالنقص وكيفية مواجهته؟

[walaa farouk]

ما هي جذور الشعور بالنقص؟، علاماته وإزاي تتعاملي معاه، وتقللي من تأثيره عليكِ، وإزاي تعرفي إن ثقتك بنفسك محتاجة زقة؟
السعي الحثيث نحو التفوق: بمعنى إحساسك إنك لازم تكوني الأفضل على الإطلاق في كل حاجة، يبقى عندك نَهم للإنجاز، مبتعرفيش تستريحي لإنك مش بتحسي بقيمتك وأهميتك غير لما تبقي بتعملي حاجة، أو لإنك بتبقي عاوزة تنشغلي عن أفكارك السلبية، فتطحني نفسك في حاجات كتير جدًا لعل وعسى تحسي إنك كويسة.
التعالي وتحقير الآخرين: الشخص اللي حاسس بالدونية، بيحاول يغطي على الإحساس المؤلم ده، بإنه يبالغ في إظهار امتيازه على الآخرين، ممكن من خلال استخدام كلمات أجنبية في كلامه، أو يتعمد إظهار إنه مش بيلبس إلا ماركات غالية، أو بيقضي أجازاته في أماكن فاخرة وهكذا، كمان الشخص ده ممكن يتعمد يقلل من الآخرين، ويتمادى في نقدهم عشان يحس إنه أحسن.
الخجل الاجتماعي والإنشغال برأي الناس فيكِ: وده يخليكِ حاسة دايماً إنك متكتفة، مش عارفة تتكلمي أو تتصرفي بحرية، لإنك دايماً بتوزني كلامك وأفعالك على ميزان رضا الناس وموافقتهم، فمثلاً تتجنبي إنك تقولي رأيك، خوفاً أنه يكون تافه أو غلط، وتراجعي كل كلمة قُلتيها وكل تصرف عملتيه، وتقعدي تلومي نفسك "كان شكلي عبيط، كنت سكت أحسن... إلخ".
التواضع الزيادة وعدم تقدير نفسك: رفض وإنكار أي ثناء من الآخرين، أو الرد عليه بنقط ضعف عندك، وعدم القدرة على الإحساس بمُميزاتك، واعتبارها شئ عادي ممكن يكون موجود عند أي حد.
صعوبات في النوم: ربما بسبب الأفكار والمشاعر السلبية، اللي بتؤثر على قدرتك على النوم والاسترخاء، وربما بسبب رغبتك المحمومة في الإنجاز اللي بتخليكِ مستخسرة في نفسك النوم.
حساسية ملحوظة: هل بتاخدي الكلام بشكل شخصي، حتى لو مكانش متوجه لك بشكل مباشر (اللي على راسه بطحة يعني)، بتزعلي بسرعة، بتتضايقي بسهولة من أي نقد حتى لو اتقال بأسلوب لطيف، الحساسية دي بتقول إن الكلام ده بيضغط عندك على مناطق إنتِ حاسة إن عندك فيها مشكلة، زي الشخص اللي عنده جرح ما في جسمه، لو اتخبط خبطة ولو صغيرة مكان الجرح هيتوجع، والحقيقة إن مش الخبطة اللي وجعته لكن هو اللي مجروح.
مقارنة النفس بالآخرين: والمقارنة دي ساعات بتبقى في صالح الناس، لإنك مش بتقدري مُميزاتك، ومش قادرة تشوفي إنجازاتك، وساعات بتبقى في صالحك عشان تعلّي نفسك عليهم فتحسي إنك أحسن.

إزاي تواجهي شعورك بالنقص؟
أولاً، أحب أقول لك إن الشعور بالنقص أحياناً بيكون صحي، وده لما يدفعك إنك تجتهدي عشان تتعلمي، وتنمي نفسك فتُقللي الإحساس بالدونية، وده بيطلق عليه في علم النفس "التعويض". ودلوقت هقول لك على بعض الطرق اللي تساعدك على مواجهة الشعور بالنقص:
1. كوني منصفة مع نفسك: ساعات بيكون فيه ظروف خارجة عن إرادتك. اعرفي مسئوليتك والحاجات اللي قصرتِ فيها، أو ممكن تعمليها المرة اللي بعدها أحسن، والحاجات اللي مالكيش يد فيها، عشان متستنزفيش طاقتك في مشاعر الذنب والندم.
2. مرري الكلام اللي بيتقال لك على فلتر العقل: مش كل نقد يتوجه لك، أو كلام يتقال لك تصدقيه وتاخديه مسلم بيه. فكري وأوزني الكلام بميزان العقل والمنطق، لإن ممكن اللي بيتكلم ده بيطلع عقده عليكِ، وممكن يكون ميعرفكيش كويس، وممكن يكون رأيه مش صح لأي سبب.
3. أحيطي نفسك بأشخاص إيجابيين يشوفوا الحلو فيكِ، وأمناء مش هيجاملوكِ، ومتفهمين ومتقبلين يسمعوكِ ويفهموكِ ويتقبلوكِ في كل أحوالك، ممكن تكون (وأمناء مش هيجاملوك، ويسمعوكِ ويفهموكِ ويتقبلوكِ في كل أحوالك،) من غير ما يلوموكِ ولا يمطروكِ بوابل ممكن تكون (بكثير) من النصايح، وقللي احتكاكك قدر الإمكان بالأشخاص السلبيين اللوامين.
4. اعرفي مميزاتك وإنجازاتك وقدريها: اكتبيهم وارجعي لهم وقت ما تحتاجي عشان تفكري نفسك، استعيني بأهل الثقة، وافتكري إن ربنا مخلقش حد من غير حاجة تميزه.
5. كوني محددة في تفكيرك: الشعور بالدونية أو المشاعر السلبية، شكل عام غالباً بيكون وراها أفكار فيها نوع من التعميم المغلوط، أو أفكار قطبية (الكل أو لا شئ، أبيض أو أسود). وعشان كده لما تحسي بالقلة اسألي نفسك: بحس إني أقل من أي نوع من الناس (الأغنياء، أصحاب الدرجات العلمية، اللي عندهم عيال… إلخ)؟ مَنْ مين (أشخاص بعينهم)؟ وليه بحس إنهم أفضل مني؟ يمكن التحديد ده يساعدك تفكري بشكل منطقي أكتر، ويقلل حدة مشاعرك بالقلة.
6. نمي ذكاءك العاطفي ووعيك بعالمك الداخلي: لما تحسي إن مزاجك اتغير اتبعي الخطوات دي:
- اكتبي الموقف اللي أثر على نفسيتك.
- اسألي نفسك: أنا حاسة بإيه (قلق، إحباط، ثقة... إلخ)؟
- وبعدين فتشي عن الأفكار اللي سببت لك المشاعر دي، أو طريقة تفسيرك للموقف (أصلهم حاطينّي في دماغهم، أنا غبية، محدش بيحبني… إلخ)
- ناقشي الأفكار دي بشكل منطقي (محدش بيحبني؟ خالص؟ ده أهلي عملوا لي مفاجأة في عيد ميلادي، وزمايلي في الشغل يتصلوا بي لما أغيب، وأصحابي بيلجئوا لي في مشكلاتهم، فيه بعض الأقارب مش بيحبوني، مفيش حد كل الناس بتحبه، إيه الدليل إن محدش بيحبني؟)

7. اثبتي نفسك في شئ بتحبيه: غالباً إحساسنا بالنقص بيكون في مساحات معينة من حياتنا وشخصياتنا، لكن بيكون فيه مساحات تانية عندنا فيها إحساس بالثقة. اشتغلي على المناطق الأخيرة دي واثبتي نفسك فيهاـ وفي الحاجات اللي بتحسي ناحيتها بشغف. ده هيديكِ ثقة بنفسك، يمكن تساعدك إنك تتقدمي في باقي المناطق في حياتك.