سكالسنيات عالخفيف
_ المية .. أو المياه ... اشربوا مية كتير يا جماعة ....
اشربوا مية حتى لو مش عطشانين ....
اشربوا مية و هتلاحظوا الفرق خلال 3 شهور بالكتير ...
فقدان وزن بشكل صحي و بشرة نضرة و الصداع هيخف أو هيختفي ...
_ الناس اللي عندها "خمول" عام و مش عارفة سببه ...
أو بتحاول تخس و بتعمل كل حاجة و مفيش نتيجة ...
نحلل و نشوف نسبة vitamin D في أجسامنا ...
لو قليل يبقى أنتة كده لقيت الإجابة .... و هتشوف الفرق لما تبدأ العلاج ....
_ لو متخانق مع حد عزيز و بتتناقش معاه بحدة و عاوز الموضوع يهدى و الطرف اللي قدامك يلين ...
أو عاوز توصله رسالة أنك لسة باقي عليه ...
حاول تناديه باسمه بحنية في وسط الكلام كذا مرة بشكل متقطع ....
ياااااااااه يا عبدالصمد ..... صدقنى هيلين .... لو باقي عليك ... هيلين ...
_ محدش يقدر يئذيك غصب عنك ..... جرب كده ...
لو رافض الوضع انسحب ... مش جاي على هواك النقاش ...
اقطع الكلام و امشي .... أنتة إنسان حر يا بيه ....
ركز في كلمة "حر" دي الله يكرمك ....
_ المشي ... قلتها كتير و هقلها تاني و تالت .... اتمشوا .... اتمشوا .... اتمشوا .....
الحركة عامة أفضل ميت ألف مرة من القعدة ....
الحركة حياة ..... الفرهدة حياة ...... السكون ملل و خنقة .....
_ اتكلموا .... اتكلموا كتير و خرجوا اللي جواكم بصوت عالي مع الناس اللي بتفهم .....
مرة و اتنين و ثلاثة في نفس الموضوع ..... أكيد هتوصل لحاجة ....
أبسطها أن الموضوع هيبطل فارق معاك و قيمته هتقل .....
المهم هتوصل لحاجة في الآخر .......
بس كفاية كده ....
