أعتراف أخواني تائب : كشف اللهو الخفى و المحرض للهجوم على الأقسام و مراكز أمن الدولة و مكاتب جهاز الم

[Mary Naeem]

أعتراف أخواني تائب : كشف اللهو الخفى و المحرض للهجوم على الأقسام و مراكز أمن الدولة و مكاتب جهاز المخابرات العامة

أعتراف أخواني تائب

بإعتبارى كنت واحد من شباب الإخوان و شاركت فى ثورة 25 يناير و كل ما حدث و عزائى الوحيد إنى مشتركتش فى التعذيب، شوفت بعينى و هم بيسحلو بعض الأشخاص من الميدان إلى داخل الشركة و ده كان بعد 28 يناير فى مقر شركة سياحية يملكها واحد من الكبار فى الجماعة، و بيضربوهم بقسوة شديدة و شتيمة بافظع الالفاظ و التركيز على الاماكن الحساسة فى الجسم افتكرت ايام التعذيب فى معتقلات امن الدولة لكن بالطبع التلميذ ممكن يتفوق على استاذه.
شفت فى اليوم ده محمد البلتاجى "عضو مجلس الشعب" الملقب فى الجماعة بالقصير المكير بس مش للأسف مش ظاهر فى الفيديو عشان كان بيجى فترات قصيره جدا يقوم فيها بتفقد الوضع و يضربلوا كام واحد و يمشى بسرعة و كان بيجيلوا مكالمات على الموبايل عشان يوجه العناصر اللى بتقتحم السجون ... ايوه اللى بتقتحم السجون و حرق اقسام الشرطة فى المحافظات و لما حد يبلغوه ان فى قسم اتحرق كان بيبقى واقف منشكح و كان حريص جدا انه يعرف نوعية السلاح اللى اخدوه من القسم و خبوه فين .
كنا دايما بنقول عليه اللهو الخفى نظرا لبراعته فى إدارة كل عمليات التنظيم السرية.... كان برده موجود فى الليلة اللى كانت قبل يوم موقعة الجمل و كان بيوشوش صفوت حجازى فى ودنه و كانو الاتنين متضيقيين جدا عشان الميدان بدأ يفضى بعد خطاب حسنى مبارك، مقدرناش نسمع بيقولوا ايه بس كان واضح انهم بيخططوا لحاجه، و بعد لما خلص كلام مع صفوت حجازى، اتصل بالتليفون بأحد اعضاء الإخوان و كان بيقولو يعمل ايه بكره، اتضح انهم بيخططوا لموقعة الجمل .... ايوه موقعة الجمل و يلبسها بتوع الحزب الوطنى، مش مهم كام واحد يموت المهم تحقيق مطامعهم.

سامحونى و لكن الناش لازم تعرف مين هو اللهو الخفى اللى ورا كل المصايب اللى بتحصل فى مصر، اللى دايما يطلع فى التليفزيون بلليل و بيتكلم كأنه الملاك الطاهر.

كان صفوت حجازى موجود أيضا اللى بيقول انه داعية إسلامية و الإسلام برىء منه و حازم فاروق عضو مجلس الشعب اللى لاحظت انه سادى جدا و كان بيستمتع بتعذيب الغلابه اللى وقعوا تحت ايده و أحمد منصور المصرى اللى باع نفسه من زمان لقطر و شغال مذيع فى قناة الجزيرة و دا طبعا همزة الوصل التمويلية بين قطر و الجماعة.
دى أول رسائلى و لدى الكثير سأقوم بنشره عشان أريح ضميرى و أكفر عن ذنوبى و أظهر الحقيقة لشعب مصر.
أعذرونى انا مسحت لقطات لبعض أصدقائى من الإخوان اللى إنساقوا مثلى و هم نادمين على ما فعلوه .
لو عايزين تتأكدو من الفيديو دا اسئلوا صفوت حجازى عملوا ايه و هددو مين و ادا فلوس لمين عشان الفيديو دا ميطلعش و الغلابه اللى اتعزبوا اللى عددهم اكتر من 70 شخص ميبلغوش حد او يطلعوا فى التلفزيون او يرفعو قضية.

و الله على ما أقول شهيد