|
 |
 |
 |
|
رقم المشاركة : ( 1 )
اليوم, 01:24 PM
|
|||||||||||
|
|||||||||||
 اسكتش الاستاذ يونان وميشو وكوكى الشخصيات :- ( الاستاذ يونان - ميشو - كوكى - يونان النبى - القبطان - الركاب والبحارة ) - بداية القصة الهدف من الاسكتش هو ان يعرف المخدوم قصة يونان النبى وقصة اهل نينوى - قصة التوبة التى حدثت وكيف ان ربنا يكره الخطية ولكن يحب الخطاة - ان نسمع كلام ربنا من خلال بابا ماما والكنيسة والخدام وان نحترم الكنيسة وبيت ربنا - ان يعرف الطفل والمخدوم هدف الصوم فى الكنيسة وهو التوبة عن الخطايا بداية الاسكتش مناسب لمراحل ابتدائى كوكى : يا ميشو يا ميشو فينك النهاردة ما تصحى كفاية نوم ميشو : مالك بس يا كوكى عايز انام شويه كوكى : لا كفاية اصحى بقى عايزين نروح نشوف الاستاذ يونان هيحكى لينا قصة جديدة نهاردة من الكتاب المقدس ونسافر معاه بعيد خالص يلا اصحى بقى ميشو : لازم النهاردة يعنى مينفعش بكرة كوكى : ايوه لازم نروح النهاردة عشان منتاخرش عليه يلل بقى قوم اصحى ميشو : ادينى صحيت بقى يلا هلبس ونروح كوكى ماشى هستناك يلا بسرعه يخرج كوكى وميشو ويذهبون الى منزل عم يونان كوكى ميشو : يا استاذ يونان يا استاذ يونان الاستاذ يونان: ايوه يا اصحابى انا اهو مستنيكم من بدرى تعالوا ادخلوا يلا تعالوا ميشو: احنا جايين عايزين نشوف قصة النهاردة ياعمو يونان وعايزين نعرف حجات كتير الاستاذ يونان : حاضر يا حبايبى هات الكتاب المقدس اللى هناك يا كوكى كوكى : ايوه اهو اتفضل يا الاستاذ يونان الاستاذ يونان: عارفين يا اولادى احنا هنصوم الايام الجايه صوم ايه ؟ كوكى : ايوه يا عمو صوم اهل نينوى الاستاذ يونان : برافو وعارفين ليه بنصومه طيب ؟ ميشو : ياريت نعرف يا الاستاذ يونان الاستاذ يونان: النهارده هنروح مع الكتاب المقدس ونسمع قصة حلوه خالص لنبى عظيم اسمه يونان كوكى : الله يا استاذ ده اسمه زى اسمك ياريت تحكيلنا قصته بسرعه الاستاذ يونان : يلا طيب هخليكم تروحوا هناك مع الكتاب المقدس وتشوفوا يونان النبى يلا نرشم الصليب ونغمض عنينا ميشو وكوكى : باسم الاب والابن والروح القدس اله واحد امين يخرج كوكى وميشو يجد شخص واقف قدامهم كوكى : شايف يا ميشو مين هناك ده ميشو : ايوه ده شكله واحد خايف وشايل هدومه ومسافر تعال نشوفه ماله ميشو وكوكى : يا عمو يا عمو يونان النبى : اهلا يا اولادى انتوا مين ميشو : انا اسمى ميشو واختى اسمها كوكى يونان النبى: اهلا بيكم يا اولادى انا اسمى يونان النبى ميشو : ومالك كدا يا عمو يونان جاى بتجرى ليه بس يونان : اصل انا ههرب من البلد دى خالص ورايح اركب السفينة اللى هناك دى هسافر من هنا كوكى : ليه كدا يا عمو يونان النبى يونان : اصل ربنا قالى يا يونان عايزك تسافر للبلد اسمها نينوى وتقولهم متعملوش حاجه وحشه تانى ومتضربوش بعض خالص ومتعملوش شر ولا تكذبوا ولا تشتموا عشان انا مزعلش منكم كوكى : وبعدين ايه اللى حصل يونان النبى: وبعدين انا مش عايز اروح ورايح اسافر بلد بعيده تانى اسمها ترشيش يلا هسيبكم انا عشان متاخرش على الناس اللى مسافرة كوكى وميشو : ممكن نروح معاك ياعم يونان النبى يونان: تعالوا يا اولادى يلا بينا عشان مش نتاخر يذهب يونان النبى وكوكى وميشو للسفينة ويدفعوا الاجرة ويقعدوا فى السفينة يونان النبى : الدنيا مغيمة خالص نهارده والهوا شديد يا اصحابى هروح انام شويه وبعدين صحونى ميشو : حاضر ياعمو يونان يذهب يونان لينام فى السفينة وتحدث عواصف شديدة وأمطار ورياح الركاب والقبطان : ياااه السفينة هتغرق هنعمل ايه لازم كل واحد يصلى لالهه عشان يمكن حد عامل حاجه غلط القبطان: اومال فين الراجل اللى كان قاعد هنا ميشو : ده نايم تحت فى السفينة القبطان : تعالوا نصحوه عشن يصلى لالهه القبطان: انت يا اللى اسمك يونان قوم اصحى اصحى اصرخ وصلى لالهك عشان السفينة هتغرق وهنموت كلنا ياترى كله ده بسبب مين اكيد فى حاجه غلط يونان النبى : اكيد السبب انا يا اولادى عشان هربت من ربنا ومش عايز اروح البلد اللى اسمها نينوى القبطان يجمع الركاب ويونان القبطان : لازم نعمل قرعه ونشوف مين سبب الموضوع ده كل واحد يكتب اسمه على عصايا صغيره ونعمل قرعه يلا هووووووب القرعه تاتى على يونان القبطان : امممممم طيب نجرب تانى هووووب القرعه تاتى على يونان القطبان : قولنا انت مين واى الحكايه يا يونان يونان النبى : اصل انا هارب من وجه الرب اللى خلق السماء والارض القبطان : يااااه ازاى حد يعمل كدا يونان النبى: انا عملت كدا القبطان : طيب هنعمل ايه دلوقت يونان النبى : لازم ترمونى فى البحرعشان الجو يبقى كويس القبطان : طيب احاول نعمل حاجه تانى نرمى الحاجات اللى عندنا والاكل والشرب الكتير يمكن السفينة تقيله القبطان يرمى الحاجات والاكل الزايد والكراتين المليانة القبطان : مفيش فايده يا يونان يونان النبى: لازم ترمونى فى البحر اسمعوا الكلام ميشو وكوكى: ازاى ياعمو يونان انت هتموت كدا مينفعش يونان: لا لازم بدل ما كل السفينة يموتوا القطبان : يلا يا جماعه تعالوا نشيل يونان ونرميه فى البحر يلا مع بعض هوووووب يرموا يونان فى البحر وبعدين البحر يهدأ كوكى وميشو : يااه شوف الجو هدأ ازاى وبقى كويس بس ياترى عمو يونان حصل ايه معاه عايش ولا ايه القطبان : يلا يا اولاد وصلنا انزلوا ينزل الناس من السفينة بعد كام يوم يخرج الاولاد مرة تانى ميشو : احنا لينا كام يوم ماشيين ياترى احنا فين كوكى :معرفش تعال كدا نشوف مين الناس الكتيره اللى هناك ده واى اللى حاصل يذهب ميشو وكوكى ويجدوا ناس واقفه وواحد فى الوسط ميشو : ايه ده انتى عارفه مين ده يا كوكى ده عمو يونان اللى كان فى السفينة ده مغرقش فى البحر تعالى نروح نكلمه ونشوفه اى اللى حصل ميشو وكوكى : عم يونان عم يونان يونان النبى: اهلا يا اولادى انتوا وصلتوا هنا كويس ميشو : احنا زعلنا عليك خالص يا عمو يونان اما رميناك فى البحر اى اللى حصل يونان النبى : بعد ما وقت فى البحر يا اولادى لقيت حوت كبير خالص راح هوووب حطى فى بؤه وقعدت ثلاث ايام فى بطن الحوت لحد ما فجأه كدا الحوت عطس عطسه كبيره رمانى على الشاطئ ميشو: ياااه شوفت ياعم يونان ربنا كان بيحفظك ازاى فى بطن الحوت وبعدين يونان النبى: وبعدين جالى ربنا تانى وقالى روح يا يونان لمدينة نينوى العظيمة وقولهم بعد 40 يوم المدينه هتتقلب وهتخرب عشان انتوا بتعملوا حاجات وحشه كتير ولازم تتبوا وتصلوا لربنا وانا اهو زى ما انتوا شايفين جامع الناس وقولهم كدا ميشو وكوكى: طيب والناس عملت ايه يونان النبى: ده الملك بتاع البلد سمع بكلامى وقام من على الكرسى وقعد يبكى وقال للناس محدش ياكل حاجه ونفضل صايمين شويه ونتوب وكمان الحيوانات متكلش بردة عشان ربنا يسامحنا ميشو : ايوه صح ربنا طيب خالص واما نصلى ونسمع الكلام بيسامحنا علطلول يونان النبى: يلا يا اولادى هسيبكم انا داوقت عشان ترجعوا بلدكم ميشو وكوكى : يلا سلام سلام يخرج الجميع ويرجع كوكى وميشو للبيت عند الاستاذ يونان الاستاذ يونان : ايه رايكم يا اصحابى فى القصة شوفتوا يونان النبى ميشو وكوكى : ايوه يا استاذ يونان الاستاذ يونان : شوفتوا بقى المفروض نسمع كلام ربنا ومنعملش حاجه غلط ولا نتخانق مع بعض وكمان نسمع كلام بابا وماما فى البيت ونصلى كمان واما نروح الكنيسة نحترم الصلام ونحترم بيت ربنا ميشو وكوكى: حاضر يا استاذ يلا هنروح البيت دلوقت وبكره نسمع قصة تانى الاستاذ يونان : يلا باى يا اصحابى باى فى نهاية الاسكتش يقوم المخدوم بتوضيح قصة يونان النبى كاملة اذ كان هناك متسع من الوقت وتوضيح اهمية الصلاة والصوم فى حياتنا وان ربنا بيفعل الخير لينا دايما مهما كانت الاسباب وربنا قادر على كل شئ ونوضح ليهم اهميةالاعتراف والتوبة والتناول واحترام الكنيسة واحترام الكبير واخيرا ان كل طفل يتعلم الصلاة فى المنزل حتى لوكانت صلاة قصيره مهما كانت حتى يعرف اهمية الصلاة من خلال قصة يونان وهو فى بطن الحوت ومهما كانت ضيقات يصلى ربنا وربنا اكيد قادر على كل شئ والى اللقاء فى اسكتش اخر والرب يبارك الجميع . 
|
 |
|
العرض العادي
