اسكتش عايز تبقى ايه لما تكبر
اهلا بيكم يا اصحابي ... النهاردة عايزين نجاوب على سؤال مهم جدا " ايه هدفك في الحياة؟" و عشان نجاوب على السؤال المهم ده محتاجين مساعدة حد تاني ... صديقنا توني ... محتاجين ننادي عليه بصوت عالي يا ت ت وووو نننن يييي
توني
(يدخل و يضع القبعتين على رأسه بحيث لا يرى طريقه)
كوتش
اهلا و سهلا بيك يا توني ... انا مش مصدق نفسي ... انت مستخبي جوه الخوذة ديه ازاي ... ايه اللي حصلك؟
توني
انا سمعت انكم عايزين تسألوني عن هدفي في الحياة فقلت انقي خوذي المخصوصة و كاباتي و اجي بيها
كوتش
انا ملاحظ انها مخصوصة جدا ... لكن يا ريت تسمح لي اشيلها شوية عشان نعرف نتكلم معاك و نشوف وشك كويس . دلوقتي بقى محتاج اعرف ايه المميزات المخصوصة في الخوذة بتاعتك ديه غير انها اكبر من الحلة...
توني
ايه المميزات ؟ انت فاكر ان الموضوع بسيط ... احنا اتناقشنا في الفصل بتاعنا عن ايه هي اهم حاجة ممكن ناخدها في الشنطة بتاعتنا اذا قررنا نقوم برحلة في الحياة ... و انا جبت الحاجات ديه عشان اخدها معايا في الشنطة
كوتش
و ايه اللي يخليك تاخد الخوذة ديه و الكاب معاك في الشنطة؟
توني
عشان احنا بنتكلم عن هدف حياتنا و انا نفسي لما اكبر اكون راجل مطافي .
كوتش
اه فهمتك ... طب و ايه علاقة ده بالكاب اللي كنت حاطه فوقيها؟
توني
ما هو انا كمان عايز اكون مدرب كورة ... اروح انقذ الناس لما تحصل حريقة و بعدين اخد عربية المطافي على الاستاد عشان احضر ماتشات الكورة مع فريقي!
الملك
انا قلقان بس لحسن ما تقدرش تاخد عربية المطافي و تروح بيها الاستاد
توني
هو في حد يقدر يمنعني ... انا اشغل السرينة فكل العربيات توسع لي و لو حد اعترض طريقي اطلع خرطوم المية و ارش عليه المية ( يحاول الملك ان يقاطعه) و لو ما سمعوش الكلام ممكن انزل السلم....
كوتش
يا توني ... انا اسف واضح انك متلخبط شوية
توني
انا متلخبط ؟! احنا بنتكلم عن هدفنا في الحياة ... ما فيش اي حاجة متلخبطة عندي ... انا عارف اني عايز اطلع راجل مطافي او مدرب كورة ... أو ممكن اكون طيار و لو يعني في امكانية اكون رائد فضاء مش هايضر ... بص غالبا انا هاكون رائد فضاء
كوتش
احنا النهاردة بنتكلم عن هدفك في الحياة و ده اكبر بكتير من الشغلانة اللي عايز تشتغلها لما تكبر
توني
يعني ده اهم من اني اكون مدرب كورة ؟
كوتش
اهم من انك تكون مدرب كورة
توني
طب مفروض يكون هدفي عامل ازاي؟
كوتش
عشان تعرف هدفك لازم تتكلم مع الشخص اللي عملك
توني
يعني لازم اتكلم مع الله.
كوتش
مظبوط ... هو اللي خلقك و هو عنده هدف من حياتك
توني
يعني انا مش مفروض احقق اهدافي الخاصة ؟
كوتش
لا طبعا ... لأنك لو نفذت اهدافك و بس مش احسن حاجة لأن ربنا خلقك عشان اهداف مخصوصة هو عملها .... محتاجين نعرفها عشان كده هانقابل مرشد سياحي خبير في عالم الرحلات و بعد كده اتكلم معاك تاني
يترك توني المسرح و يتم الانتقال لاسكتش "الرائد للرحلات و الاستكشافات"
الرائد للرحلات و الاستكشافات
اصحابي و صحباتي ... احب اقدم لكم صديقي الاستاذ رائد ... الاستاذ رائد هو صاحب شركة "الرائد للرحلات و الاستكشافات... اتفضل معانا يا استاذ رائد...
اجي فين؟ عندك هنا ... sure بكل تأكيد
يا استاذ رائد احنا عارفين ان حضرتك عندك خبرات كتيرة في دنيا الاستكشافات و الرحلات و ده يخليك اكيد تعرف كمان عن هدف رحلة حياتنا .. عشان كده عايزين نعرف منك ...
اذا كنت محتاج خبير فانت بدون شك واقف قدام خبير عظيم ... اللي هو أنا .. لكن انا ملاحظ انك كده مش باين عليك اي نوع من الخبرة و خايف لو اتكلمت تتوه مني و لو تهت يبقى انت في الحالة ديه محتاج مساعدة شركة " الرائد للرحلات و الاستكشافات" (يشير إلى نفسه)
طيب المهم .. عايز اسألك شوية اسئلة...
انا شايف انك شغلانتك في عالم الارشاد السياحي ... يعني كل شغلك سفر و رحلات ... عايز اعرف ايه سر شغلانتك؟ ازاي اكون مرشد سياحى ... ايه اللي بتستخدمه معاك عشان يساعدك في معرفة الطريق و السفر ...
شوف ... اول حاجة لازم تعرفها هي المكان اللي انت رايح عليه ... محطة وصول الرحلة...
كويس ... يا ترى ايه هي المحطة اللي انت رايح ليها ...
ده مش شغلي ... المهم انت تكون عارف انت رايح على فين و انا مهمتي اساعدك.
احنا عايزين نروح نقعد علطول مع ربنا في السما اول ما حياتنا تنتهي هنا على الارض...
ده شكله مكان حلو قوي للزيارة ... لكن انا عمري ما وديت حد هناك قبل كده ... اممممم
يا استاذ رائد انت ممكن تساعدنا لو قلت لنا سر كمان من اسرار شغلانتك الجميلة ديه.
خد بالك من السر العظيم ده بتاع خبراء الرحلات و الاستكشافات ... ( يخرج الخريطة و يفردها امامه) خبير السفر و الرحلات لازم يكون معاه خريطة تعرفه الطريق اللي يمشي فيه عشان يروح المكان اللي هو عايزه .... بس انا ماعرفش ايه نوع الخريطة اللي ممكن تودي على السما...
انا هاستخدم الكتاب المقدس
كتاب مقدس؟ انا عمري ما استخدمت كتاب مقدس في رحلاتي قبل كده.
عشان النوع ده من الرحلات احنا هانحتاج كتاب مقدس... شوف كده مكتوب ايه في الكتاب المقدس "
لانكم بالنعمة مخلّصون بالايمان وذلك ليس منكم.هو عطية الله.ليس من اعمال كي لا يفتخر احد"
ايه معنى الكلام ده بالظبط؟
"مخلصون" يعني نجينا من العقاب اللي كان مفروض ناخده على كل شئ خاطئ احنا عملناه .. لما نجينا من العقاب نقدر نعيش مع الله في السماء بعد ما تنتهي حياتنا هنا على الارض .. كمان الاية ديه بتقول ان الخلاص ده هدية .. عطية من الله ... نقدر نستلم الهدية ديه اول ما نآمن بالرب يسوع كمخلص لحياتنا..
يعني انت عايز تروح للسما و اللي مقدم لك الدعوة ديه واحد اسمه يسوع ... اللي خلصك من الخطية؟
تمام ... مظبوط ... لكن في رحلتنا هنا على الارض محتاجين نمشي في الطريق الصحيح ... و مش عارف اذا كان عندك حاجة تساعدنا اننا نعمل كده و لا لأ ... هو في اي حاجة تانية بتاخدها معاك في الرحلة غير الخريطة يا استاذ رائد؟
بكل تأكيد ... انت محظوظ جدا عشان انت معاك خبير زيّ يقولك انك محتاج بوصلة ... البوصلة هاتحدد لك اي اتجاه مفروض تمشي فيه ... بالبوصلة هاتكون الخريطة ليها معنى لأن البوصلة هاتحدد لك (مشيرا بيديه ) فين الشمال و الجنوب و الشرق و الغرب.
ممتاز ... يا ريت توريني البوصلة بتاعتك
بكل تأكديد ( يبدأ في البحث في جيوبه و لا يجد شئ) كانت موجوده هنا معايا ... في الجيب ده ... لأ ... يمكن في ده ... لأ ...
( يخرج واحده من جيبه) بالصدفة أنا معايا واحدة ... بس ممكن حد منكم (يشير إلى المتفرجين) يتفضل يجي هنا عشان نجرب البوصلة و نعرف معاه ازاي بتشتغل ( اتفق مع احد المتطوعين على المساعدة و ان يقلد شكل سهم البوصلة في اتجاهه نحو الشمال)
خلينا نفترض اني عايز اروح على البيت
انا اقدر اوصلك ...
البيت هنا في اقصى الشمال
مظبوط لازم نمشي في نفس الاتجاه اللي بتشاور عليه البوصلة.
و لو مشينا بالظبط في الاتجاه ده ...
و على حسب ما الخريطة بتقول
و على حسب الخريطة ... اكيد هانوصل البيت
مظبوط.
انا عايز اقولك البوصلة ديه بتشبه وجود هدف لحياتنا ... ربنا خلقنا عشاننحقق أهدافه، وهنكون ماشيين في الطريق الصح طول ما إحنا بنعيش حياتنا عشان نحقق الهدف اللي ربنا خلقنا عشانه
ربنا خلقنا عشان نحبه ... عملنا عشان نكون جزء من العيلة بتاعته .. لدرجة انه خلقنا على نفس شكل المسيح و عشان نعيش بقوة المسيح ... الله خلقنا عشان نساعد الناس و كمان نقولهم عن الرب يسوع
إستنى ... إستنى تقصد إيه بالأهداف دي
مثلاً: ربنا خلقنا عشان نحبه ... عملنا عشان نكون جزء من العيلة بتاعته .. لدرجة انه خلقنا على نفس شكل المسيح و عشان نعيش بقوة المسيح ... الله خلقنا عشان نساعد الناس و كمان نقولهم عن الرب يسوع
ياه دي حاجات كتيرة نقدر نعملها لله
بالظبط وده مثال للاهداف اللي ربنا خلقنا عشان نحققها وده عامل بالظبط زي مشينا على حسب اللي بتقوله البوصلة ... لما بنمشي في حسب كلام ربنا فاحنا بنتبع الشخص الثابت اللي ما بيتغيرش، احنا بنتبع الله ...
استنى عندك ... انا مرشد سياحي ... و عندي طريقة احسن ... انا مش ها عمل كل الاهداف اللي ربنا عايزني اعملها ... انا عايز اعمل اهدافي ( يأخذ منه البوصلة)
شايف ازاي ... أنا اقدر استخدم البوصلة كويس قوي ... كل اللي هاعمله انا امشي على حسب السهم بتاعها ما يقول ... مش ممكن اللي بيحصل شايف السهم بيشاور عليّ (يتحرك مع ابراز ان السهم يشير عليه في كل موضع)
غريب اللي بيحصل ده ... سهم البوصلة مبقاش بيشاور على اتجاه الشمال و بقى بيشاور علطول عليك!
يمكن عشان المغناطيس الجميل اللي موجود تحت التي شيرت بتاعتي هنا
طبعا هو ده السبب ... انت ليه حاطط مغناطيس تحت هدومك؟
عشان البوصلة تشاور عليّ في كل وقت لأني انا عايزاتحكم في حياتي بالطريقة اللي تريحني عايز انفذ كل اهدافي.
لكن لو كملت بنفس الطريقة انت هاتوه بكل تأكيد ... انت هاتمشي بمزاجك مش على حسب الخطة اللي ربنا حططها لك ... انا ممكن اساعدك
تساعدني ؟! ازاي؟
اول حاجة محتاج انك تشيل المغناطيس ده ( ينزع المغناطيس)
اي اي
دلوقتي سهم البوصلة بيشاور على فين ؟
بيشاور ناحية الشمال
هو ده اللي ربنا عايزه انك تتبعه هو و في الاسابيع اللي جاية هانتعلم ايه الخمس اهداف اللي عايزنا نعملها ... هانعرف ليه احنا موجودين هنا على الارض؟
ليه احنا هنا؟!
ربنا خلقنا عشان نحقق اهدافه زي ما مكتوب بالظبط في الاية اللي بعد الآية اللي قلتها لك من شوية
لاننا نحن عمله مخلوقين في المسيح يسوع لاعمال صالحة قد سبق الله فاعدها لكي نسلك فيها افس 2 : 10
طب انا محتاج استلف البوصلة بتاعتك ... لأن شكلي لازم اعمل الرحلة ديه و اتمنى اني اعرف السكة ... مع السلامة
مع السلامة
تونى إيه رأيك في رائد الخبير بتاعنا.
متهيألي كل اللي كان بيفكر فيه هو نفسه وبس.
أعتقد كده
دي حاجة مش كويسة؟ مش كده.
طبعاً، بس خلي بالك ساعات كتير إحنا بنعمل زيه، عشان كده لازم نفتكر دايماً اننا لازم نحقق أهداف الله وفي الاسابيع الخمسة اللي جاية ها نتعلم ازاي ننفذ 5 من الاهداف ديه ودلوقتي خلونا نصلي:
يا رب احنا بنشكرك من اجل انك ارسلت لينا المسيح عشان نعرف السكة اللي مفروض نمشي فيها عشان نكون معاك في السما ... نشكرك عشان انت خلقتنا لتحقيق اهدافك .. من فضلك افتح قلبنا عشان نكون جاهزين نتعلم الاهداف ديه و نكون مشتاقين اننا ننفذها ... في اسم المسيح امين.
04 - 08 - 2012, 11:08 PM
العرض الشجري