انواع كريم الاساس المناسبة لكل بشرة وازاي تحطيه صح

[marit jesus]

الفاونديشن أو كريم الاساس من الحاجات الاساسية في المكياج اللي منقدرش نستغنى عنها لانه بيداري اي شوائب او عيوب في البشرة وبيوحد لونها, لكن بتقابلنا ساعات كتير مشاكل مع كريم الاساس منها مثلا انه بيشقق على الوش ومش بيثبت طول اليوم وبيعمل خطوط على البشرة, وده بيرجع انه ممكن نكون بنحط كريم الاساس بطريقة غلط, او بنختار نوع كريم اساس مش مناسب مع بشرتنا وبالتالي بتكون النتيجة الطبيعية انها تظهر الحاجات دي في مكياجنا, عشان كده احنا النهاردة هنوضح لكل بنات حوا ايه هي أنواع كريم الاساس المختلفة وازاي تختاري المناسب لبشرتك وتحطيه بطريقة صح عشان يبقى حلو على الوش ومن غير اي عيوب.

– ايه هي الحاجات اللي نختار على اساسها كريم الاساس بتاعنا ؟
1- اولا نوع البشرة لازم تعرفي نوع بشرتك لان هي اللي تحدد نوع كريم الاساس اللي هتستخدميه لان كل بشرة بتحتاج نوع مختلف.

– بالنسبة للبشرة الجافة : انسب نوع كريم اساس ليها هو النوع السائل.

– والبشرة الدهنية : من انسب انواع كريم الاساس المناسب ليها هو النوع البودر او السايب, والكريمي.

بيبقى في ساعات استثناءات في الاختيار حسب اللي ممكن يكون افضل مع بشرة معينة مثلا لتغطية حبوب او بقع او اي شوائب في البشرة.
2- تاني حاجة في الاختيار بعد معرفة نوع البشرة هو تحديد درجة لون كريم الاساس اللي تمشي مع لون بشرتنا, وعشان نحدد لون كريم الاساس اللي يمشي مع بشرتنا لازم نحدد الاندر تون “Undertone” للبشرة.

والبشرة حسب الاندر تون بتتقسم لتلات انواع بشرة باردة, وبشرة دافية, وبشرة محايدة, وكل بشرة منهم ليها درجة لون كريم الاساس اللي تناسبها.

– البشرة الباردة : دي بتكون فيها العروق اللي عند المعصم اللي هي Undertone لونها ازرق, حطي ايدك في الشمس وشوفي لون العروق لو زرقا تبقي انتي صاحبة بشرة باردة, وفي الحالة دي يبقى انسب درجة لون لكريم الاساس هو اللي بيكون على وردي .

– البشرة الدافية : هي اللي بيكون فيها لون العروق اخضر, وهيبقى انسب درجة لون كريم اساس ليها هو اللي بيكون على اصفر او دهبي.

– البشرة المحايدة : ودي بتبقى خليط من الدافية والباردة يعني هتلاقي عند المعصم عروق خضرا وزرقا مع بعض, وانسب درجة كريم اساس مناسب لصاحبات البشرة المحايدة هو اللي على بيج.

3- لما بنيجي نشتري كريم الاساس كلنا بنقع في غلطة اننا بنجرب اللون على ايدينا على المعصم او على ضهر الايد لكن ده مش صح وبيخلينا نشتري لون غلط مش مناسب للون بشرتنا, انسب مكان عشان تجربي اللون هو الرقبة جيبي لون مطابق للون الرقبة.4- مع اي نوع بشرة قبل ما نحط كريم الاساس نطبق الاول الكريم المرطب وبعدين الكريم الواقي من الشمس, او ممكن نستخدم الكريم الواقي اللي بيكون فيه نسبة مرطب وطبعا نختارهم مناسبين لنوع بشرتنا, سيبي الكريم لمدة دقايق يتشرب على البشرة, وبعد كده تقدري تطبقي كريم الاساس على بشرتك.

– تعالوا دلوقتي نعرف مع بعض انواع كريم الاساس وازاي نحطه صح:
1- كريم الاساس السائل:
من اشهر انواع كريم الاساس هو النوع السائل وافضل طريقة عشان نحطه يكون بفرشة كبيرة عشان نعرف نفرده كويس على الوش, ننقط بالفرشة على الوش كله وبعدين نبدأ نفرده في حركات دائرية لحد ما يمتزج كله على البشرة كويس, وممكن نستخدم فرشة اصغر للاماكن اللي مش هنعرف نوصلها بالفرشة الكبيرة زي منطقة حوالين الانف.

وبالنسبة للي عندهم حبوب او بثور او احمرار او هالات سودا, يستخدموا كونسيلر تحت العين وعلى الاماكن اللي فيها حبوب وبثور قبل كريم الاساس, زي ما اتكلمنا قبل كده على انواع الكونسيلر وازاي نستخدمها.

اخر خطوة بعد كريم الاساس والكونسيلر نحط لوس بودر او البودرة السايبة عشان نثبت كريم الاساس على البشرة.


2- كريم الاساس الكريمي:
افضل طريقة عشان نحط النوع ده على البشرة هو بالصوابع, نغسل ايدينا كويس قبل ما نحط كريم الاساس عشان ده من الحاجات اللي ممكن تسبب لنا حبوب لانه الميكروبات بتتقل من الايد للبشرة, بعد كده هنحط كريم الاساس على اطراف الصوابع ونبدأ نمزجه على بشرتنا كويس لحد ما نغطي بيه كل البشرة.

بالنسبة للكونسيلر مع كريم الاساس الكريمي يفضل انه يتحط بعد كريم الاساس بطريقة التنقيط او الطبطبة بس تحت العين يعني منفردش بالصوابع كلها عشان منسمحش كريم الاساس, وممكن في الاخر نرش مثبت مكياج عشان نضمن ان المكياج بتاعنا يدوم اطول فترة.

3- كريم اساس بودر:
افضل طريقة عشان نطبقة على البشرة اننا نحطه بسفنجة تكون رطبة شوية, يعني نبلها بسيط بالمية وناخد بيها كريم الاساس نطبقه على البشرة كلها بشكل متساوي.

وبالنسبة للكونسيلر مع كريم الاساس البودر يتحط قبله, لكن بعد ما نحط الكونسيلر نخلي بالنا ونحط كريم الاساس بحذر في المناطق اللي حطينا فيها كونسيلر عشان ميتمسحش, وفي الاخر بردوا نحط مثبت المكياج.

[MenA M.G]

دائماً مُشاركاتَكْ رائْعة
موضوعك مُمَميز
ربنا يبارك خدمتك

[marit jesus]

ميرسى على مرورك الغالى يامينا