بِالْكَيْلِ الَّذِي بِهِ تَكِيلُونَ يُكَالُ لَكُمْ وَيُزَادُ لَكُمْ

[sama smsma]

تنويعات على اوتار انجيل مرقس .. الاصحاح الرابع
نغمة 15
وَقَالَ لَهُمُ: «انْظُرُوا مَا تَسْمَعُونَ! بِالْكَيْلِ الَّذِي بِهِ تَكِيلُونَ يُكَالُ لَكُمْ وَيُزَادُ لَكُمْ أَيُّهَا السَّامِعُونَ.
25 لأَنَّ مَنْ لَهُ سَيُعْطَى، وَأَمَّا مَنْ لَيْسَ لَهُ فَالَّذِي عِنْدَهُ سَيُؤْخَذُ مِنْهُ».


هل يؤتى بسراج ليوضع تحت مكيال.. مجد المسيح و عمله فى حياتنا لن يُخفى، بل سيُعرف في كل العالم، علشان كده يقول ليروا اعمالكم فيمجدوا اباكم الذى فى السموات طب يارب يمجدونى انا ما انا اللى عملت !!!! لا طبعا انا معملتش ده هو عمل بيا و فيا هو مين اللى اداكى صوت حلو ترنمى هو مين اداك نعمة الوعظ و التعليم هو مين اللى بينجح طرقك انت و لا هو ؟ كمان يقصد تعاليمه سيعرفها الجميع وستعلن للعالم عن طريق تلاميذه وعن طريقنا نحن لما نطبقها والمسيح هو الذي سيظهر فينا، نورًا في أعمالنا وكلماتنا و تصرفاتنا و لبسنا و اكلنا . يارب غلبتنى معاك !!! شوية تقولى ان عملى يبقى فى الخفاء و شوية تقول انتم نور العالم و ما نحطش السراج تحت المكيال و لا السرير .... ؟ !!!!!!!!!!!
لا طبعا المسيح يطلب أن تكون حياتنا في الخفاء، أي كل صلواتنا وأصوامنا في الخفاء، ولكن معنى الكلام ده اننا ما ندورش على مجد شخصي لينا، ندور عن مجد المسيح في أي عمل نقوم به،
السراج هو كلمة الله (المسيح هو كلمة الله) وهو تعاليم السيد المسيح التي علينا أن ننشرها ولا نخفيها.
المكيال... يستخدم للبيع والشراء (لكيل البذار ويسع كيلة قمح) بيشاور على محبة المال و العالم و القنية يعنى ما تخدش نور الروح القدس اللى فيك و تخفيه تحت هموم العالم و انشغاله
و السرير يشاور على الكسل ... "في الليل على فراشي طلبت من تحبه نفسي طلبته فما وجدته".. طبيعى مش حتلاقيه ... ربنا بتاع النشاط و التعب من اجله
بِالْكَيْلِ الَّذِي بِهِ تَكِيلُونَ يُكَالُ لَكُمْ وَيُزَادُ لَكُمْ أَيُّهَا السَّامِعُونَ...
ينفع يبقى قانون روحى و برضه حياتى و اجتماعى ...تجتهد فى الروح و تتعب تاخد نعمة بفيض ... تغفر للناس يتغفرلك .. و اغفر لنا كما نغفر نحن ... اهى ده تطبيف عملى للاية .. كمان زى ما تحب تتعامل عامل الناس فى حياتك و شغلك ... حتسمع كلمة ربنا بجدية و اهتمام تاخد حتسمع بكسل و تراخى و تهمل في حياتك الروحية تزداد فقراً، من هو ليس أميناً ويجحد الرب زى اليهود ساعتها فاللى عندهم اتاخد منهم وراحت منهم أورشليم وهيكلهم، وفقدوا حكمتهم وفهمهم للناموس فبعد أن كانوا يفهمون النبوات وينتظرون المسيح، صاروا يجهلون كل حاجة ..


وَقَالَ: «هكَذَا مَلَكُوتُ اللهِ: كَأَنَّ إِنْسَانًا يُلْقِي الْبِذَارَ عَلَى الأَرْضِ،
27 وَيَنَامُ وَيَقُومُ لَيْلاً وَنَهَارًا، وَالْبِذَارُ يَطْلُعُ وَيَنْمُو، وَهُوَ لاَ يَعْلَمُ كَيْفَ،
28 لأَنَّ الأَرْضَ مِنْ ذَاتِهَا تَأْتِي بِثَمَرٍ. أَوَّلاً نَبَاتًا، ثُمَّ سُنْبُلاً، ثُمَّ قَمْحًا مَلآنَ فِي السُّنْبُلِ.
29 وَأَمَّا مَتَى أَدْرَكَ الثَّمَرُ، فَلِلْوَقْتِ يُرْسِلُ الْمِنْجَلَ لأَنَّ الْحَصَادَ قَدْ حَضَرَ».



القديس مرقس هو الوحيد الذي يذكر هذا المثل "البذور التي تنمو في السر" وهو مقابل لمثل الخميرة.
إستصعب التلاميذ العمل، وكيف يقدمون نورًا للعالم، علشان كده اكد لهم السيد هنا أن العمل الكرازي، وعمل الخدمة هو عمل إلهي مستمر، له فاعليته في حياة الآخرين. الكارز أو الخادم يلقي الكلمة في القلوب والله ينميها كيف؟ نحن نجهل طريقة نمو البذار، ولكننا نرى نتائجها وربما بعد مدة. النمو هو عمل الروح القدس في النفس مش عمل الخادم. فالخادم يجهل كيف تنمو الكلمة... حتى التوبة و التخلص من الخطية عمل الهى .. توبنى يارب فاتوب ...تفضل تجاهد و تقع و تقوم و فجأة تلاقى النعمة زارتك و الخطية اللى مغلباك ربنا نصرك عليها ... العمل الروحى عمل تراكمى و الحياة مع ربنا تراكميه مش مجرد لقطة و لا لحظة .. زى ما فاكر بنتى ماريا لما كانت بتحبى كنت كل ما اشوفها بتحبى و مش عارفة تمشى اقول البت دى حتمشى امتى لغاية ما فى يوم فجأة لقيتها رايحة بين الترابيزة و الكنبة مشى رايحة جاية ...قلت ركبها جوست مشى و لا ايه ؟!! طبعا مشيها جه نتيجة نمو عضلاات رجليها و اعصابها اثناء الحبى و كانت الثمرة انها مشيت .. ما تزعلش لو بتروح القداس و بتزهق و لا مش بتتعزى ما تزعلش لو صليت و ما خدتش او بتجاهد و لسه زى حالاتى ماسور من خطية ...البذرة فى الارض و كل اللى بنعمله عمالين نسقى فيها و النعمة عمالة تنمى فى الخفاء لغاية ما الخضار يطلع و تجنى عمل ربنا فى حياتك ...تعبت فى الخدمة و مر عليك فصل الشباب اربع سنين خدمة و انت مش شايف انك نفعتهم فى حاجة و لا حصل لهم اى تغيير !! معلش بكرة يكبروا و النعمة تزورهم و اللى رميته جواهم يبقى مخزون ربنا يكبره ... فيه اية تقول فى المستقبل يتاصل يعقوب ... يعنى بكرة يكبر .. بتصلى لجوزك ربنا يهديه و يحنن قلبه ..بتصلى ربنا يخفف من حدة مراتك و الخناق و النكد ..بتصلى علشان ربنا يعدل من سلوك ولادك ..ما تخافش و ما توقفش ... اغسطينوس ابن الدموع رجع بعد عشرين سنة .. البذرة رمتها امه و فضلت بدموعها تسقى سنين و النعمة زارت فبقى القديس العظيم ...ربنا حيرد كل واحد اترمت فيه بذار المحبة بجد و اتسقت باخلاص و حب و صبر ... اللى فارقنا حيرجع و اللى قسى حيتحنن .. صلوا و ما تقعدوش تراقبوا البذرة يوم بيومه سيبوها شوية
لالهنا كل المجد


نبيل شحاتة