الارتباط مقاس الروح

[walaa farouk]

ارتبط بحد يكون "مُعين" ليك.. مش "عبء" عليك ماشي تجُرّ فيه عشان الحياة تكمل ..
يكون "نظيرك".. يعني قدك وشبهك وزيك، مانتاش سابقه بخطوات كتير وعمّال تعلمه ازاي يعيش، "مش جايبه "تربّيه" يعني.
ولا هو يكون سابقك بخطوات كتير.. فا تعيش على حلمُه هو وأنت تدوب في النُص.

فا جمال الشكل مطلوب يا جماعة آه مقولناش حاجة، بس مش هو اللي بيشيل العلاقة في أوقات كتير.. يعني ماينفعش ارتبط بحد شكله حلو ومشاعرنا كبيرة ناحية بعض، بس "روحه فاضية"، مفيش حلم يعيشه.. مفيش "مرمطة" في حياته كبّرته وخلّته قادر يحتوي ويفهم يعني ايه تعب ووجع وحلم عايش عشانه.

أنا شخصياً مقدرش اتخيل نفسي مرتبط بحد تكون روحي "أوسع" منه.. (وبالمناسبة الروح بتكبر بالألم والمعاناة والصراع والبحث والتوهان والاكتئاب.. ) كل الكوكتيل اللطيف ده
فا ساعتها لما اجي اقدم حب ملاقيش صعوبة، بس لما اجي استقبله اتوجع بإحساس وِحدة مُر.. لأني مش مفهوم.. ومش متشاف كُلّي.. واللي معايا مش فاهم ومش قادر يستوعب معظم اللي بعدّي فيه، وماجربش يعيش حياة شبه اللي عشتها ويصارع في نفس صراعاتي.
يعني ببساطة لو ارتبطت بحد "روحي اوسع منه" هلاقيني لما ابقى تعبان "بفلت" منه.. من حضنه.. وجوده وروحه مش هاتكفّيني وتحتوي وجعي..

فا الصعوبة بالنسبالي دلوقتي مش اني الاقي الأجمل والأحسن في المواصفات..الصعوبة بجد بقت في أني الاقي الأنسب (ليا).. اللي على مقاسي بالظبط، في تفكيري ومعاناتي و حلمي اللي عايشله.

عشان كدة بقيت مقتنع أنه في الارتباط الشكل مهم آه.. بس "مقاس الروح" هو الأهم

#الارتباط
#مقاس_الروح

[Mary Naeem]

بس "مقاس الروح" هو الأهم

صح الكلام

ربنا يباركك

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[walaa farouk]

ميرسى كتير على مروركم الغالى