6 أسباب الحيوانات الأليفة بتحسن صحتك

[sama smsma]

6 أسباب الحيوانات الأليفة بتحسن صحتك :



1- تقليل الضغط النفسي :
- الحيوانات دايما تصرفاتهم بتخلينا مبسوطين ومهما حصل بيدونا إحساس بالحب وده بيخلي عقلنا دايما في حالة سعيدة.
الدراسات اثبتت إن في أوقات الضغط بسبب شغل أو مهام صعبة ، الناس اللي كانوا معاهم حيواناتهم الأليفة تعرضوا لضغط اقل عن الناس اللي كان معاهم شخص آخر أو عضو من العيلة . :D
2- تقلل ضغط الدم :
- ممكن يكون التأثير غير مباشر لكن الكلاب مثلا بتخلينا نتحرك أكتر حتى ولو عشان نلعب معاها بس وده بيظبط ضغط الدم عندنا .
- بعض الدراسات اثبتت إن الناس اللي معندهاش قطة معرضة أكتر بنسبة 40 % للإصابة بأزمة قلبية و 30 % للإصابة بأمراض قلبية عن الناس اللي عندها قطط :D !
3- يقلل الإحساس بالألم :
الدراسات اثبتت إن الكلاب بالذات بتساعد على تقليل الإحساس بالألم عند المرضى المصابين بـأمراض مزمنة أو المرضى اللي لسة عاملين عملية ، وعشان كده في مستشفيات كتير جدا بالخارج بتستخدم الكلاب كوسيلة للعلاج الأسرع أو تخفيف الألم عند المرضى .
4- بتساعد على التخلص من الإكتئاب :
وجود حيوان اليف مع مرضى الإكتئاب مع الأدوية وطرق علاج تانية بيساعد جدا على الشفاء .
- الحيوانات دايما بتدينا حب مطلق منغير تعقيد وده بيساعد على تقوية الثقة بالنفس .
- الحيوانات كمان بيحتاجوا رعاية واهتمام كتير وده بيضيف مسئولية وتركيز ايجابي في حياة المريض .
- ده غير إنهم بيقللوا الوحدة اللي دايما بيكون فيها المكتئب .
- الدراسات اثبتت إن الحيوانات الأليفة بتحفز هرمونات السعادة . مجرد إنك تطبطب على كلبك أو قطتك ده بيساعد على افراز هرمون ال serotoninوال dopamineودول اللي بيدونا الإحساس بالسعادة .
5- تقليل نسبة الكوليسترول :
- اثبت إن الحيوانات الأليفة بتساعد على تخفيض نسب الكوليسترول اللي ممكن يسبب انسداد الشرايين وده لأن الكلاب بتساعد على زيادة النشاط البدني لصاحبها .
- بشكل عام الحيوانات بتساعدنا نعيش حياة صحية أكتر .
6- حساسية اقل :
في السنين اللي فاتت في كذا دراسة وجدت إن الأطفال اللي اتولدت في بيت فيه حيوانات اليفة أو اتعرضت لهم في الطفولة بشكل كبير بيكونوا اقل عرضه للإصابة بالحساسيات بشكل عام أو الأزمة الصدرية بنسبة 50% .
وده لأنهم اكتشفوا إن فرو الحيوانات الموجود في الهوا بيساعد الجهاز المناعي عند الطفل إنه يكون اجسام مضادة لأنواع معينة من الميكروبات اللي ليها علاقة بالحساسية والأزمة الصدرية .
* لو عندك قطة أو كلب عايز تطمن على صحته كلمنا واحنا هنيجي لحد عندك نكشف و نطمنك عليه ^^

[walaa farouk]

معلومات حلوة يا سمسمة
ربنا يفرح قلبك

[Mary Naeem]

شكرا على المعلومات

ربنا يباركك