روشته للإمتحانات

[روشا الفرفوشه]

بسم الثالوث القدوس



روشته للإمتحانات


"الامتحانات قربت ومش عارف اذاكر واتخنقت وزهقت وشكلى كده مش حعدى السنه دى "
كلام من ده كتير بنسمعه كل ما تقرب الامتحانات من الناس كلها وايام الامتحانات بقا نفتكر ربنا اوى ونفضل نقول" يارب يارب استرها معايا ونجحنى " دلوقتى افتكرت ربنا طب كنت فين من اول السنة

المهم ان احنا كلنا بنحس ان احنا محتاجين ربنا, ربنا الى لما قابل التلاميذ "فتح ذهنهم ليفهموا الكتب" (لو 45:24). و طبعا كل واحد فينا حيقول فى نفسه انا اخطيت كتير السنه دى اكيد ربنا حيحاسبنى فى الامتحان ويسقطنى علشان الى انا كنت بعمله , احب اقولك ان ده مستحيل ايوا مستحيل لان ربنا اكبر من كده بكتير واحن من كده بكتيير وبيعاملنا زى ولاده مش عبيده
وممكن تقول انا حاسس ان الموضوع خرج من ايدى وخلاص انا ضايع ضايع لانى قصرت كتير فى المذاكره طول السنة يبقا انا كده كده ساقط , لا انتا كده الى بتسقط نفسك لان ربنا متدناش روح الفشل دى "الله لم يعطنا روح الفشل، بل روح القوة والمحبة والنصح" (2تى 7:1).
يبقى انتا لازم تقدم حاجه علشان روح النصح والقوه دى تظهر فيك واكيد ربنا حيبارك
وممكن تكون خايف من النتيجة وتقول ده انا حيبقى شكلى وحش اوى لو سقطت شكلى قدام نفسى وقدام عيلتى واصحابى لا وكمان قدام زمايلى فى الدفعه ولا فى الدرس , ايه ياعم انتا ناسى كلام ربنا "أنا معكم كل الأيام" (مت 20:28) مش هوا ده ربنا الى بيحبنا و"المـحـبة الـكـامـلـة تـطـرح الـخـوف إلـى خـارج"(1يو 18:4)

المستقبل فى ايد ربنا اعمل انتا الى عليك وسيبله هوا النتيجة وهوا اكيد حيباركلك فى حياتك
خليك واثق فى ربنا ده هوا الراعى الحنين والاله القدر على كل شىء لو حاسس انك خاطى تعالى عند رجله قول الى انتا عايزه قابله مع اب اعترافك قابله وانتا بتتناول قابله وانتا بتصلى وصدقنى هوا مش حيسيبك وحيخليك مطمن مهما كنت خايف وقلقان

بعد كده بقا تعالى نشوف شويه حاجات مهمة

1- قبل الإمتحان

+ نظم وقتك كويس علشان :
أ- تستوعب الى انتا لسه مذاكرتوش.
ب- تقدر تراجع المنهج كله على بعضه لكشه واحده .
ج-بس ياريت وانتا بتراجع تراجع على الامتحانات القديمة والاسئله الى بتتكرر دايما .

+النظام دايما مفيد مش حيخليك مركز فى خمسين حاجه حتبقى كل حاجه ليها وقتها علشان لو سبت الموضوع سايب كده حتحس انك لايص وتايه ووراك مذاكره لو قعدت تذاكر فيها سنه مش حتخلص فياريت بقا لو تعمل جدول لذيذ كده علشان تنظم العملية.

+ مهم جدا انك تحافظ على هدوئك متبقاش متنرفز وزهقان لان مينفعش كده لازم تكون هادى علشان تعرف تركز ولازم تكون محافظ على الصلاة المنتظمة و الصلاة السهمية فاهم حاجه فى الفتره دى سلامك النفسى .

+ نظم مواعيد الاكل والنوم كويس وخصوصا النوم.


2- أثناء الإمتحان

+وانتا بره اللجنه متقعدش بقا تسال ده وتسلم على ده وذاكرة الحته دى ولا لا والكلام الحمصى ده لا حاول تهدا وتحس ان ربنا معاك علشان يديك سلام فى قلبك بدل محد يقولك اللحق ده فيه ورق جديد نزل وفاضل على الامتحان ربع ساعه انسى.

+ صلى براحة كده قبل متقرا ورقه الاسئلة ولازم تقراها كويس عشان :

- المطلوب بالظبط فى الاسئله وتاخد فكرة عامه فى السريع على شكل الامتحان.
- تختار الاسئله الاسهل والى بتاخد وقت اقل علشان تنجز.

+ ياريت بقا تنسى موضوع البراشيم ده خالص وكل شويه تخش الحمام والكلام الفاضى ده كده انتا حتغضب ربنا ولو اتقفشت ياحلو يبقى عليه العوض فياريت تبعد عن السكة دى خالص علشان ربنا يسترها معاك .

+ راجع اجاباتك كويس واوعى تطلع الا لما الوقت يخلص علشان مترجعش تندم .

+ فى البيت. فى ناس بتحب اول ما تروح البيت تقعد تراجع الى هيا عملته فى الامتحان نصيحتى بقا ليك اياك والمراجعه بعد الامتحان الى حصل حصل ياباشا انسى كتبت كويس خلاص كتبت وحش برضه خلاص سيبك بقا من الى فات وركز فى الى جى.


3- بعد الإمتحان

+ سلم امرك لربنا وهوا اكيد مش حيسيبك واعتمد عليه دايما .

+ نصيحة بقا من مجرب متفتكرش ان الى انتا نفسك فيه هوا دايما الاحسن ليك او الاصلح لا ربنا وحده هوا الى عارف ايه الاحسن ليك والانفع فالمستقبل فعلا فى ايد ربنا ومعاه وكفايه انك مع ربنا لكن كل حاجه تانيه فى العالم تراب خليك دايما هادى.

يسوع معك.. سر نجاحك الوحيد.

خد بقا زتونة الموضوع

+ نظم وقتك كويس بحيث تكون فترة المذاكره فى اكتر وقت انتا مصحصح فيه .
+ ريح جسمك كويس ومتجهدوش اوى علشان تعرف تركز كويس يعنى نام على الاقل 7 ساعات .
+ ياريت تبعد عن الاكل التقيل علشان لما بتكبس المعده مخك بيقف ومش حتعرف تذاكر ولا كلمة فخليك خفيف
+ ابعد عن السهر الزياده لانك لما حتسهر ليله حتاثر على تركيز اليوم الى بعدها كله .
+ متكترش فى الشاى والقهوة على الفاضى واياك يعنى اوعى تاخد حبوب منبهة .
+ كل شويه كده كده اقطع المذاكره بصلاة كويسه او بصلاة سهمية .
+ فترة الامتحانات والمذاكرة حروب الجسد حتلاقيها صعبة شويه فارجوك متستسلمش وخليك معا ربنا .
+ قلل او امنع خالص الفرجة على التليفزيون لان ده بيضيع التركيز خالص .
+ بلاش تذاكر معا اصحابك الا عند الضروره .
+ كل ماتذاكر جزء اتعود انك تلخصه.
+ لو حطيت لنفسك جدول مذاكرة حاول مترهقش نفسك اوى وتحملها فوق طاقتها.
+ لما تبدا تذاكر ماده متخليش على المكتب غير الورق بتاع الماده دى وبس علشان تعرف تركز.
+ اول متحس انك اتخنقت وزهقت اتمشى شويه فى الاوضه وقدم صلاة قصيره.
+ خلى المراجعه النهائية بتاعتك هيا حل الامتحانات الى فاتت.
+ ليلة الامتحان متركز اوى فى كل التفاصيل.

4- فى لجنة الإمتحان

+ لما تدخل اللجنة صلى الاول بهدوء وحاول تهدى نفسك.
+ غالبا اول محتمسك ورقة الاسئله حتحس ان كل الى انتا ذاكرته راح فى التراوه وانك مش فاكر اى حاجه لكن متقلقش ده طبيعى خالص ابدا كده براحه وحتلاقى المعلومات بتخر لوحدها.
+ متبصش فى ساعتك كتير بس خلى بالك لان تقريبا وقت الاسئلة متساوى.
+ ياريت تركز فى ورقتك وسيبك المراقب بيتخانق معا مين ولا بيعمل ايه خليك فى نفسك.
+ طبعا من غير مقول حجتك كلها لازم تكون معاك .
+ ياريت لو تقدر تكمل اجابة السؤال لغاية الاخر ده بيرفع من معنوية المصحح .
+ لما تحس انك خلصت وكتبت كل الى انتا عارفه خد نفس حلو كده وابدا اقرا تانيه بهدوء واكيد حتلاقى كلام تزوده.
+ لما تخلص الامتحان متقعدش تراجع الاجابة معا زملائك ركز فى الامتحان الى بعده.
+ طبعا كل الكلام ده مش حينفع ببصله الا لو كنت مذاكر كويس ياحلو.
+ تذكر دائماً أن الله يبارك عملك.
وكلما بذلت جهداً أكثر، ازدادت بركته لك.
ربنا معاك

[Mary Naeem]

شكرا على المشاركة
ربنا يفرح قلبك

[روشا الفرفوشه]

ميرسى على مشاركتك الجميله