أوان الزرع

[walaa farouk]

لحد كدة ..
وماعرفش يسكت اكتر من كدة ..

بينى وبينك ..
انا ماصدقت انك هتمشى ..
اصل بصراحة ..
انا عشت معاكى ايام صعبة ..
ربنا يقدرنى وانساكى وانساهم ..

حبست دموعها ..
ومالقيتش كلام ترد بيه ..

قال لها ..
دا كفاية النكد والقلق اللى عيشتينى فيه ..

هنا قررت انها ترد عليه ..

انت ليه بتتكلم كدة؟ ..
هو انت مافرحتش معايا خالص ؟
يا اخى طب افتكر يوم عيد ميلادك ..
كنت مبسوط ازاى ؟

فاكر لما تعبت شوية ..
وبعدها ربنا قومك بالسلامة؟

ويوم ما عربيتك عطلت ..
ولقيت اللى وقف لك وساعدك ..
لغاية ما اتصلحت؟

فاكر كام مرة كنت سايق بسرعة ..
وربنا نجاك من كذا حادثة؟

ولما اتخانقت مع صاحبك ..
ولقيته بيصالحك بعدها؟
طب فاكر لما ...

وهنا قاطعها .. وقالها معاكى حق ..
انا اسف ..
مش قصدى انكر كل اللى عملتيه
بس مش عارف ليه ..
فجأة قفلت منك وعايزك تمشى

على فكرة ..
انا هامشى .. وهتيجى غيرى ..
وهى كمان هتمشى .. وهتيجى غيرها ..
زى ما اللى قبلى مشيت وانا جيت ..
صدقنى العيب مش فينا .. العيب فيك

اقولك على حاجة ..
انت مستنى الفرح ييجيلك من برة ..
وانت اللى معاك بذرته ..
ومش راضى تزرعها ..

لو عايز اللى هتيجى مكانى تفرّحك
كنت حطيت بذرة الفرح معايا ..
لو عايز اللى هتيجى مكانى تريحك
كنت حطيت بذرة الراحة وانت معايا ..

انا ماليش ذنب فى اللى بيحصل لك
انا اللى عليا باعمله ..
باديلك كل اللى عندى ..
مش بابخل عليك بأى دقيقة حتى ..
بس انت كل مرة تفضل تضيع وقت
وادينى اهو ماشية ..
وانت عمّال تقسى عليا بكلامك
عموماً .. اللى حصل حصل ..
خلاص مافيش وقت

بس ليا طلب عندك
اللى هتيجى مكانى ..
مالهاش ذنب فى اللى حصل معايا
ماتعاملهاش بنفس الطريقة ..
جرّب تغير الطريقة ..

حبها ..
هتلاقيها مالية الدنيا حواليك حب
اضحك لها ..
هتلاقيها بتضحك فى وشك علطول

لما خلصت كلامها ..
كان واقف قدامها مش لاقى رد ..
اصل كل كلامها صح ..

جرى عليها وقال لها ..
انا عارف ان الاسف ..
مش هيرجع الايام اللى فاتت
بس اوعدك انى هاسمع كلامك بالحرف

فضلوا يتكلموا لحد الساعة ما قربت على 12 بالليل
وكان هو فى سابع نومة

قامت شالت شنطتها وراحت ناحية سريره
وشوشته فى ودنه وقالت له
انا ماشية خلاص .. ومش راجعة تانى
هتصحى تلاقى واحدة تانية مكانى
زى ماتفقنا بقى ..

وابتدت الساعة تدق 12
ومع اخر دقة .. كانت هى اختفت
صحى من نومه لقاها بتضحك له
قالت له اعرفك بنفسى ..
انا 2017

جايبة لك معايا ..
365 يوم تعمل فيهم اللى انت عايزه

ضحك لها وقال لها ..
وانا مش هاضيع يوم ..
من غير ماعمل حاجة تفرحنى وتفرحك
وابتدوا مع بعض قصة ..
لسة مش عارفين احداثها

والقصة دى هتبدأ معاك انت كمان ..

احنا فى اخر شهر فى السنة ..
خد قرارك من دلوقتى ..
وارمى البذور اللى هتقدر عليها ..

زى ماانت بتشترى الاجندة ..
فاضية ..
وانت بتكتب بمزاجك فيها ..

برضه ايام السنة الجديدة ..
جاية لك فاضية ..
وانت اعمل فيها اللى انت عايزه ..

حاسب نفسك على كل اللى حصل ..
وكأنك بتقفل دفاتر السنة اللى فاتت ..

شوف انت كسبت ايه ..
وخسرت مين ..

شوف انت فرحت امتى ..
واتسببت فى زعل مين ..

شوف انت نجحت فى ايه ..
وأحبطت مين ..

م الاخر ..
شوف نفسك على حقيقتها ..

ساعتها هتعرف ..
فين البذور اللى محتاج تزرعها ..
وفين الزرع اللى محتاج تقلعه من حياتك ..

كل سنة وانتو طيبين مقدماً ..

والكلام ده حقيقى جدااا ...

أمير تادرس

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى ربنا يبارك تعب محبتك

[walaa farouk]

مارى
رينا
ميرسي كتير على مروركم الغالى