تسمحلى اوديك فى داهيه

[ماريا تى ثيؤتوكوس]

تسمحلي اوديك في داهيه؟

تسمحلي أضرك ضرر كبير

تسمحلي أضحك عليك و أخليك تعمل اللى بقولك عليه و متنفذش كلام اللى بيحبك رغم إن كلامي هيضرك

تسمحلي أخليك تضيع فلوسك و صحتك على حاجه ملهاش لزوم

تسمحلي أخليك تتعب أعصابك و تتمنى اللى مش في ايديك و ممكن تغلط غلط كبير أوي بسبب نظرة تنظرها لحد تاني

تسمحلي أخليك تبطل تعمل الحاجه اللى بتنقى روحك و تقربك من اللى بيحبك وضحى بنفسه علشانك

تسمحلي أخليك رخيــــــــص أوي و كل من هب و دب ينهش فيك و انت بيتهيألك إنك جميل أوى

تسمحلي اخليك بدل ما تسكن فيللا جميله تسكن تحت اي كوبري

ها .. قلت ايه ؟ ... يا ترى هتسمحلي بكل ده ؟

ايه ده بتقول مش موافق .. و بتقول عليا مجنونه كمان

طيب استنى استنى أنا مش مجنونه

اصل انت سمحت لحد تاني بكل ده و أنا قلت يمكن تسمحلى انا كمان

مع ان الحد التاني ده عدو ليك و ليا و انا اقربلك منه بكتير

عارف مين هو ؟

لأ انت عارف بس مش واخد بالك

اقولك اسمه

كل الناس عارفه اسمه

حتى الاطفال الصغيرين

إسمه

الشيطان


طيب مش أنا اولى بيك من الشيطان

طيب لو انت مش هتسمحلي بكل ده

يبقى ليه تسمح للشيطان انه يعمل معاك كده

ايه ؟ .. بتقول ايه ؟ ... بتقول انك مسمحتش للشيطان بكل ده

لالالالالا انت سمحتله بس انت ناسي
و انا هفكرك

لما متسمعش كلام الكتاب المقدس و تسمع كلام الشيطان يبقى سمحتله يضحك عليك و يخليك تعمل اللى بيقولك عليه و متنفذش كلام ربك اللى بيحبك

لما تشتري بفلوسك سجاير تضر بيها صحتك يبقى سمحتله يخليك تضيع فلوسك و صحتك على حاجه ملهاش لزوم وتنتحر بالبطئ

لما ما تغضش بصرك و تشتهى فى قلبك يبقى سمحتله يخليك تتعب أعصابك و تتمنى اللى مش في ايديك و ممكن تغلط غلط كبير أوي بسبب النظرة دي

لما ماتصليش يبقى سمحتله يخليك تبطل تعمل الحاجه اللى بتصفي روحك و تقربك من ربنا اللى بيحبك واللى اتصلب علشانك انت

لما تلبسي مكشوف قوىو جسمك المكسى بدم الحمل عريان يبقى سمحتيله يخلي كل من هب و دب ينهش فيكى و انتي بيتهيألك إنك جميله أوى

لما من كتر الخطايا و استسلامك لوسوسة الشيطان تبعد عن الملكوت و تقرب من النار يبقى سمحتله يخليك بدل ما تسكن فيللا جميله تسكن تحت اي كوبري

عرفت بقى انى مش مجنونة لما طلبت منك كده

عرفت ان انت اللى مجنون لو كنت بتسمح للشيطان بكده

لو كنت وافقت ع اللى طلبته منك يبقى مش هلومك لما تسمع كلام الشيطان

لكن لا العقل ولا المنطق ولا الاخلاق و لا المسيحيه ولا كلام ربنا يوافق على الكلام ده

يبقى بقى لازم ............. لازم تراجع نفسك و تبعد الشيطان عنك وتقوله انا مش هسمحلك تضيع ابديتى ابداااااااااااااااا

منقول مع اضافتى