دول اللي علمونا يعني ايه يكون الاختلاف راقي و بناء

[walaa farouk]

فيه مرة القديسين بولس وبطرس إختلفوا في أحد القضايا و تحديداً قضية تعامل بطرس مع غير اليهود ؟ و القديس بطرس أخطأ .

و هنا تدخل القديس بولس و نصح القديس بطرس
ان مش صح ان يتجنب الاكل مع غير اليهود
ويقتصر الايمان علي اليهود فقط دون باقي الامم
و كتب كدة في رسالته لغلاطية (11وَلَكِنْ لَمَّا جَاءَ بُطْرُسُ إِلَى مَدِينَةِ أَنْطَاكِيَةَ قَاوَمْتُهُ وَجْهاً لِوَجْهٍ لأَنَّهُ كَانَ يَسْتَحِقُّ أَنْ يُلامَ)

.. و بالرغم ان القديس بطرس عاش مع السيد المسيح له المجد عن قرب شديد لمدة ٣ سنين أما بولس كان غير مسيحي من الأساس بل و مضطهد للمسيحية إلا إن بطرس بكل إتضاع قبل نصح و إرشاد بولس .

تخيل لو كانوا في توقيتنا و بيتعاملوا بنفس عقليتنا .. كانوا شردوا لبعض و هاجموا بعض علي صفحات التواصل الإجتماعي .

لكن هل تعلم :

• ان كل حد فيهم خد طريق وركز في خدمته وفي الهدف الكبير اللي قدامه ..
• إتعاملوا بكل محبة وإتضاع .
• محدش فيهم فكر يحول الموضوع لمعركة ومناظرات .
• محدش فيهم فكر يعمل لنفسه حزب ويحذر من التاني .
• محدش فكر ينهش و يقطع في التاني .
• و القديس بطرس بكل إتضاع خضع لتصحيح بولس .

ده ليه ؟
• لان الاتنين كانوا مركزين علي هدفهم الرئيسي الكرازة برسالة الانجيل و الخلاص بفداء المسيح .
• الاتنين كان قلبهم علي الكنيسة جدا و بيحبوا الكنيسةجداً .
• و كل حد فيهم كان متأكد جدا ان التاني قد ايه بيحب المسيح جدا وأمين له بكل قلبه .

•• الاتنين قدموا نموذج رائع وواقعي للمحبة و الاتضاع والاتنين كملوا رسالتهم بشكل عظيم وجه اليوم اللي الكنيسة تحتفل بيهم في نفس اليوم .

دول الناس اللي حافظوا الكنيسة .. دول اللي برغم خلافهم لكن قدموا محبة عملية للمسيح وكنيسته ان باتضاعهم حافظوا علي وحدة الكنيسة بدون ما يدوا فرصة لابليس انهم ينهشوا في بعض ويمزقوا الكنيسة .

دول اللي كانوا راقيين جدا .. دول اللي اشتغلوا في البناء مش في النقض او الهدم .. دول اللي اختلفوا في أحد المواقف بس راحوا مع بعض السما ووراهم جيش من المخلصين .

دول اللي علمونا يعني ايه يكون الاختلاف راقي و بناء .
دول اللي رغم إنهم مختلفين في الشخصية لكن بنحتفل ونفخر بيهم في يوم واحد لانهم متفقين في حبهم الشديد لملكهم المسيح 👑 .

"