ازاي احمي نفسي من انسان عايز يخدعني

[walaa farouk]

ازاي احمي نفسي من انسان عايز يخدعني ؟؟؟




+ بكل اسف وحده من اهم مشاكل الزواج و اختيار شريك الحياه هي الخداع او التمثيل
+ تخيلوا لو كل واحد بيقدم نفسه بكل شفافيه و وضوح هيحصل ايه؟ هنختار صح و هنقدر ناخد قرار مبني علي حقايق لكن ازاي مايصحش لازم نبوظ حياتنا و حياه واحد تاني مالوش ذنب!!!
+ بنمثل علي بعض عشان عارفين اننا عندنا افكار غلط بس احنا بنحب الافكار دي و عايزين نعيش بيها!!
+ المشكله اننا بنفتكر نفسنا شاطرين لما نضحك علي الطرف الاخر و نخليه يوافق علينا!! بنفتكر اننا كدا هنوصل لحياه سعيده لكن الشخص اللي بيخدع و بيمثل هو اول واحد حياته بتبوظ دنيا و اخره لان الطرف المخدوع مش هيقدر يقدمله اي حب او ثقه!! و كمان ربنا هيحاسبه علي خداعه... يعني انت خسران من كله
+ طبعا الطرف المخدوع كمان خسران لكن علي الاقل هو ماعملش حاجه تغضب ربنا.. و هنقوله يعمل ايه عشان ماينضحكش عليه

+ مين بيمثل اكتر الراجل ولا الست؟
التمثيل و الخداع مالوش علاقه براجل او ست ليه علاقه بالشخصيه و التربيه.. كل واحد فيهم ليه الافكار بتاعته اللي مخبيها و عايش عشان يحققها باي شكل حتي لو عن طريق التمثيل

+ الحل ايه؟
الحل هيكون علي جزئين..
++ الاول
موجه للشخص اللي بيحب يخدع الناس و مش عايز يقدم الحقيقه..
+ لازم تجاوب الاول بصراحه... عايز تكون سعيد بجد ولا عايز تفرح شويه و بعد كده حياتك تبوظ ؟... عايز شويه حب مش حقيقي ولا عايز حب بجد؟ ... فاهم يعني ايه امان و ثقه ولا ده مش مهم عندك؟
+ لما تجاوب علي الاسئله دي احتمال تعيد حساباتك تاني و تقول لنفسك انا فعلا غلطان و هنا هنقدر نساعدك... لكن لو مش شايف نفسك غلطان يبقي الحل اننا نعلم الناس ازاي يكشفوك علي حقيقتك
+ اهم حل نقدمه ليك ان تعبك و صراحتك بيقدرها الناس اللي شبهك و ده هينجح ارتباطك لانك هترتبط بشريك يسندك و يثق فيك و يقدملك كل الدعم عشان تكونوا افضل زوجين لكن لو رفضك فانت الكسبان
+ لو سمحت بلاش تتسرع في الارتباط.. ارتبط لما تكون قادر تبني نفسك بدون ما تهدم و تجرح الشخص اللي معاك... لكن لو جواك لخبطه بسببها هتتعب شريكك يبقي الافضل تطلب مساعده مشير او دكتور نفسي يساعدك لان دي مهمتهم
+ معني ان عندك افكار بتخبيها يبقي هي افكار غلط... حتي لو بتحبها الأفكار الغلط دي هتبوظ حياتك.. ارجوك راجع افكارك الاول او اعلنها لو شايف انها صح

الجزء التاني
++اعرف منين ان الشخص اللي هرتبط بيه بيخدعني؟ او بيمثل؟
تعلوا ناخد شويه توصيات مهمه نعرف بيها الشخص اللي بيمثل... ركزوا معايا :
١. لما شخص بيتسال سؤال و يلف و يدور و اجابته تكون مش واضحه.. شك و خد حظرك
٢. هتلاقي شويه افكار و مواقف عكس بعض مثلا لما تساله يقول علي فكره معينه انها غلط لان السؤال واضح انه اختبار و بعد فتره يقول كلام ايجابي علي نفس الفكره.. بيكون نسي اجابته و موقفه علي سؤالك غالبا
٣. راقب الشخص في تعاملاته مع الاخرين و قارنها مع تعامله معاك هل مختلفه ولا بيعامل الكل بنفس الطريقه و الافكار
٤. المده... عامل مهم جدا في كشف الحقيقه.. بلاش تقل مده الخطوبه عن سنه مهما كانت الظروف و يكون فيه تعامل و مواقف كتير بشكل فردي و بشكل جماعي كمان زي رحلات تجمع الاسرتين او الأصدقاء
٥. عايز تحكم علي افكار شخص دور علي أقرب شخص له... اقرب صديق... مش لازم يكون افكارهم زي بعض بالظبط لكن لو فيه تشابه اطمن و لو لقيت اختلاف كبير ده مش عامل ايجابي
٦. قبل ما بتشتري عربيه مهم انك تتعلم سواقه عشان تفهم انت هتشتري ايه و بكام و يناسبك ولا لأ... و قبل ما تفكر في الارتباط لازم تدرس نفسك و تدرس شخصيات الناس.. دي كورسات مهمه جدا عشان تعرف انت بتتعامل مع مين و افعال الشخص ده معناها ايه... لو مش دارس كويس استحمل النتيجه!!
٧. دور ربنا ... ربنا ليه دور انه يساعدك في كشف الحقيقه و انت ليك دور ان يكون ليك علاقه حب مع ربنا قبل ما تفكر في الارتباط لو مش عندك علاقه حقيقيه مع ربنا انت كده فقدت عامل مهم جدا في كشف الحقيقه
٨. كل ما كان سنك صغير و خبرتك قليله كل ما كونت عرضه اكتر للخداع... اقري.. اتعلم.. طول بالك... بلاش تتسرع... ارتبط و انت كبير افضل بكتير من الندم و كلامي موجه للبنات كمان
٩. اداره مشاعرك... لو مش قادر تتحكم في مشاعرك كويس هتكون اعمي قدام حقايق كتير ربنا بيكشفها ليك و انت مش قادر تشوفها.. اتعلم تدير مشاعرك كويس
١٠. اسأل و خد خبره متخصص
١١. الشخص بيبان لما تختلفوا في الافكار او المصالح.
.. ركز علي رد الفعل في الوقت ده
١٢. اخر نقطه.. لو عندك شك بلاش تاخد خطوه لقدام...
لو مش قادر تحكم علي الشخص اللي هتعيش معاه انسحب افضل