انت مين بالظبط

[walaa farouk]

الطريقة اللي بتتصرف بيها لما بتعدي في زنقة وضيق بتحدد بالظبط أنت مين!

أستير الملكة عدت تقريبًا بموقفين صعبين أوي في حياتها أول واحد لما اتخدت زي المسبيه علشان تعيش في قصر الملك وبعدت عن الناس اللي بتحبهم وعن اهلها، والموقف التاني، بعد ما بقت ملكة، فجأة كده لاقت نفسها مطلوب منها تنقذ شعبها كله من الإبادة!

معتقدش أنه فيه ألم وضيق أكتر من كده أنك تبقى شايل حمل شعب كامل، أنت مسئول عن حمايته والأصعب كمان أنها كانت مخبية على الملك انها يهودية، فتخيلوا بقى الموقف اللي كانت فيه! لكن هي اختارت رغم ده كله تعمل حاجة مختلفة أو بمعنى أصح تعمل الحاجة الصح وطلبت من شعبها أنهم يصلوا ويصوموا لربنا علشان يساعدهم في اللي هما فيه.. طبعاً أكيد الموقف مكانش سهل كده، أكيد فيه ناس كتير كانت زعلانه من ربنا بسبب اللي بيحصلهم ده!

اختارت تقف عكس التيار وعلشان كده الله ماسبهاش وإداها حكمة امتى وازاي تتكلم وإداها كمان نعمة في عنين الملك ولما اعلنت له عن الحقيقة سمع لها وأصدر أمر بموت هامان صاحب الخطة الشريرة..

أوقات كتير لما بنمر بموقف صعب مش بنبقى قادرين حتى نصلي ويمكن كمان بنلوم ربنا أوقات أكتر، إزاي يسمح انه يحصل لنا كده.. خلونا النهاردة نشوف الظروف الصعبة اللي بنمر بيها دي بشكل تاني، زي ما استير شافت كده بالظبط، كانت ممكن تقعد تلوم ربنا انه محافظش على الشعب، بس الحل التاني راحت لربنا وقالت له ساعدني!
انت كمان تقدر تروح له وتقوله ساعدني انا مش قادر أعدي الموقف ده لوحدي .. خليك معايا واسندني، وهو مش هيسيبك

[Rena Jesus]

ميرسى ربنا يفرح قلبك

[Mary Naeem]

مشاركة جميلة جدا

ربنا يبارك حياتك

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[walaa farouk]

ميرسى كتير على مروركم الغالى