اعتراف من العيار الثقيل

[Mary Naeem]

اعتراف من العيار الثقيل

انا باعت مشكلتي انهاردة للنصيحة وللعبرة لأني بعد اللي هحكيه اقدر أقول ان ربنا سبحانه وتعالى بحكمته رباني من اول وجديد ،
انا دلوقتي سني في اول الأربعين وعشت حياتي بالطول والعرض في الغلط والدنيا ما كانتش سيعاني .. شاب زي معظم الشباب الغفلة واخداهم من غير ظابط ولا رابط زي ما بنقول .. المهم .. من حوالي عشر سنين كنت معجب ببنت بالرغم من اني عارف أنها مرتبطة بشاب انا اعرفه هوة مش صاحبي لكن فيه بينا معرفة وفضلت وراها لغاية ما سابت خطيبها ده وبطريقتي الخاصة الشريرة قدرت اميل دماغها ناحيتي وفعلا فسخت خطوبتها بالشاب ده بالرغم أنهم كانوا مخطوبين رسمي وفرحهم كان على وشك .. طبعا كل ده حصل من غير ما خطيبها ياخد خبر وظبطنا بالصدفة واحنا خارجين مع بعض .. لفت الأيام القليلة جداً والبنت نفسها اللي سابت خطيبها عشاني واللي انا بعترف انه أحسن مني خانتني وبنفس الطريقة مع واحد تاني .. كنت متغاظ جداً لدرجة خلتني اعمل لها مشاكل ولما زهقت ولقيت مفيش فايدة قفلت على الموضوع ونسيتها ببنت تانية .. اللي عايز أقوله ان الدنيا سلف ودين لكن وقتها انا مكنتش بفكر كدة وعشان ما كنتش بتقي الله برضه وقعني في نفس الموقف ودوقني حرقة القلب .. المهم دارت الأيام وأنا على نفس الحال من بنت للتانية بطريقة محترمة وغيرها لغاية ما حبيت بجد واحدة تخيلت أنها مكافأة من ربنا وعرفتها بطريقة غير معتاد عليها عن طريق الأهل وخطبتها فعلا واتجوزنا وبعد حوالي سنة وشوية وبالصدفة اللي عمر ما الواحد يفكر فيها اكتشفت ان الهانم مراتي تبقى بنت خالة البنت اللي حكيت عنها في اول مشكلتي وأنها كانت دايرة معاها في كل علاقة بتعملها قريبتها مع حد من أصحاب الشباب اللي كانت بتتخطب لهم وعشان هية ما حضرتش فرحنا عن عمد بعد ما عرفت ان انا العريس فطبعا ما اتقابلناش وبخطة مسبقة بين مراتي وبين قريبتها اتفوا على أنهم ما يتقابلوش في أي تجمع عائلي لعدم كشف الموضوع من اصله وشربت انا المقلب صح وبعد ما اكتشفت القصة دي قررت أجيب تفاصيل مراتي والمصيبة ان اللي عرفته عنها يدفعني لطلاقها بدون تفكير لكن للأسف لية منها ولد وحيد وهوة عمري كله ومش متخيل انه يتربى بعيد عني و يتربى على ايد الأم دي وأنا دلوقتي عمال بفكر أزاي أتخلص منها بدون خسائر .. كل اللي عايز أقوله للشباب .. اتقوا ربنا يكفيكم شر أنفسكم قبل ما الزمن يعلم عليكم .. اتقوا الله في أنفسكم وأهل بيتكم وفي بنات الناس ربنا بالمرصاد لا جدال .. اللهم بلغت وربنا يسامحني ويقدرني على مصيبتي .. أسف طولت عليكم لكن حسيت بواجب اني انصح الشباب خصوصا اني عارف كويس جداً سلوكيات البعض قد ايه بتبقى أحيانا بدون أي ضمير .

انا قلت انقل القصة دي علشان الشباب تعرف ان ربنا مش بيسيب حق بناته
واللي انت هتعمله فيها اكيد هيردهالك فى شخصك او في حد قريب منك

خلي بالك انت وهو

دا ربنا موجود
عارف وشايف ومش ممكن ينسى