الراهب أبونا مينا الأنبا بولا قديس سافر السماء

[Ramez5]

للي مايعرفوش ابونا مينا كان قديس عظيم بيسموه الناس ابونا مينا بتاع السجاير لان قلايته كانت مليانة سجاير وشيش من الناس وخمرة من الناس اللي كان بيرجعها لربنا ويخليها تبطل ادمان او تدخين او سكر
اخر مرة قابلته قالي اخر مرة هاتشوفني لاني خلاص هاروح للسما وبالفعل طلب سيدنا الانبا دانيال وقاله احرق كل العلب والشيش اللي جمعتها طول حياتي وكانه بيقدم ذبيحة خدمته على الارض
ابونا مينا رغم انه كان مقعد ونايم على السرير من سنين وتحمل صليب المرض الا انه مابطلش خدمة حتى وهو على سرير المرض
ابونا مينا كان رجل قديس بمعنى الكلمة وعنده شفافية لدرجة انه كان يعرف انت جاي في ايه من غير ما تتكلم وفي وسط عظته يوجهلك الرسالة الخاصة بيك
قلبه كان حنين جداااا لدرجة انه كان كل مرة بيحكيلي عن طفل عنده ١٤ سنة جاله يبكي علشان مش عارف يذاكر علشان ابوه وامه دايما بيتخانقوا مع بعض .... ويقولي صدقني ماعرفتش انام طول الليل وقعدت اعيط واصليله طول الليل

ابونا مينا بتاع السجائر
مكتوب على قلايته من برة " ممنوع اقتراب البنات والسيدات نهائياً من القلاية "، "ممنوع التصوير او التسجيل نهائياً"، "رجاء محبة غلق التليفون قبل الدخول للقلاية".
ابونا مينا كان اى حد يدخل قلايته كان لازم يشك فيه ازاى دة راهب بركة؟! ازاى دة راهب اصلا وهو بيشتمنا وبيتكلم بالطريقة دى ؟!
كان دايماً يقولنا انه كان صايع اصلاً وكان بيعمل حاجات كتير وحشة وكان بيحكلنا قصتة
اخر مرة روحتله من جوايا مكنتش عاوز اروح الكلام دة كان من 3 شهور تقريباً كان فى شهر 2 اللى فات المهم اول مرة ادخله والاقيه بيكلمنا بجد عن ربنا ، حكالنا قصة وكان كل شوية يقولنا آيه عمرى مهنساها
" لست تعلم انت الان ما انا اصنع ولكنك ستفهم فيما بعد "
اكنه كان بيقولى انت مش فاهم انا بعمل لية كدة دلوقتى بس هتفهم بعدين، وفعلاً فهمت خلاص
ابونا مينا كان سبب ان ناس كتير تبطل حاجات وحشة كانت بتعملها وقلايته تشهد على كدة " سجائر، خمرة ، حشيش، شيشة،
وحاجات تانية كتير
كان اى حد بيدخل عنده بيشرب حاجة او مدمن حاجة مكنش بيخرج من قلايته الا اما يكون مبطلها

نعم فقدنا يد موسى المرفوعة للسما ولكننا ربحنا شفيعا لنا في السما
اذكرنا يا ابونا امام عرش النعمة

[walaa farouk]

اذكرنا يا ابونا امام عرش النعمة

[Mary Naeem]

اذكرنا يا ابونا امام عرش النعمة