نصائح
💞 💓 💗.
اخطاء وانتى مخطوبه ممكن تقعى فيهـــا، لازم تعرفيهـــا; عشان تتجنبيهـــا
(( الخطـــأ الاول))
ان خطيبك يكون محور حياتك
أغلب البنات في بداية خطوبتها بتكون السكينة سرقاها بمعنى الكلمة
خطيبي راح، خطيبي جه، خطيبي أهو
خطيبي جابلي، خطيبي بيحبني، خطيبي على نياته كل البنات اخواته
لوك لوك لوك كأنها أول وآخر واحدة تتخطب
لو حصل معاكي كده في البداية فإنتي حالتك مش ميئوس منها
بس خالي بالك انك تفضلي كده كتير
يعني أول الخطوبة وماله عيشي يومين
بس مش طول عمرك يكون هو مركز اهتمامك ومحور حياتك
ويبقى هو الشمس وانتي كوكب بتلفي حواليه
ليه؟!
عشان بكل ببساطة هتندمي ومع اول اختلاف بينكوا وهتقعدي تبكي عاللبن المسكوب وتحسي انه ميستاهلش
وخسارة عمرك وشبابك وانك فنيتي كيانك في كيان شخص آخر
وحتى من غير اختلافات بينكوا
لازم متبقيش تابع بالأوي لحد
عشان هو هيزهق منك وانتي لما ميبقاش فاضيلك مش هتلاقي حاجة تعمليها
(( الخطـــأ الثانى))
التجــــــــــــــــاوزات
عيزاكي تتخيلي انك كنتي مع خطيبك في خروجة وفيه في لبسك كاميرا خفية وانتي متعرفيش
والكاميرا دي بتسجل صوت وصورة كل حاجة بتحصل بينكم وكل الكلام اللي بتقولوه
أو ان وانتم بتتكلموا فيه جهاز بيسجل المكالمات كلها
وان الحاجات دي أول ما بتتسجل تلقائي بتروح لوالدتك ووالدك على البيت
هيبقى ايه احساسك؟ هتخافي؟ هتتربكي؟ هتحسي بالذنب؟ هتخافي يزعقولك أو يعاقبوكي؟!
طيب انتي عارفه انك فعلا كل اللي بتعمليه بيتسجل؟
انا متأكده انك عارفه ان فيه ملك على يمينك وملك على شمالك بيسجلوا وبيكتبوا في أعمالك الحسنات والسيئات
أنا بس بفكرك والله .... عشان حاسه انك نسيتي أو عامله نفسك ناسيه
(وانا عامله نفسي نايمة وانا عامله نفسي نايمة)
ليه مينفعش يحصل بينكم تجاوزات؟!
(1) حرام
رضا ربنا مفروض يكون عندك أهم من رضا خطيبك لأن قلب خطيبك في ايد ربنا وتمام جوازتكم في ايد ربنا
(2) لا قدال
الله ممكن تسيبوا بعض
مش بفوِّل عليكم بالشر، بس بتحصل كتير ان اتنين يتخطبوا مده كبيرة
وبيحصل بينهم لمسات وقبلات وغيره وفي الآخر يسيبوا بعض
وتتجوز غيره وتفضل فاكره الأولاني لأنها عاشت معاه حاجات مفروض متتعاش غير لما يكون جوزها
(3) التجاوزات بتزيد
لما بيحصل بينكم حاجة في الأول بتكون صغيرة
(صغيرة كذنب ولكنها كبيرة لأنها في حق الله)
بعد فترة هو هيزهق من التجاوز ده، هيتعود عليه، خاصة لو تكرر كذا مره
هيطلب أكتر; البحر بيحب الزيادة، وانتي ممكن تضعفي، فتغلطي أكتــــــــــــر وأكتــــــــــــــر
مع ان من البداية لو حسمتي موقفك كان الموضوع انتهـى
لو حصل تجاوزات خلاص اعمل ايه؟!
تقفي فورًا عند الحدود الحالية ومتتجاوزيهاش، يعني متغلطيش أكتر من اللي فات
التجاوزات اللي بتحصل تقلليها بالتدريج (لو منعتيها مره واحدة يبقى خير وبركة طبعًا)
تعملي اللي انتي عيزاه باسلوب كويس وذوق في البداية
ارفضي بهزار، أو احكيله حكايات عن ناس سابوا بعض وان ربنا مش بيبارك وانتي خايفه يحصل كده
قوليله كفاية الموضوع ده عشان عايزه أحس بكل حاجة بعد الجواز لأول مره
وان الحاجة حلاوتها في وقتها ... يعني اتكلمي معاه بطريقة كويسة واقنعيه
لو مقتنعش بالذوق ، عنه ما اقتنع
برضه اعملي اللي انتي مقتنعه بيه واللي ربنا أمرك بيه
وصدقيني لما بعد الجواز يقعد يهزر ويقولك كنتي عامله فيها مؤدبة
أحسن ما يحسسك انك كنتي سهلة وبتروحي وتيجي بكلمة منه
(( الخطـــأ التالـــت ))
التفاهــــــــة
متبقيش انسانة تافهة يعني أخرك تتفرجي على المسلسل الفلاني وتفتحي الفيسبوك شوية وتنامي
أنا مش بشتمك والله .... كلنا فينا نسبة تفاهة .... بس حاولي تنضجي
مش معنى كده انك هتبقي سقراط ولا زويل
اتعلمي اونلاين لو عايزه فوتوشوب او برمجة او تسويق وغيرهم
اكتشفي اهتمامات جديدة ليكي
مواقع جديدة تستفيدي منها وتدخليها
غيري الروتين اليومي بتاعك
اقري كتب مثلا ... (غير الروايات الرومانسية)
اقري في الدين التفسير الميسر للقرآن الكريم
أو سيرة الرسول والصحابة
اتفرجي على برامج مفيدة
اعملي فلتره لكل الصفحات والجروبات اللي مشتركة فيهم على فايسبوك وشيلي اللي ملوش لزمة
لو ليكي هواية خياطة كروشية رسم نميها او اتعلميها
اتعلمي لغة جديدة أو نمي لغتك الانجليزية من البيت
اكتبي يومياتك
شوفي اكتر عادة سيئة نفسك تغيريها واعملي خطة ونفذيها
انقضي دولابك واوضتك كويس وروقيها وخليكي منظمة
(( الخطـــأ الرابــــع ))
نشر حياتكم الشخصية للناس
بتنزلي صوركم على الفيسبوك؟ بتكتبيله كلام رومانسي على حسابك أو حسابه؟
طيب ماتبعتيها في رسالة خاصة؟ أو تقوليه في الموبايل؟ مش هيبقى أحسن؟
مره قريت جملة عجبتني ومش قادره أنساها:
يارب ارزقنا علاقة منعقدش ننشر تفاصيلها؛ عشان نثبت لنفسنا وللناس اننا بنحب بعض
قبل ما تعملي حاجة فكري في الهدف
عايزه الناس تعرف انك بتحبيه وانه سوبر مان؟ ليه؟
ماطبيعي خطيبك هتكوني بتحبيه
ولا مش مقتنعة أوي وعايزه حد يقنعك بيه؟
تعرفي ان فيه ناس كتير أوي بيكون فيه بينهم خلافات بس دايما بيتظاهروا بالحب والسعادة المصطنعة قدام الناس؟
مبيحبوش يحسوا حد احسن منهم..أو ان حد شمتان فيهم
اوعي تبقي زيهم.....حياتك بحلوها ومرها ليكي تخصك
ابعدي عن الناس والتمثيل عليهم والاهتمام بيهم وبرأيهم
صدقيني الحياة حلاوتها في خصوصيتها
خلي حياتك الشخصية بعيد عن الانترنت
احكي لوالدتك لصاحبتك المقربة لما يكون فيه موقف يستدعي ذلك
(( الخطأ الخامـــــس ))
البُعد عن ربنا
فاظفر بذات الدين تربت يداك
لما تحاولي تقربي من ربنا، مش انتي بس اللي هتستفيدي....خطيبك هيستفيد أكتر، ولما تتجوزي هتكوني زوجة صالحة، ولما تخلفي هتعرفي تربي أولادك صح....مش هتكوني جاهلة
اوعي تفتكري انك لما تحاولي تتديني هتبقي معقده بقى ومكشرة ومش هيشوف منك حاجة حلوة
بالعكس....حاولي تصححي مفاهيمك....ومتاخديش الدين من نماذج حواليكي....اقري واتعلمي
::
قررت أسأل بنات متجوزة كتير من أصحابي، حوالي 20 بنت.. أبعت لكل واحدة على حدة "تنصحوا المخطوبين يتفقوا على إيه قبل الجواز عشان ميقعوش في مشاكل؟" وكل واحدة نصحت من قلبها، والغريب إنهم اتفقوا على كام نقطة حبيت أجمعهم هنا.. تحت شعار "كفاية نحنحة ويا ريت نتكلم جد شوية".
خلينا متفقين إن فترة الخطوبة المفروض من أجمل الفترات اللي بتقضيها البنت في حياتها.. فترة الحب والكلام الحلو والهدايا.. ونغمض عينينا قبل ما ننام وإحنا مبتسمين بعد مكالمة جميلة.. طيب ممكن نتكلم شوية كلام جد ونتفق على الحياة اللي جاية؟ عشان نرتاح ومنتكعبلش زي اللي سبقونا.
البنات بينصحوا المخطوبين بإيه؟
المصاريف
لازم نتفق فلوسنا هتروح فين وإزاي، مين هيمسك المصروف. اللي لسه مخطوبين بيكونوا لسه مسنودين على أهلهم في حاجات كتير أقلها الأكل والشرب، ليه منجربش يوم ننزل مع أهلنا نجيب خزين البيت ونسأل الفواتير بكام وإحنا بنصرف لبس وفسح كام.. والمشكلة إن الولد بيفضل يوعد أنا هفسحك وهظبطك وبعد الجواز الكل يتصدم بالواقع والخنقة المادية تبتدي تظلل على البيت.
الشغل والدراسة
اتفقوا إنتي هتشتغلي أو تكملي دراستك بعد الجواز ولا لأ.. ولو فيه أولاد إيه شكل حياتكم.. ومش عيب إنك تكملي في شغلك أو تسيبيه عشان خاطر بيتك.. المهم ده قراركم إنتوا وبس.. محدش له أي حق صوته يتسمع وسطكم.
ذمتك المالية
لو بتشتغلي من حقك إنك متساعديش في البيت، وحلو منك برضو إنك تساعدي، بس تبقي عارفة إنتي هتساعدي بقد إيه.. ولازم الراجل ميعتمدش على شغل مراته.. لأن ببساطة ممكن الست تسيب شغلها في أي وقت لضعف أو حمل أو احتياج من ولادها ليها.. ساعتها ممكن -لا قدر- الله الدنيا تبوظ.. فنصيحتنا ليكي ساعدي بحاجة مش ثابتة وبتتغير كل شهر عشان ميخدش مساعدتك حق، ولو قصرتي نبتدي في المشاكل. مصاريف البيت دور الراجل وبلاش نلعب أدوار بعض بطريقة تتعبنا قدام، وحوشي من فلوسك للزمن.
زيارات الأهل
ليه منتفقش هنزور أهالينا كل قد إيه، وهنبات عندهم ولا لأ، وهنبات قد إيه. فيه ناس فعلاً حياتهم بتبوظ من عدم النظام ويلاقوا إن الأسبوع بيضيع كله عند أهاليهم وملهومش أي خصوصية.
والمغتربين.. لازم تتفقوا أجازتكم هتقضوها إزاي وفين، ولو ملكمش بيت لسه يبقى تتفقوا كويس جدًا في النقط دي، مع مراعاة لو الست حامل أو مريضة ومحتاجة تقعد عند مامتها أكتر من حماتها عادي طبعًا الدنيا سلسة.
ونصيحتنا ليكم: حاولوا تجيبوا ولو شقة صغيرة تقدروا تنزلوا فيها أجازتكم عشان لو –لا قدر الله- كان لازم ترجعوا بلادكم أو محتاجين خصوصية مثلاً يكون بيتكم عندكم.
نظام اليوم
ممكن من باب الهزار نتكلم عن يومنا ماشي إزاي.. بيتفرج على كل الماتشات المحلية والدولية ولا لأ.. بينزل على القهوة كل قد إيه.. وإنتي بتصحي بدري ولا بتحبي تقضيها نوم للضهر.. بيتأخر في شغله أو بيسافر فترات طويلة كتير ولا لأ.. بيجي من الشغل يفضل ساكت وإنتي بتحبي الكلام ولا إيه.. أهالينا بيشتكوا مننا في إيه عشان تعرفي هتوطي تلمي هدومه وشرباته من الأرض قد إيه.
الفسح
ليه منتفقش على نظام فسح، بدل ما الستات يا عيني اللي مش بتشوف الشارع غير عشان تزور مامتها أو حماتها وتتحسب عليها نزولة، وإنتو ممكن تنزلوا مع أصحابكم كل قد إيه، عشان فيه رجالة بيقطعوا البنات عن صاحباتهم بعد الجواز وهو يقضيها نزول ويسيبها.
خطة للحياة
إنت إيه طموحك؟ وشايف نفسك وشايفنا إزاي بعد 5 سنين؟ هنعمل إيه؟ هنكبّر الشقة ولا هنحوّش لمدراس ولادنا إن شاء الله؟ نفسك تعمل مشروع ولا نسافر؟ وبجد ربنا ما يوقعكم في راجل معندوش طموح.
أهلنا
اتفقوا إنكم واثقين في بعض وساندين على بعض، مش محتاجين حد يدخل في حياتنا ويفرض رأيه، لازم هنحتاج نسمعلهم ونفضفض معاهم بس نسمع ونفكر ونقرر، إحنا كبرنا، ولو لسه شايفين إن لازم يكون علينا قوة عظمى بتحدد حياتنا.. طب نتجوز ليه؟
"::::::::::::::::::::::::::::::::::::::::::::
اول واهم حاجة لازم تتأكدي منها وتقتنعي بيها "انك لا تهدي من احببت ولكن الله يهدي من يشاء"
اي عيوب في خطيبك ممكن تحاولي تغيريها لكن مفيش ضمان ان المحاولة تنجح .. واتأكدي ان الراجل بيضايق لما مراته علطول تنتقده وتعدل عليه خاصة لو الحاجة دي انتي عارفه انها موجوده فيه من قبل ما تتجوزيه... فلازم تبقي حاطه كل الاحتمالات انه ممكن ميتغيرش زي مانتي عايزه، او يتغير ويرجع وهكذا وخليكي قد المسئولية طالما بتراعي ربنا فيه وبتحبيه ربنا هيكرمك
قاعدة لازم تحطيها قدام عينك دايما "اصلحي ما بينك وما بين الله، يصلح الله ما بينك وبين زوجك" لازم تراعي ربنا فيه وان اي حاجة بتعمليها من قدامه او من وراه ربنا مطلع عليها، واللي هتزرعيه دلوقتي هتحصديه قدام
اوعي تبصي لغيرك ، سواء وانتي بتجهزي الشقة او حاجاتك الشخصية وغيره، لان اللي بيبص بيتعب ومش بيحس ابدا بالرضا ، عيشي على نفس مستوى اهلك المادي وذوقك ااشخصي ومتبقيش نسخة مكرره من ناس كتير
لو حاجة في الشقة مش هتستفيدي بيها متجبيهاش عشان كل الناس بتجيب، هاتي اللي هتستعمليه بس
وعي تقارني خطيبك باي راجل غيره سواء دلوقتي او بعد الجواز، واعرفي كويس ان احنا مش بنشوف من الناس غير الظاهر، والظاهر بيجذب ويخدع....الظاهر نص الحقيقة وما خفي كان اعظم
مش عايزه ارغي كتير في النصايح العامة
نصايح لحياتكم المشتركة
اتعلمي الطبخ
جربي وافشلي مش عيب ولا حرام . الانترنت فيه كل حاجة وهيساعدك كتير ،، الطبخ حاجة مهمة والراجل بيحب الست اللي بتعرف تطبخ ، والاكلة الحلوة مش لازم يكون فيها الغالي والجديد ، الاكلة الحلوة ممكن تكون على قد الايد.. على راي نجلاء الشرشابي ... شوفي مصروفك يقدر يجيب مقادير ايه وعلى الاساس ده دوري على وصفات ، مش العكس
الثقافة الجنسية
اقري واسمعي من متخصصيين عشان تفهمي صح بدون خرافات ... اياكي تتناقشي في الحاجات دي وتحكي تفاصيلها لحد مهما كان ، دي اسرار بيوت وحرام تفشيها الا لو كان لاخذ مشورة طبية مثلا وغيره .. لو ليكي واحدة صحبتك او قريبتك بعد الجواز سالتك عن حاجات خاصة قوليلها انا وجوزي اتفقنا منطلعش الكلام ده بره وخلاني احلف وانا بحبك جدا والله بس اعذريني .. اتعلمي ازاي تقولي لا
الحب والرومانسية
انسي المسلسلات التركي .. انسي الافلام ... اقولك على حاجة انتي خدتي اكبر قلم من الفن واللي بيقدمه عشان بيتعملنا غسيل مخ .. الحب موجود بعد الجواز بس مش شرط يكون بنفس الصورة اللي انتي متخيلاها .. متحاسبيش جوزك على حاجة في دماغك هو ميعرفهاش ... مش لازم يجيبلك نفس لهدايا اللي بتجي لغيرك او تتصوروا وتخرجوا في نفس الاماكن اللي بتشوفي اصحابك فيها .. عيش حياتك انتي بدون ما تكوني نسخة مكرره من الاخرين
الميزانية والمصروف
لازم تتفقوا مين هيمسك المصروف، ومتحوشيش حاجة من وراه، ولو بتحبي تكتبي يبقى خير وبركة تكتبي بتصرفي ايه وهكذا، وبلاش يكون كل المصرزف مع الراجل عشان هيطير، وعيشي وهاتي حاجاتكوا متناسبة مع الفلوس اللي بيقبضها...بلاش تضحية زيادة ولا استغلالية، خير الامور الوسط
انتي والاطراف الخارجية بره بيت الزوجية
حياتك مع أهله
كما تدين تدان، لو معرفتيش تحبي اهله على الاقل متكرهيهمش او تعملي فيهم حاجات من تحت لتحت وشغل كيد النسا غلب كيد الرجال ده. واياكي تسمعي نصيحة حد بيدلك على الشر وانك كده تبقي شاطرة وواعية....كله بيجي عل دماغك في الاخر وولادد هيردوهملك.... خلي عندك سنس ولا تكوني تقيلة وتعامليهم براحتك كانهم اهلك ولا تكوني بارده تعامليهم كانهم اعدائك
حياتك مع العالم الخارجي
اولا انتي بنت هتتجوز فأي حاجة متحبيش جوزك يعملها يبقى انتي كمان متعمليهاش حتى لو هو ميعرفهاش.....لو ليكي اصحاب اولاد وبتتكلمي معاهم كلام عادي لازم تقللي معاهم بالتدريك لحد ما تقطعي تماما، ومتقوليش زمايلي الولاد والحجج دي .. تعاملك مع الجنس الاخر يكون في حدود الدين وتراعي ربنا في نفسك وجوزك
حياتك مع اصحابك
اوعي تبعدي عن اصحابك البنات اللي بتحبيهم تخلي جوزك هو محور حياتك، عشان هتتعبي نفسيا كأنك بتلفي حوالين نفسك وهتتعبيه معاكي لان الراجل مش بيحب الست الفارغة، في نفس الوقت يستحسن متدخليش اصحابك في حياتك الشخصية مع جوزك حتى لو هم كويسين، يكون كلامك عن حياتك كلام عام وسطحي وده لمصلحة الكل... ولو متخانقه معاه اوعي تتكلمي عليه وحش معاهم او مع اي حد
#
