وانت مالك

[walaa farouk]

كان هناك عامل ( حداد) متزمر دائماً على ابونا ادم وامنا حواء وطول ماهو شغال يقول ألله يسمحك يا ابونا ادم. الله يسمحك يا امنا حواء. لغايه ما ظهرله ملاك وقاله مالك في أيه.
رد الحداد وقال : الله يسامحك يا أبونا ادم وامنا حواء .
الملاك : ليه بس كده.
الحداد : لو لم يأكلون من شجرة معرفة الخير والشر ما كانوا خرجوا من الجنه بس نقول ايه الله يسامحهم.
الملاك : يعني انت لو مكانهم كنت عملت ايه. ؟
الحداد : كنت اكيد اول ما تيجي الحيه تقولي كل من الشجره كنت هاقولها وانا مالي و ارفض آكل طبعاً. حد يكون في الجنه ويخرج منها
الملاك: انت متأكد .
الحداد : طبعاً .
المهم اخده الملاك وراح مكان جميل كله شجر وفواكه من كل نوع وحاجه كده تفرح القلب والحداد اول ما شاف المكان اتبهر وفرح قوي .
الملاك : ايه رأيك ؟
الحداد : مفيش افضل من كده كل حاجه موجوده .
الملاك : بص انت مش هتخرج من هنا غير في حالة واحده وهي إنك تفتح الشبابيك ال3 دول .
الحداد : وانا مالي يعني هيكون عندي الخير والنعيم ده كلوا و اسيبه لا مش ممكن انا مالي مش هفتح حاجه.
سابه الملاك وبعد فتره نسي الحداد وراح فاتح الشباك الاول. وشاف انسان عجوز وشغال بجهد وعمال يرفع ميه من البئر ويرمي في الارض والميه تلف وتنزل في البئر مره أخرى وهكذا.
الحداد قال : انت ياعم الميه بتنزل تاني في البئر أنت ياعم مجهودك الكبير ضايع بلاش.
فجأة ظهر الملاك وقاله: انت مالك. فرصه وضاعت من أيديك حافظ على الاثنين اللي عندك.
رد الحداد وقال لالالا انا ازاي اعمل كده مش ممكن هفتح اي شباك تاني.
وبعد فتره وبطبيعه الحال الحداد زهق وقال افتح الشباك واشوف فيه ايه.
فتح الشباك التاني ولقي اثنين جزارين الاول عنه لحمه شكله حلوه وجميله بس معندوش زبائن والثاني عنده لحمه فاسده وشكلها وحش قوي ورائحتها كريهة جدا بس عنده زبائن وكل ما يغلي سعره الناس تزيد عليه والجزار الاول ينادي يلا يا زباين ببلاش مين يشتري وينادي بصوت عالي لكن الناس تسيبه وتروح للجزار التاني .
بص الحداد وقال : شوف الناس العبيطه يشتروا لحمه فاسده بفلوس كتير وسيبين الجزار الكويس اللي بينادي ببلاش.
ظهر الملاك وقاله : وانت مالك.
فاضل اخر فرصه.
الحداد قال للملاك خلاص مش ممكن اخليها تروح من ايدي.
وبعد فتره زهق الحداد وقال عاوز افتح الشباك وفضل يصارع نفسه افتح ولا مفتحش. أفتح ولا مفتحش. وبطبيعه الحال قال انا مش هافتح الشباك بس هابص من وراء الشباك.
وفعلاً يبص الحداد ويلاقي إنسان خايف من قطه وعمال يضربها ويمشيها وجاي ورائه اسد مفترس بيجري عليه وهيفترسه.
قام الحداد فاتح الشباك بسرعه ونادي علي الراجل : خلي بالك خلي بالك في اسد وراك هيفترسك .
ظهرله الملاك وقاله: وانت مالك خليك في حالك انت كده ضيعت الفرصة الثلاثه من ايدك وبتعتب علي ابونا ادم وامنا حواء اللي أخدوا فرصه واحده. اطلع بره.
ملحوظه ،،
الشباك الاول بيرمز للانسان اللي بيجري وراء المال(الميه)وللاسف يضيع العمر على الفاضي. (عريان خرجت من بطن امي عريان اعود).
الشباك الثاني.
الجزار الاول هي الكنيسة اللي بتعرض أكلها الروحي ببلاش وتنادي علي الناس لكن مفيش حد سامع او عاوز ياكل اكل صحي . لكن العالم لما يقدم اكل فاسد عن طريق الميديا المختلفه تلاقي ناس كتير تجري عليها ومهتمه بيها.
الشباك الثالث.
يرمز للإنسان اللي خايف من اللي أمامه مثل بكره وناسي انه وراه اسد مفترس وهو الموت اللي جاي جاي. لذلك يجب علينا أن لا نهتم بالغد يكفي اليوم شره.