زوادة اليوم: لو شو ما كنت ... أنا بحبّك : 7 / 6 / 2020 /

[souad jaalouk]

زوادة اليوم: لو شو ما كنت ... أنا بحبّك

أوَّل مرّة سألني : "بِتحبّني؟"
وبدون تفكير... وبإندفاع وحماس...
جاوبت: أكيد يا ربّ بحبّك
وَلَو!!! ..ما أنا ملتزم... وبصَلِّي..
ما بدا اتنين يحكو فيا...!!

ابتسم... وسألني مرة تانية: "بِتحبّني؟"
معقول؟ عم يسألني مرة تانية؟
شو ما سِمعني من أوَّل مرّة؟
شو ما استوعب عليّي شو قلت؟؟
على كل حال... رح إرجع جاوبو:
ولك أكيد بحبك يا رب...! وما بدّا سؤال..!

وتطلّع فيي مرة تالتة وسألني: "بِتحبّني؟"
وهون... وعيت... وفهمت سُؤالو!
ومرقو قدّام عيوني كلّ الناس اللي ما غفَرتلّهن!
ومرقو قدّام عيوني كلّ الناس اللي جَرَحتُهن!
ومرقو قدّام عيوني كلّ الناس اللي كانو بحاجة إلي وما لبَّيتهن!
ومرقو قدّام عيوني كلّ الناس اللي ما طلبت غفرانهن!
ومرقو قدّام عيوني كلّ الخطايا اليوميِّة اللي عم بعملهن!

معو حق يسألني! ... حزنت!
وقلتلو: يا رب... إنت بتعرف...!

حَطّ إيدو على كتفي وقَلّي...:
"لو شو ما كنت... أنا بحِبَّك" !

[walaa farouk]

ميرسي علي زوادة اليوم
ربنا يفرح قلبك

[Mary Naeem]

آمين يا رب