10 نصائح بعد الفركشة .. ماتعمليش فيها هاني سلامة

[Mary Naeem]

سها الفقي تكتب ..10 نصائح بعد الفركشة .. ماتعمليش فيها هاني سلامة

إنتي طبعا حبيبتي و بنت حبيبتي و نفسي يتصلح حالك وأنا مشكلتي إني حنينة وقلبي طيب فـ أنا قررت أديكي عصارة خبرتي وبهاريز معلوماتي..

لو علاقتك بالشخص اللي كنتي بتحبيه/ مخطوباله/ متجوزاه فشلت..إنتهت، إقري العشر نصايح دول وحطيهم حلقة في ودنك..
النصيحة الأولى:
ماتكتبيش على Facebook إنك إتولدتي من جديد أو إنك في الـGym وإن الرياضة كل حياتك و تتصوري selfie بالشورت ..
هو عارف إن علاقتك بالرياضة إنتهت بعد إمتحان Math 1 في ثانوية عامة!
النصيحة الثانية:
إوعي تغيري الـ relationship status بتاعتك على facebook بعد يومين و تكتبي "In a relationship" مفقوس قوي الجو ده..
و الأسخم لو دخلتي بجد في حاجة جديدة.. إنتي مش كابينة تليفون يا أختي.. خديلك هدنة.. ده حتى ماتشات الكورة فيها "إستراحة" مابين الشوطين!
النصيحة الثالثة:
هو أنا محتاجة أقولك ماتبعتيلوش voicenote أو video وإنتي بتعيطي و منهارة؟ ليه الناس تشوفنا و إحنا "بنبربر"..ها..ليه ؟؟!
النصيحة الرابعة:
ماتحاوليش تكلمي صاحبته الأنتيم اللي كنتي مش طايقاها وبتقنعيه يقطع معاها عشان تتلزقي فيها يمكن تعرفي أي أخبار قال يعني فجأه بقيتوا صحاب ولازم تتقابلوا.. هي وش هتفقس ده وهتقوله إنك كلمتيها... إحنا بنات زي بعض و"مبروم على مبروم..".. ياختي بطه!
النصيحة الخامسة:
كيس الحلويات اللي على حجرك تشيليه.. الغدا مش كل يوم بيج ماك كومبو لارج .. ده ماسموش "بطلع همي في الأكل" ده إسمه Emotional eating وفي ظرف أسبوعين هيبقى عرضك زي طولك.. كفاية أكل هتبقي شبه قلاب الأسمنت يا ولية !
النصيحة السادسة:
كلنا عارفين السر اللي انتي مخبياه.. إعترفي....
إعترفي إنك بتدخلي كل 5 دقايق تشوفيه Last seen إمتى على الwhatsapp..
طيب هتستفيدي إيه؟ بتدخلي كل 10 دقايق ؟ كتير برضه..نص ساعة..كتير يا أمه!! هتغلطي في مرة وتبعتيله حاجة من نوعية ksdfgirfgihi و هيبقى شكلك زي إيه ؟ "الشراب" المخروم إسم الله عليكي !
النصيحة السابعة:
ماتجريش تشتري سجاير لو إنتي أصلا مابتدخنيش عشان تنتقمي منه.. إنتي كده بتنتقمي من نفسك.. مش هيبقى وجع قلب وسرطان رئة.. أما لو إنتي أصلا بتدخني فـ على فكرة "التدخين بيجيب سرطان رئة"!
النصيحة الثامنة:
تحت أي ظرف م الظروف، ماتعمليش فيها "هاني سلامة" في فيلم السلم و التعبان وتروحي تحت بلكونته الساعة 4 الفجر وتقوليله : "على فكرة أنا مش وحشة قوي كده!" عشان غالبا الجيران هيطلبولك البوليس و مش بعيد يرموا عليكي طبيخ بايت أو مية غسيل!
النصيحة التاسعة:
لو حظك أغبر والكائن ده معاكي ف الشغل، ف كورس، ف جامعة، ف جمعية، ف أي إبن لذينة.. ما تقعديش تبصيله من بعيد نظرات رومانسية.. ولا نظرات حقد.. ولا كراهية.. ولا تبصي أصلا هقطع شراييني يا ولية!
النصيحة العاشرة:
لو القدر لعب لعبته وقابلتيه في حتة بالصدفة تجنبي تماما الجمل اللي من نوعية :
- مرتاح من غيري؟
- هو أنا استاهل منك كل ده؟
- بكره تعرف قيمتي..!
هو لو مش مرتاح كان كلمك..
و لو شايف إنك تستاهلي كان شالك ف عينيه ..
و لما بكرة ده ييجي و يعرف قيمتك ياريت يلاقيكي مش مستنياه ولا موقفة حياتك عليه..
ماتبقيش Drama Queen خلصنا بقى مش جورج كلوني هو.. خلاص هجيبلك حمدي الوزير يخطبك ! إهمدي بقى!
عيشي حياتك.. إستمتعي بيها .. إستمتعي بجد عشان السعادة طالعة من جواكي مش من مصدر خارجي..
و ماتنسيش دايما تحطي "روج"
يلا أديني خلصت ذمتي و نصحتك وأهو كله بثوابه وبالهنا والشفا الحساب يجمع ومانجيلكوش ف حاجة وحشة!