هتعيش احلى ايام ..

[Rena Jesus]

زمان ماكانش بيفرق معايا .. ان عيد ميلادى ييجى ويعدى ..
بس لما كبرت .. وبقيت اراقب اللى بيحصل فى حياتنا ..
أكتشفت حاجات كتير .. بس للأسف ..
كتير منها إكتشفته متأخر ..
وقررت ان فى كل سنة تعدى من عمرى ..
لازم يبقى معاها رسالة ..
يمكن حد يلحق اللى انا مالحقتهوش وكان اعظم الإكتشافات وأهمها ..

إن اليوم اللى بنتولد فيه ..
عامل زى بداية رحلتك فى اى مكان بتروحه ..
وكل سنة بتعدى .. كأنها فقرة جديدة فى الرحلة ..
أكيد ليها متعتها .. أوعى تتعامل مع عمرك ..
على أنه بيجرى منك .. او بيكبرك .. احنا بنكبر .. دا صح ..

بس عشان نفهم ونتعلم ازاى نفرح اكتر ..
عشان ندرك يعنى ايه .. حياة ..
ماتتعاملش مع سنين عمرك .. على انها بتزيد .. عشان تزعلك ..
اتعامل معاها على انها رقم .. كل ما بيكبر ..

دا معناه انك بقيت تعرف حاجات اكتر ..
بقيت تعرف تحب ..
بقيت تعرف تفرح ..
بقيت تعرف تتكلم ..
بقيت تعرف تصاحب ..
بقيت تعرف يعنى ايه مسئولية ..

ساعتها هتتمنى ان السنين تجرى بيك ..
عشان هتحب تفتكر كل فقرة فى الرحلة ..
بس وانت معدّى فى رحلتك .. إضحك ..
إضحك فى وش كل اللى يقابلك ..
حتى لو فهمك غلط .. في كتير هيفهموك صح
اضحك عشان الضحكة .. هى اللى هتخليك تعرف تدوس على مشاكلك ..
وهى اللى هتخلى الزعل يفارق وشك ..

لو عندك ولاد .. احضنهم
ولو ماعندكش .. فكر هتعمل ايه لما ييجو ..
لولسة خاطب .. اتفقوا ازاى هتبقوا احلى اب وام
ولو لسة هتخطب .. دوّر على ام لولادك ..
الأم اللى هتتجوزها .. هى دى الزوجة اللى هتفرحك بكرة

حب شغلك .. حتى لو اللى فى شغلك مش بيحبوك
كلم اصحابك فى التليفون واسمع صوتهم ..
سيبك من الشات والرسايل .. كلامها حلو بس بيتنسى ..
لكن الصوت اللى بيرن فى الودان .. هيفرحك كل ماتفتكره ..
اعمل اى حاجة مجنونة .. تحسس اللى حواليك انك مختلف
ماتقلدش تصرفات حد .. لازم تحط بصمتك ..
خلّى الناس هى اللى تقلدك ..

افتح دولابك .. البس وظبط شعرك واخرج مع حد بتحبه
اتمشى على الكورنيش .. واتصور سيلفى مع اصحابك
سيبك من اللى بيقول على كل حاجة انها سلبية ..

انسى انت عندك كام سنة .. انت ماتعرفش انت هتعيش كام سنة ..
انزل العب رياضة .. وحافظ على صحتك ..
وقت ما الكل هيسيبك .. هتلاقى نفسك واقف على رجلك ..

ولما ولادك يكبروا .. هيلاقوك جنبهم ..
عندك استعداد تجرى وتلعب معاهم ..
حط نفسك مكان اللى قدامك .. قبل ماتحكم عليه

صاحب ناس جديدة .. واتعرف على اد ماتقدر
اللى قال معرفة الناس كنوز ماغلطش
لو صاحبت حد كويس .. هتكسب كنز الصحوبية
ولو صاحبت حد مش كويس .. هتكسب كنز الخبرة بالناس ..
فيه ناس .. بتقابلها فى حياتك .. بيدوا لحياتك طعم جديد ..
الناس دول .. امسك فيهم بإيديك وسنانك ..
عشان دول مش بيتكرروا كتير ..

على فكرة .. ماحدش بيدى من نفسه ..
إلا لو كان بيحب بجد ..
الناس دول .. هتلاقى ضحكتك معاهم من القلب ..
ورسمة وشك وانت بتضحك ..
كأنها بتترسم مخصوص عشانهم ..
خلى بالك ..
هم كمان هتلاقيهم كدة معاك ..

لو بتحب حد .. مش لازم تبعد عنه كل اللى حواليه ..
عشان يشوفك انت بس .. ومايحبش غيرك ..
حلاوة الحب .. انه يختارك من وسط كل اللى حواليك ..
وتلاقيه بينده لك .. ويوشوشك بكلمة واحدة .. "بحبك"
ساعتها هتحس انك تستاهل حبه ..

ماتجيبش سيرة حد بأى حاجة وحشة ..
ولو حد جاب سيرة حد .. قول له ..
مانعرفش ظروف الناس ايه ..
لو حد قال عليك حاجة غلط ..
اكسفه واعلنها .. وقول له اصل هى غلط اساساً ..
هاتكسف من ايه ..ساعتها هو اللى مش هيبقى عارف ..
يودى وشه من الناس فين ..

اتصوّر وانت فاتح دراعاتك .. كأنك بتحضن الهوا ..
خلى الناس يسألوك .. هو انت بتضحك ليه علطول
إدّى اللى حواليك على اد ماتقدر ..
وماتقولش الموضوع عايز فلوس ..
فيه حاجات اهم واغلى بكتير من الفلوس ..
إدّى ابتسامة .. إدّى نصيحة .. إدّى مشاعر ..
إدّى ضحكة .. إدّى أمل .. إدّى اهتمام ..
المهم انك تدّى وخلاص ..

خليك عامل زى النسر ..
ربنا ما خلقهوش صدفة ..
لكن خلقه مخصوص عشانك ..
عشان وقت ما تيأس وتحس ان مافيش أمل ..
تاخد قرارك .. وتطير لوحدك ..
تنتف ريش ذكرياتك السلبية .. اللى مكتف جناحاتك
تكسر منقار كل كلام قلته .. وكان السبب انك ترجع لورا ..
وتقلع ضوافرك الضعيفة .. عشان تعرف تمسك حلمك ..
وترجع تطير من تانى ..
وتقول .. انا لسة عايش .. ما متش

وسط كل ده .. ماتنساش حق اللى خلقك
ولو انى متأكد .. انك مش هتعرف تعمل كل ده غير لو ربنا مالى قلبك
صدقنى لو عملت كدة .. هتعيش احلى ايام ..
هتيجى المشاكل وتعدى .. زىّ الموج العالى اللى كنا بنستناه فى البحر واحنا صغيرين ..
عشان نطلع معاه وننزل .. كنا بنستنى الموجة بقلق ..
ونخش فيها بخوف .. وبنطلع معاها برهبة ..
وبننزل معاها واحنا بنصرخ ..
وأول مارجلينا تلمس الارض تانى .. نضحك

والكلام ده حقيقى جدااا ...
أمير تادرس