صباح الخير ايها الفرح المسيحى_ يوم الجمعة_2017/3/3

marit jesus · رقم المشاركة : ( 1 ) 02 - 03 - 2017, 12:51 PM

صباح الخير والفل والورد والياسمين على كل أعضاء منتدانا الغالى في برنامجنا صباح الخير أيها الفرح المسيحى

اليكم موجز الاخبار
+ تعيد كنيستنا القبطية بتذكار شهادة القديس تيموثاوس الرسول
+رئيس برلمانية مستقبل وطن يفتتح المعرض الدولى للسيراميك
+قرارات جمهورية بتعديل اقدمية مستشارين وإعادة تخصيص لمشروعات خدمية

اليكم فقرات اليوووووووووووم

+ حاجة بحصل بين فاعل ومفعول

+ قانون نيوتن

+ الاهتمام

+اية اليوم

+حكمة اليوم

أولا حاجة بتحصل بين الفاعل والمفعول
المفعول به.
※ بتساعد اللي ادامك عشان تسمع عبارات النفاق والمدح المبالغ فيه؟ تبقي مريض. وازاي اصلا تسمح لحد انه يستغلك.
※ كلنا بنحب نسمع كلمات الشكر والمدح وده مش غلط. لكن ازاي تبقي عارف ان اللي بيمدحك ده. بينافقك وتسمح له يستمر بكده.
※ ولما توصل لمرحلة انك تغمض عينيك وتتغافل عن انه منافق واللي بيقوله ده مش هو اللي في قلبه. يبقي اعرف انك مريض.
※ تفرح لما يكون المادح ليك صادق. لكن لما يكون كاذب. تأكد انه بيضحك عليك وبيقول عليك ( أهبل ). ف ماتسمحش بحاجه زي كده ارجوك.

أولا بقي ⬅ الفاعل ( المنافق ).
ماتحاولش توصل لهدفك بالنفاق. رزقك هايجيلك ف خليك نقي.
الوصولية اللي انت ماشي بيها دي مكشوفه اوي على فكرة. وشكلك بيبقى وحش.
النفاق بقي هو المرض اللي ( بيورث في القلب ) باااقي المصايب التانيه من حقد وغل ودناءة وضعف و ( خناثه ) و انحطاط وانكسار و........... .
عارف الرمال المتحركه؟ كل ما تخليك واقف فيها. كل ماتنزل بجسمك اكتر. وكل ما فرصتك للنجاة تقل.
النفاق بقي هو بحر الرمال بتاع الصفات السيئة. كل ماتقف فيه كل ماتغوص في الصفات السيئة اكتر وفرصتك انك تبقي ( نضيف ) تقل.

⬅ سواء كنت طالب مع استاذه، او موظف مع مديره، او شخص عاوز خدمة من حد. اياك ثم اياك ثم اياك. توصل لهدفك بالنفاق. اوعي.
⬅ صحيح ممكن توصل للي انت عاوزه بس خلى بالك بحر الرمال هايبلعك. والناس هاتحتقرك. وبعد سنتين هاتبص لنفسك ب ( قرف )��

⬅ يا صديقي ما كان لك سيأتيك على ضعفك. فاسلك سبيلا نقيا.
⬅ اوصل لهدفك بشرف. تكسب هدفك وتكسب نفسك.

ثانيا قانون نيوتن الثالث اللي اخدناه في الفيزياء ؟
ببساطه شديدة بيقول ⤵
[ كل فعل له رد فعل مساوٍ له في المقدار ومضاد له في الاتجاه ].

يعني تخيل ان في جدو اللي في المركب ولازم يمد رجله ليضعها على الأرض . لما هايرفع رجله اليمين من علي المركب. المركب هايتحرك فورا في عكس اتجاة جدو ( مش بتاع الكورة ��).
دي بقي هي طبيعة الحياة. دي طبيعة الاشياء. دي طبيعة الطبيعة.
هل بقي حد يقدر يتحدي الطبيعه ؟
طيب لو حد حاول يتحداها. تفتكرو الامر هايعدي من غير اي خساير ؟

طيب ليه بقي انت لما حد ادامك يغلط سواء كان اخ او ابن او زوجه او صديق. وتحب تعاقبه. بتعاقب عقاب اكبر او اقل من الخطأ نفسه.
ليه ب نبالغ او نهون في رد الفعل. ومش بنخلي رد الفعل مساوي للفعل نفسه.

1. لازم يكون عقابك للخطأ. او رد فعلك على الفعل مساوي للخطأ او الفعل.

2. التهاون في العقاب او رد الفعل. بينتج عنه شخص غير مسؤول وغير مدرك للحياة. والأم اللي بتدلع اولادها اكتر من اللازم بتكون اول واحده بتجني الثمار الفاسدة دي.

3. المبالغه في العقاب او رد الفعل. بيسيب شرخ في العلاقة بينك وبين اللي حواليك. خليك معتدل. وماتطلعش غضب الشغل وضغط الحياة علي خطأ مايستاهلش كل ده.

4. انك تفوت الخطأ لابنك مره واتنين ده شيئ محمود وجميل. لكن انك تفوت الخطأ تالت ورابع. وتبقي فاكر انك كده بتعامله زي الرجاله.
فاحب اقولك انك غلطان. لازم لما يتكرر الخطأ اكتر من مره. يكون ليك رد فعل.

5. انك تبالغ في رد الفعل بحجة انك مش عاوزه يقع في نفس الخطأ مره تانيه. وفاكر انك كده بتربيه كويس. ف احب اقولك انك غلطان.
المبالغة في رد فعلك بتفقده الثقه في نفسه. وفي قدرته على معرفة مقدار اخطاؤه. لانه بيفكر ان مخه صغير مش مستوعب حجم الكارثه اللي عملها. في حين ان كل اللي عمله انه ضيع الريموت.

⬅ لو بقيت معتدل في رد فعلك. هاتبقي ماشي موافق للطبيعة.
هاينتج مجتمع طبيعي مش مجتمع مشوه.

ثالثا الاهتمام
كلنا عارفين كويس ان الطفل وهو صغير بيكون محتاج حاجات كتيييير.
ومايقدرش حتى يلبس هدومه لوحده.
وكل ما الإنسان بيكبر في السن. كل ما اعتماده على الاخرين بيقل نسبيا.
وبيبدأ يعتمد على ذاته في حاجات كتيييييييير.
كل ده أمر واضح ومش محتاح نقاش.
بس
هل تعلم ان انت مخطئ؟
هل تعلم ان فيه حاجه معينه. بيتساوي فيها الصغير مع الكبير ؟
هل تعلم انك مقصر في حق اللي جنبك مهما كان سنه كبير ؟
⤵
الاهتمام.
الحب
الرأفة
المودة.
الرعاية.

كل دي مسميات مختلفه. لكن معناها متقارب.

الإهتمام والشعور بالحب.
هو الشيئ اللي كل الناس محتاجاه بغض النظر عن سن او نوع او بلد.
⬅ اوعي تفكر ان اخوك عشان كبر. يبقي خلاص مش محتاج اهتمام ورعاية.
⬅ اوعي تفكر ان عشان والدتك لسه بصحتها. يبقي لسه مش محتاجه منك رعاية.
⬅ اوعي تفكر ان عشان بقالك 7 سنين متجوز. فزوجتك خلاص معدتش محتاجه منك اهتمام ورعاية.
⬅ عارف الخُطْ بتاع الصعيد اللي عامل نفسه سبع رجاله؟. مهما يبان قوي وصلب وصوته عالي وقلبه قاسي. احب اقولك انه بيكابر من جواه.
وزيه زي الطفل الصغير. محتاح الإهتمام.

مهما كان سن الشخص اللي ادامك.
احب اقولك انه مفتقد ومحتاج الشعور بالاهتمام. زي الطفل الصغير بالظبط.
احتياج الشخص للاهتمام والرعاية. دي فطرة في الانسان حتي لو عنده 100 سنه.

※ لازم تهتم باللي جنبك مهما كان سنه او ظروفه او احواله. سواء كان
أب. ام. اخ. اخت. زوج. زوجه. ابن. ابنة. صديق.

ايه اليووووووووووووووووووووووم

لاَ تَغَرْ مِنَ الأَشْرَارِ، وَلاَ تَحْسِدْ عُمَّالَ الإِثْمِ، فَإِنَّهُمْ مِثْلَ الْحَشِيشِ سَرِيعًا يُقْطَعُونَ، وَمِثْلَ الْعُشْبِ الأَخْضَرِ يَذْبُلُونَ.

حكمة اليوووووووووووووووم

الوجه المبتسم شمس ثانية اذا ابتسم من فضلك