خدوا بركة الأباء وإشبعوا من بركتهم

[Mary Naeem]

من كام يوم فيه واحد صديقي من شبرا كان بيتكلم معايا #وبيشكي من #أب_كاهن عندهم في الكنيسة إنه

#صعب_شويتين.... فقولتله مين #الأب_الكاهن دة فقالي أبونا فلان.... قولتله معرفهوش يمكن لو شوفته أعرفه.... فقالي إستنى أوريهولك.... فطلع صورته من على الفيس عنده.... لما شوفت الأب الكاهن دة إتصدمت من الكلام صدمة عمري لإني إتعاملت معاه مرة واحدة في حياتي... القصة كالأتي:
زمان بابا ربنا يديله الصحة كان بياخدنا دير الأمير تادرس الشطبي في حارة الروم لما كنا نتخنق من المذاكرة وإحنا في إبتدائي.... المهم كان القداس عندي مرتبط بالتونية.... طالما هاحضر قداس لازم ألبس التونية وأخدم بالذوق أو بالعافية .... لحسن حظي روحت القداس لقيت مفيش ناس كتير.... فبابا قالي فرصتك وجاتلك إدخل إخدم وقول المردات.... دخلت أخدم وكان أبونا دة هو اللي بيصلي... جه دوري إني أقول مرد القسوس والشمامسة والإبيدياكونيين وسبع طغمات كنيسة الله ولسوووووء حظي إن المرد كان منتهي في أخر الصفحة في الخولاجي فالشماس الكبير اللي جنبي قلب الصفحة بسرعة.... وأنا بقى كنت أذكى إخواتي فأفتكرته بيقلب الصفحة علشان المرد له باقية.... روحت مكمل الحتة بتاعة أبونا كلها في الميكروفون " وكل الخدام وكل البتوليين وطهارة كل شعبك المؤمن" المعلم يحاول يقطعني وأنا مكمل.... الشمامسة تحاول تقاطعني وأنا مكمل.... لحد ماخلصت فلقيت أبونا بيقول القطعة اللي أنا قولتها من تاني فبصيت لقيت من فوق مكتوب في الخولاجي " يقول الكاهن ".... إتكسفت كسفة وحشة أوي وقولت يا أرض إنشقي وإبلعيني ذي مابلعتي قورح و داثان وأبيرام.... إستنيت مرد وإتنين حفظاً لماء الوجه وروحت متسحب وقعدت بعيد علشان محدش يشوف الشماس اللي قال مكان أبونا بالغلط.... شويتين ولقيت شماس كبير بيدور عليا وبيقولي أبونا بيدور عليك وعاوزك.... أنا قولت في عقل بالي دة أكيد عاوز يزعقلي علشان عملت كدة... روحتله لقيته بيقولي سبت الخدمة ليه تعالى وأقف رد دة صوتك حلو أوي.... وراح مخلي الشماس الكبير يخليني أرد مرد الإعتراف أمين أمين أمين أؤمن أؤمن أؤمن.... وفي أخر القداس راح مديني صليب خشب وقربانة وقالي دي هدية علشان إنت كنت ولد جميل وشماس حلو.... #وبسببه_حفظت ألحان كتير أوي وأتقنت اللغة القبطية....
بصيت لصاحبي دة وقولتله هو دة الأب الكاهن اللي بتشتكي منه....!!!!! دة أبونا دة عمل معايا كذا وكذا وكذا.... يمكن أبونا دة مايفتكرنيش دلوقتي لكن أنا لايمكن أنسى القصة دي... وكنت في قمة السعادة إني عرفت إنه مازال على قيد الحياة.... وقريب هاروح أزوره في كنيسته العذراء الوجوه بشبرا وأخد بركته.... أبونا دة إسمه أبونا إستفانوس.... اللي عاوز أقوله من القصة دي إن فيه قديسين عايشين وسطنا وإحنا مش حاسين بقيمتهم.... ناس ملايكة مانعرفش عنهم وعن قداستهم وطهارة قلوبهم حاجة.... خدوا بركة الأباء وإشبعوا من بركتهم لإن صلواتهم سند لينا.....