رسالة لخدام مدارس الاحد

[walaa farouk]

من فضلكم اقعدوا كتير قدام الكتاب واشبعوا بالرب علشان تعرفوا تطعموا البراعم الصغيرة (الاطفال)

2- كلموا الرب عن الاطفال قبل ماتكلموا الاطفال عن الرب
(صلوا للاطفال بالاسم ودة ف المخدع طبعا)

3- لاغني عن المعرفة الكتابيه الصحيحة عشان كدة اتعب، دور،
اقرا وابحث دة كله هاينعكس عليك في حياتك اولاً وجوة مدارس الاحد ثانياً

4- خدمة مدارس الاحد خدمه عظيمه خدها كتكليف من الرب
ومتستهترش بالعيال اللي قدامك دا منهم ناس هاتطلع تشيل الاجتماعات إن تأني الرب في مجيئه

5- انت مش موظف في مدارس الاحد انت بتخدم الرب في الاطفال
فأدي مدارس الاحد اهتمامك واعرف ان الخدمه مكلفة
ففيه تمن هاتدفعة من وقتك مجهودك فلوسك ...

6- خليك ملتزم ومسئول ، التزم بميعادك روح بدري قبل الاطفال
رتب المكان استني الاطفال وياريت لو انتو مجموعة مدارس الاحد
يكون ليكم قعدة صلاة قبل مدارس الاحد عن تجربة ليها اثر حلو جدا

7- اعرف ان الاطفال اذكياء جدا وعنيهم عليك وبيركزوا في حاجات صغيرة عمرك ماتتخيلها !
يعني لو انت عندك 100 طفل يعني 200 عين وعدسة بتصورك
فركز في كلامك تصرفاتك طريقة لبسك طريقة اكلك لو وزعتوا بسكوت مثلا ع الاطفال وبتاكل قدامهم
او لو معاهم في مؤتمر او رحلة .. كلامك مع باقي اخواتك اللي بيخدموا معاك هزارك
... ركز كويس العيال بتتعلم منك بطريقة غير مباشره وهاتقلدك

8- ادخل مدارس الاحد وانت مرتب ومهدف عارف هاتعمل ايه مش زي ماتيجي
اهو ساعة ولا ساعتن وخلاص ! (بالتدابير اعمل حرباً امثال20: 18)

9- الدرس الكتابي هو الاساس وميغنيش عنه اي حاجة بس دة مش معنا ه اني ماعملش غير كدة
لا نوّع وقدم فقرات جميلة تناسب الاطفال يعني ممكن تتجمعوا تاني بعد الفصول
وتعملوا فقره تانيه كل اسبوع علي حسب ترتيبكم زي العاب ،
قصة مسلسله ، مسابقات محفوظات ، فيديو يسمعوه يكون ليه هدف
وتكون انت سمعته قبل ماتقدمة بس دا كلة بعد الدرس الكتابي

10- جهز فقراتك وايه اللي عايز الاولاد يتعلموه النهاردة وخلي الفقرات متنوعة
علشان الطفل مايملش منك ومايزهقش من مدارس الاحد
ودة باستخدام ابسط الامكانيات اللي عندك واللي متاحه ليك

11- من فضلك اوعي تدخل مدارس الاحد وانت مش محضر الدرس اصلا
او مش محضره كويس لو معلومه اتقالت غلط هاتلزق ف دماغ العيال
فمن فضلك اجهز الاول حضر كويس اهضم الكلام المكتوب
وادي عصارته للاطفال لان مش كل المعلومات والالفاظ الكتابيه اللي في الدرس
هاتديها للاطفال زي ماهيا كدة بسط الكلام واهضمه انت الاول علشان تعرف تقدمه

12- بلاش تجود في الدرس الكتابي يعني مثلا قصة ما اتذكرش فيها اسم الشخص
بلاش تخترع انت الاسم وبرضوا ماتقولش حاجات مجاتش في القصة
التزم بالنص الكتابي بس وقدمه بطريقة شيقة مبسطه !
ده بس بعد ماتكون حضرته وفهمته كويس عشاان الكلام بيلزق في ذهن العيل

13_ حب الاطفال محبه عمليه من قلبك محبتك دي هاتوصلهم مباشرة
من غير ماتتكلم بس افعالك ردود فعلك هاتوصّل انت بتحب العيال دي ولا انت بتقضي وقت وخلاص

14- لو طفل او طفلة شقي وحركتة كتير وبيعمل دوشه صليلة واظهر ناحيتة مشاعر حب حقيقيه لانه دة حد يعتمد علية وعندة طاقة بس حضرتك اتعب واوصلة ووظف طاقتة صح

15- اوعي وإياك تقول لطفل لو عملت كذا(لو اتكلمت او لو مركزتش)
انا هاطردك بره او يالا روح روح لانه لو روح وطلع بره هايلاقي الف ايد خدته بعيد
وممكن يرجع بعد سنين انسان كاره للكنيسه وللرب وتبقي انت وانا السبب

16- اوعي تميز بين طفل وطفل او تحابي طفل عشان ابن فلان
وتميزه في الاهتمام كدة هاتخسر باقي الاطفال لان العيال بتغير من بعضيها
خليك حريص وامين ف الموضوع ده وبلاش الله يخليك حكاية الطفل المثالي
دي بتعمل حساسية وعقد ومشاكل للعيال واسالني انا علي كدة هاحكيلك

17- زي ماقلتلك انك هاتتكلف مش بس مجهود ووقت.. لكن كمان فلوس! ايوة فلوس مدارس الاحد بتكلف فلوس للهدايا وللحلويات و... ممكن تعملوا نظام تبرع شهري ثابت بينكم كخدام علشان كمان تتعلموا انتو العطاء خاصة لو معاكم حد لسه بيتعلم وشاركوا اجتماعكم المحلي بالاحتياجات الماديه كمان

18- نشط مدارس الاحد بهدايا كل فتره كل شهرين او تلاته مثلا هدايا بسيطه عمليه تنفع الطفل وتشجعة علي الحضور

19- في وقت مدارس الاحد اعمل تنشيط للعيال مثلا (درجات اليوم) مثلاً كل ترنيمة ادي درجة للاولاد ودرجة للبنات هاتلاقيهم رنموا معاك وانت كدة واخد انتباههم وكمان ع الهدوء وعلي النظام . بس خلي بالك انت بتنشطهم مش بتهيجهم يعني لو انت قلت الدرجة من 100متديش البنات مثلا 100 والاولاد 20! كدة هايحبطوا وممكن يشوشروا عليك لا عادل الموضوع وخلي نسبة تنافس بسيطة وممكن تكتب الدرجات دي عندك في كشكول وتخلي عليها هدايا بسيطة كل كام شهر هاتلاقي العيال مركزه ومستنية مين اللي هايفوز بالدرجات وانت المستفيد ف الآخر بهدوءهم وتركيزهم

20- احرص انك تلم عطاء كل مره بتعمل فيها مدارس الاحد مش علشان تسد الامور المالية
لا كمان عشان العيال تتعلم من صغرها انها تعطي وياريت احنا كخدام نحط عطا قدام العيال
لاننا قدوة ليهم عشان كدة خلي وقت العطا وقت هادي وفهمهم اننا بنحط لربنا
وان دي ذبيحة لربنا فنقدمها واحنا هاديين وبنحترم الرب

21- اعمل زيارات للبيوت خاصة بالاطفال واسال عليهم خاصة اللي مبيحضروش خالص
او اللي غيبوا لما تخبط ع البيت ويعرفوا انك جاي عشان الطفل
هاتفرق قوي مع البيت ومع الاطفال ويمكن دي تكون بداية احترام الاب والام لطفلهم
والطفل يحس انة مهم كل اسبوع خدلك لفه كدة اسال وزور وابقي شاركني بالنتيجة كانت ايه

22- من فضلكم كخدام مدارس الاحد احضروا الاجتماعات العامة باجتماعكم المحلي اولاً لاننا مش منفصلين عن الكنيسه المحليه لا دا احنا جزء منها وبنخدم الاطفال دول علشان يكونوا ملك للرب ويشيلوا الاجتماع وهما يكونوا الاجتماع بكرة وبعدوا إن تأني الرب ثانياً علشان الاطفال يعملوا زينا ودي بركة للبيوت وللاطفال ولينا وللاجتماع

23- الهدف الوحيد من ورا دا كله ان الاطفال دول يكونوا ملك للرب مش لاي حد تاني
فصلي لاجلهم واهتم بيهم واوعي تكون رؤيتك وهدفك حاجة غير كدة

24- ماتخافش الموضوع مش صعب الموضوع سهل جدا لو انت معتمد ع الرب
، الرب هايديك سندة وهايشجعك وهايديك افكار لكل حاجة انت عايز تقدمها
او بتفكر انك تعملها بس لما تكون قاعد قدامة

25- ثق ان الرب بيقّدر وعارف تعبك ووقتك اللي ضيعتة ومجهودك وصحتك وفلوسك
وكل حاجة انت اتكلفتها علشان وعلشان عمله واعرف ان الرب هايكافئك بحسب غناة في المجد

26- ماتفشلش لو محدش قدرك او شكرك او ... من الناس او حتي المخدومين نفسهم
او اخواتك اللي بتخدم معاهم خلي عينك ع الرب وهو هايسندك ولو وقعت او ....
روح للرب هايشجعك (غلاطية 6: 9)

27- اخواتي ابتعدوا عن المشاجرات والافتخارات والتحزبات
وكل واحد عايز يقول ان رايه هو الصح دة نتيجة الجسد اللي اشتغل نتيجة عدم
قربنا للرب يالا اجري اقعد قدامة وتوب ده لخيرك ولبركة اخواتك والاطفال ولبركتك الشخصية

28- في رايي اهم خدمة واهم خدام هي خدمة مدارس الاحد وخدام مدارس الاحد
لانهم بياخدوا النشء الصغير وبيعلموه علشان كدة في كنايسنا بلاش نتسرع
ونضم اي حد وخلاص بحجه انه يتعلم ! ع الاقل يكون مؤمن مختبر الرب
وعنده حق كتابي وبلاش نسيب مدارس الاحد كده ونقول دول شوية عيال
اي حد هايديهم القصة هي مدارس الاحد مش قصة وخلاص دا تعليم وتنشئة ....

الرب يبارككم..

[Mary Naeem]

مشاركة جميلة جدا
ربنا يبارك حياتك

[walaa farouk]

ميرسى على مرورك الغالى