البابا تواضروس الثاني الاتكال الخاطيء وهو الاتكال على البشر

[Mary Naeem]

البابا تواضروس الثاني



الاتكال الخاطيء وهو الاتكال على البشر، "الاحتماء بالرب خير من التوكل على إنسان. الاحتماء بالرب خير من التوكل على الرؤساء". (مز 118: 8 - 9) وده بيفكرنا بالآية "اسم الرب برج حصين" اسم الرب زى الحصن الكبير اللى الإنسان بيحتمى فيه، زى الصلاة القصيرة فى التقاليد الكنسية "ياربى يسوع المسيح ارحمنى أنا الخاطى" لأن بمجرد ذكر اسم الرب بيكون حصن حوالين الإنسان، علامة الصليب تكون حصن حوالين الإنسان، وهى وسيلة للاتكال عليه.
الاتكال على البشر هو إن الإنسان تغافل على إن الله له دخل فى الأمور وأنه هو اللى بيرتبها "وأن كل الأشياء تعمل معا للخير للذين يحبون الله" هو مستبعد ربنا من القصة.
أرميا النبى بيقول "«هكذا قال الرب: ملعون الرجل الذى يتكل على الإنسان، ويجعل البشر ذراعه، وعن الرب يحيد قلبه". (ار 5: 17)
خد بالك أحيانا يكون الواحد عنده عمل وبعدين بقول إن ربنا هو اللى سهله العمل بطريقة لما تكن على البال.
مثال للناس اللى بتتكل على البشر: يوسف إخواته باعوه، ويوسف قال لرئيس السقاة "سوف يردك فرعون إلى مقامك وحينما يصير لك خير تصنع إلي إحسانا وتذكرنى لفرعون وتخرجنى من هذا البيت" يوسف اعتمد على رئيس السقاة ومع ذلك لم يذكره رئيس السقاة بل نسيه، وبالصورة دى يوضح لنا إن يوسف فى ضعفه اتكل على إنسان، فى حين إن الله له وقت "لكل شيء تحت السماوات وقت" وقت معين الله يستخدمه فيه.
مثال آخر موسى وفرعون فى التاريخ، فرعون كان عنده مجموعة كبيرة من السحرة والعرفاء اللى بيستشيرهم فى الضربات واستطاع إن السحرة يعملوا زى موسى وهارون فى الضربة الأولى عند تحويل المياه إلى دم، وفى الضربة الثانية ضربة الضفادع لما البلد امتلأت بالضفادع، والضربة الثالثة ضربة البعوض لم يستطيعوا فعل شيء، فوقفوا لفرعون وقالوا له "هذا أصبع الله" يعنى دى حاجة خارجة عن قوتنا وفهمنا ومعرفتنا، واستمرت الضربات لحد ما فرعون سمح لهم بالخروج بعد أن خذله السحرة والعرفاء وانتهت حياته وجيشه بالغرق فى البحر.
أول درس من دروس الحكمة الجميلة اجعل اتكالك دائما على ربنا وافعل الخير، اتكل على ربنا وكن أمينا فى عملك وربنا هو مجرى طريقك.