نصايح شبابيه كل يوم (متجدده)

[Rena Jesus]

الحياة اختيارات
كل اختيار ليه مميزاته وعيوبه
عشان كدا عيش اختياراتك انت ..عشان تستمع بمميزاتها وتواجه عيوبها
لو عشت اختيارات اللي حواليك هتبقي كاره حتي المميزات وعايش ف عالم موازي ..
عايش فيه اختياراتك

[Rena Jesus]

دروس السنة دي :

- الحاجز اللي بيتبني في فترة الخصام عُمره ما بيتهد.
- محدش يستاهل فرصة تانية.
- انت ممكن تبقي مُمَيز لكن مالكش لازمة
- أُوعى ماتلاقيش اللي تحبه ف تحب اللي تلاقيه
- لو مش هتعشق ماتحبش
- فيه وقت هتلاقى نفسك لا إرادياً بتعمل حاجات كنت بتنتقدها ، عادي انت اتغيرت انت مش مهزأ و مالكش كلمة ولا حاجة
- أول ما تبدأ في المشي ، الطريق هيبان ، المهم تبدأ ..
- السمك الميت بس هو اللي بيمشي مع التيار و الحي بيختار طريقه ..
- ماتمشيش جمب الحيط لأن اللي عملوا كدة من كتر الخوف خرموا الحيط و مشيوا فيها.
- ماتتمناش تكون زي بطل فيلم عشان هو قصة مكتوبة مصممة انها تعجب كل الناس
- متقولش نكتة اتقالت قبل كده
- لو بتعدي الشارع سيب العربية تخبطك بس مترجعش الرصيف تاني
- علي قدر العشم يأتي الألم
- عايز تخسر حد ، حِبُّه.
- روق علي حالك هتكسب كل حاجة ..
- إتجوز السينما و القراية و المزيكا و الحرية
- أنجح العلاقات أخفاها
- ملخص علاقات الحب انك مابتحبش لما بتختار و مابتختارش لما بتحب
- اترمي في الدنيا ، هتساعك و هتشيلك و هتنسيك كل اللي نفسك تنساه ، و عمرها ما هتعاتبك و تقوللك انت كنت فين و لسه فاكر تجيلي.
- احنا مع القضاء والقدر لما بنتولد ولما نحب ولما نموت.
- انت صعب جداً تلاقي توأم روحك بس الأصعب انك تحافظ عليه لما تلاقيه ،لأنه مرايه و نسخة منك ف كل حاجة - ماتمشيش تدلدق ف روحك ورا حد ، أياً كان مين.
- مش كل غني حرامي
- مش كل فقير محترم
- مش كل عربية بي إم جواها واحد فرحان
- مش كل ماركة شيك
- مش كل حاجة غالية حلوة
- مش كل حاجة لايقة علي غيرك حلوة عليك
- مش كل صورة بتعبر عن الحقيقة
- مش كل ضحكة وراها فرحة
- و مش كل ضحكة بتخبي حُزن
- مش كل مهندس ذكي
- مش كل حاجة عينك تشوفها حقيقة
- الناس اللي محل ثقة ف حياتك مكتوبين ف شهادة ميلادك ف خانة الأب و الأم
- نفسك تزود يبقي أقاربك من الدرجة الأولي : أخ / أخت / زوج / زوجة
- غير كدة ، انا فاتح محل ثقة في التجمع تعالي زورني
- ما تتخدعش بالمظاهر ، هدوء المقابر مش معناه ان كل الناس في الجنة
- ماتصدقش شاعر
- Try to think outside the "بؤس" !
- ماتسرقش حد من حياته لو مش ناوي تحافظ عليه.
- حاول تحافظ علي حلاوة البداية أطول فترة ممكنة
- فَرَّق بين العَشم و الحق عشان لا العشم يجرحك ولا تفرط ف حقك
- الخيبة أهون ١٠٠ مرة من الإهانة
- فكر و ماتمشيش ورا القطيع ، الكثرة مش دليل علي صحة المنهج
- اياك تكون ف مكان أو ف علاقة واحد علي اليمين و ترضي ترجع صفر عالشمال.
- لو اتعلمت ف يوم الانسحاب ، هتبقي عادة
- كلام الناس كله غلط ، أياً كان صح ولا غلط زيهم زي الدجالين ، كذبوا لو صدقوا
- ربك ، أهلك ، صحابك ، باقة موبايلك ، أهم 4 حاجات ف حياتك غير كده شكليات
- مافيش حاجة اسمها Forever , ما دايم إلا وجه الله
- الحرام قبل العيب و رَبَّك قبل الناس

[Rena Jesus]

كل حاجة هتتغير للأحسن لما تبدأ تتعامل مع الناس علي انهم إضافة لحياتك ( باستثناء أهلك طبعا ) ..
كل الناس وجودهم إضافة علي حياتك .. اصحابك .. زمايلك .. جيرانك ..
يعني وجودهم لازم يضيف لحياتك كل حاجة حلوة ..
لازم يكون بيهون عليك الدنيا مش بيتعبك أكتر

الناس اللي في حياتك لازم يكونوا سبب في نجاحك و معافرتك و قوتك إنك تكمل ..
يكونوا بيفرحوك و بيشدوك لما تغلط .. بيتمنولك الخير و بيخافوا عليك ..
بيقفوا جنبك لما تحتاجهم و بيسندوك بوجودهم لما يبقي الكلام مالوش معني ...
عشان كدة لازم تختار الناس اللي هيكونوا إضافة لحياتك بدقة ..
متخليش حد وجوده بيحبطك و كلامه بيضايقك و هزاره بييجي علي كرامتك موجود في حياتك ..
متسيبش حد يدخل حياتك و يبقي جزء منها بالعافية ..

بداية الراحة النفسية و الجسدية إنك تكون مؤمن إن مفيش أي حد مهما كان مين يستاهل إنك تسمحله يكون إضافة مؤذية لحياتك ..
الناس لو مش هيكونوا إضافة جميلة لحياتك ..
يبقي الأفضل ميكونوش في حياتك خالص ☺️
ربنا يجعل وجودنا إضافة مميزة لحياة الناس اللي نعرفهم