كنزك فى ولادك ...........

[Rena Jesus]

القيمة رقم (20)



في مقولة بتقول
"الأطفال لن يتذكروا نصائح والديهم ولا الأشياء التي فعلوها لأجلهم،
و لكنهم سيتذكرون الذكريات الجميلة التي قضوها بصحبتكم"

لو عايزة ولادك يفضلوا سندك لحد ما يكبروا حددي كل يوم 15-20 دقيقة تلعبي فيها مع ولادك و بس.
اتمشوا في الجنينة، لونوا سوا، احكولهم حواديت. .
شوفي ايه الحاجات اللي بيحبوها ولادك و اعملوها سوا.
خليكم اصدقاء، عشان يقبلوا النصح بسهولة و يشيلوكوا العمر كله اما تكبروا.

بلاش تقولي هجيب وقت منين؟؟؟
هي تلت ساعة في اليوم تقربي فيها من ولادك و تفرحيهم
و صدقيني هتكوني زي اللي بتحط فلوسها في بنك و تستثمرها عشان تبقى سندها في وقت الاحتياج.
بس ده مش أي استثمار!
ده أغلى استثمارك لولادك حبايبك

[Rena Jesus]

القيمة رقم (21)




ازاي اخلي ولادي مؤدبين و كلاس و ولاد ناس و ميفضحونيش في الزيارات المهمة؟

اولا.... خلينا متفقين على حاجة،
اداب المائدة دي مفروض تكون ستايل لحياتك مش وقت الزيارات و المناسبات بس.
و طبعا هتبتدي تعلميها لهم في البيت الأول، ازاي؟
هتقعدوا تاكلوا سوا و تظبتي الطاولة بطريقة شيك اوي و بعدين هتلعبوا لعبة انهم ملوك و أمراء عايشين في قصر و انت و جوزك معزومين عندهم،
و هيتصرفوا بأدب و لباقة حسب مركزهم و احتمال تلاقيهم عارفين اداب اكتر منك من الكرتون و القصص.
هتفضلي تناديهم بالأميرة كذا و الأمير كذا بشكل كوميدي محترم
(ما انتي لازم تلعبي معاهم التربية اساسها اللعب)

ثانيا .... كلمة شكرا و ميرسي لازم تكون على لسانك طول الوقت مع جوزك و ولادك
(اعرف واحدة كانت بتبالغ اوي في الشكر و كلمة تسلم ايدك في الزيارات -حتى لو قرايب من الدرجة الأولى- و ولادها كانوا نسخة منها في الأدب)
لو نسيوا يشكروا او يستأذنوا بلاش تطوع و تتكلمي بدلهم،
بابتسامة لطيفة كده قوليلهم "مش عايز تقول لطنط حاجة الأول؟"
و ده مش شيء محرج خالص بالعكس
الناس هتحترم فيكي اصرارك على تأديب ولادك طول الوقت.

[Rena Jesus]

القيمة رقم(22)

ابني معتمد عليا في كل حاجة...
ابني بطيء التعلم..
ابني مش مرتب و مش متحمل مسؤولية نفسه!

ازاي اعلم ابني المسؤولية و الثقة في مهاراته من و هو صغير؟
طيب مبدأيا كده حاولي تقاومي الرغبة
في انك تساعديه يعمل حاجة جديدة عليه.
مثلا و هو بيتعلم يلبس هدومه بلاش تمسكيله الكم و تكون ايدك في ايده.

افضلي شجعي كل خطوة
بيعملها و امدحي مجهوده مش النتيجة النهائية.
النهاردة عرفت تطقم الشرابات لوحدك، برافو عليك!

اتخلصي من المثالية..
مش لازم كل حاجة تبقى مظبوطة مية في المية -بالذات لو مش هتخرجوا تقابلوا حد-

خليكي صبورة جداااا
معاه و احترمي الفروق الفردية في كل حاجة
(ابنك اللي بيعرف يلبس لوحده ملوش دعوه باللي بيعرف يكنس اوضته و هو في نفس السن)

[Rena Jesus]

القيمة رقم (23)





ابني خواف و بيترعب من أي موقف أو تحدي جديد! أعمل ايه؟؟
1- بلاش توصفي قلق ابنك و خوفه بأي صفة زي انه جبان أو قلوق،
ده بيثبت عنده الاحساس بالعجز و بيخليه رافض فكرة انه يتغير.

2- بلاش تقوليله "مفيش حاجة تخوف!"
أو "دي حاجة بسيطة مش مستاهلة القلق ده كله"
لأن القلق من وجهة نظر الطفل كبير و حقيقي و لا يدعوا للاستهوان لأنه هيحس بالخوف اكتر.

3-بلاش تلجأي للتحاليل المنطقية و الشرح العملي!
ده مش الوقت المناسب للمنطق خالص و الطفل مش هيقبل اي نوع من النصح وقت ما هو قلقان.

طيب أعمل ايه؟؟؟
بصي لابنك و امسكي ايده و حسسيه انك فاهماه.
"انت قلقان عشان اول مرة نيجي المكان ده، انا حاسة بيك"
افتكري موقف انتي شخصيا" كنتي قلقانة منه زي امتحان القبول مثلا".

قولي لابنك انك هتكوني قريبة لو احتاج اي حاجة و اما يبدأ يتطمن اسأليه تحب نعمل ايه عشان تحس بالراحة في الموقف ده؟ و ساعديه بالاقتراحات.
اهم حاجة التعاطف مع مشاعره و عدم السخرية منها لأن ده اول الخيط اللي هيمكنك من حل باقي المشكلات.

[Rena Jesus]

القيمة رقم(24)




كل مرة بتروحي فيها شوبنج بتقلب مأساة و بيشبط ابنك في حاجات غريبة؟

الموضوع اسهل من اللي انتي متخيلاه بكتير!
قبل ما تروحي السوبر ماركيت اكتبي لائحة بالحاجات اللي انتي محتاجة تشتريها و خدي رأيه في الطلبات و أسأليه محتاجين ايه كمان؟
و لو قاللك شوكولاتة مثلا اكتبيها مفيش مانع لو معندوش واحدة.
(و ده هيساعده يفهم احنا نازلين ليه و هيساعدك انتي كمان في ميزانية البيت)
و انت في السوبر ماركيت خليه يساعدك في انه يجيب الطلبات و يدور عليها معاكي و اشغليه بدور سهل و مهم بدل ما يزق العربية بملل.

طب لو شبط في حاجة بقى اعمل ايه؟؟
قوليله انا عارفة انك بتحب (العصير ده مثلا")و نفسك فيه لكن هو مش مكتوب عندي في الورقة.
و يكون معاكي قلم و تقومي تسجلي على طول -يوسف عايز عصير فواكه-
و تقوليله انا كتبتها للمرة الجاية من غير ما تحددي امتى ولا فين المرة الجاية دي.

فهم طلبات الطفل و التعامل معاه باحترام و تفاعل هيجنبك صريخ و قمص و فيلم الأكشن بتاع كله مرة تروحوا فيها شوبنج.

[Rena Jesus]

القيمة رقم (25)




انتشرت في الفترة اللي فاتت فكرة قوانين البيت واللي الأباء والأمهات بقوا بيتفقوا عليها سوا ويعلقوها في مكان واضح في البيت عشان الكل يلتزم بيها.

لكن احب اوضح ان التعليمات لازم تبقى اكبر بكتير من مجرد اوامر و نواهي.
حاولي تدخلي فيها قوانين محببة و بسيطة و سهلة في التنفيذ و تحث على المرح و التحفيز. زي مثلا:
1- احلم حلم كبير و ما تيأسش و انت بتنفذه.
2- حاول دايما تفرح الناس اللي معاك في البيت.
3- عبر عن مشاعرك بوضوح و اتكلم عن احاسيسك بالظبط.
4- متزعلش لو غلطت، الكل هنا بيحبك و عايز سعادتك.
5- ساعدنا اننا نروح السما كلنا مع بعض.

[Rena Jesus]

القيمة رقم (26)




ابني مش واثق بنفسه و مش بيدافع عن نفسه مع اني بشجعه على طول و بمدحه كتير! اعمل ايه؟

حتى لو قلتي شعر في ابنك مش هيصدقك عارفة ليه؟
عشان اسلوبك في المديح غلط.

بدل ما تقوليله "انت ذكي" و يرد يقولك "انا لا ذكي ولا حاجة"...
قوليله "برافو انك رسمت صورة تفكرك بالدرس، ده كان تصرف ذكي منك"

و استغلي اي موقف و شجعيه فيه و اما يحس بالاحباط فكريه
"فاكر اما فضلت مع اختك الصغيرة مع ان كان نفسك تلعب مع صحابك اما انا خرجت اشتري حاجة؟ ده كان تصرف مسؤول منك"

و خليه يسمعك بتتكلمي عن انجازاته في التيليفون مع مامتك او اصحابك
"أبنى كان شجاع اوي النهاردة عند الدكتور واستحمل الحقنة مع انها وجعته شوية"
و خليه يقفشك كأنك بتتكلمي من وراه و اوعي تتكلمي عنه بالسوء ابدا و تحسسيه بأن ناقصه حاجة،
هو كل اللي محتاجة دعم و حب أكتر منك.

[Rena Jesus]

القيمة رقم (27)



بتنفعل قدام ولادك غصب عنك و بتفقد اعصابك بعدين ترجع تندم؟ طب ايه الحل؟؟؟

طبعا لازم في الأول انك تهدى خالص عشان تكون اقدر على انك تاخد قرار اصح.
الموضوع محتاج تدريب لأنه مش هيجي من أول مرة.
بدل ما تسأل ابنك "ازاي تعمل كده" قوله " ليه بتعمل كده؟" ده بيديه و بيديك وقت للتفكير و الهدوء.
افتكر دايما ان ولادك زي السفنجة بيمتصوا منك التسرع و العصبية و الانفعال و ممكن يفعلوا الصفات دي في وقت و ظرف غلط لأنهم بطبعهم لسه خام و بيتصرفوا بالفطرة.

في طريقة لطيفة كانت بتعملها واحدة من الأمهات و هي انها تحط نفسها في موقف كأنها متراقبة من امهات تانيين عايزين يتعلموا منها و شايفنها مثل أعلى.
فكل سلوك بتعمله مع ولادها بتسأل نفسها الأول
"هل أحب ان باقي الأمهات يشوفوني على الحال ده؟" و تراجع نفسها بسرعة.

[Rena Jesus]

القيمة رقم (28) والأخيره

ايه اهم المهارات الحياتية اللي لازم اعلمها لأبني عشان اضمن انه يكون مسؤول و واثق بنفسه؟
1- التواصل الاجتماعي و الحفاظ على الأصدقاء
2- التعاطف مع غيره و مساعدتهم
3- تحديد القيم و المبادئ و الدفاع عن نفسه
4- تقدير ذاته و احترام وجهات النظر المختلفة
5- تحديد الأهداف و تدبير المال
6- تحديد الأولويات و القدرة على الاقناع
7- اتخاذ القرار و المرونة و الاصرار
8- المشاركة و التأثير الفعال في المجتمع
9- اكتشاف مواهبه و مميزاته و تنميتها
10- مهارات الدراسة الفعالة.

[Rena Jesus]

دلوقتى هنتكلم مع بعض عن الأساليب الغلط اللى بنستعملها فى تربية اولادنا
__________________________

التضييق

كثير من الاباء والامهات يرون ابنائهم عبارة عن اشياء تخضع فقط لمبدأ افعل ولا تفعل.
فالولد او البنت وفقا لأولئك الآباء والأمهات محكوم بروتين حياتي يومي ثابت ...
وكلما وقع خطأ... لماذا أخطأت؟
وكلما خشي الأب او الام وقوع خطأ بادروا بالتكرار..
افعل كذا... لا تفعل كذا...

لا يمكن لأبناء كهؤلاء ان ينمو نمو سليم.
الابناء في البيت المغلق بحاجة الى قدر كاف من الحرية.
الحرية تشعرهم بالارتياح. الحرية تعلمهم المسؤولية.
التضييق لا يعلمهم المسؤولية ابداً بل يعلمهم الاتكالية.

التضييق على الابناء في البيت ينتج لنا ابناء عسكريين.
الجندي في الجيش وفقاً للتقاليد والأحكام العسكرية المعروفة في العالم وفي التاريخ هو بمثابة إنسان آلي بمفاهيم اليوم.
استدر يميناً يستدر استدر يساراً يستدر. سر للأمام يسير للأمام.
هذا الجندي خارج الثكنة العسكرية قد يكون انسان وليس روبوت مع انه قد يختلف عن الفئات الاخرى في المجتمع لأن التقاليد العسكرية تحجم كثيراً من حرية العقل في مواصلة طريق التفكير المنطقي ولكن ليس موضوعنا عن العسكريين.

فالأبناء المضيق عليهم في بيوتهم والذين لا يشعرون بأنهم على قدر جيد من الحرية في البيت هم تتم تربيتهم وفق التقاليد العسكرية فتنتج لنا عقول اتكالية غير مفكرة وتنتج لنا شخصيات اما مهزوزة او شخصيات لا تستطيع ان تتحمل المسؤولية.

يظن بعض الاباء والامهات ان القوانين الصارمة في البيت هي القوانين التي تؤدي الى خلق شخصيات ملتزمة وغير مستهترة.