تفتكروا دة حب ولا اهانة ؟؟؟؟

[sama smsma]

مش عارفة انا اول ما شوفت الصور قدامى
شوفتها من ناحية تانية خالص غير ما لقيت الناس عمالة تشتم فيها
مش عارفة صح ولا غلط
شوفتها اننا مش لازم ندينها
مادام تصرف مش يأذينى انا شخصيا يبقى انا ماليش حق ادينها واقولها دة غلط ودة صح
هى ماقلعتش هدومها
دى غسلت رجل زوجها وقدمت اتضاع ومحبة وعدم كبرياء
دى حياتها الشخصية هى و زوجها هما احرار مع بعض قدام الناس او فى بيتهم
يتصرفوا زى ما هما شايفين مادام ماعملتش حاجة لا تليق ببنت المسيح
هى شايفة انها بتقدم محبة كبيرة واتضاع ودة فعلا زى ماعلمنا المسيح
الا بقى نكون بنعتبر اللى عمله المسيح لما غسل ارجل التلاميذ اهانة
لان المسيح لما عمل كدة علمنا الاتضاع
وعلم الكهنة يغسلوا ارجل الشعب
يعنى لو قولنا اهانة يعنى بنهين المسيح ايضا
كل واحد بطريقه تفكيرة بقى يعنى شايفة انها بسيطة وعملت كدة من بساطتها ومحبتها
و ربنا اللى عارف بالنيات مش احنا يعنى ماقدرش احكم عليها

طيب السؤال هما ليه عملوا كدة قدام الناس
والناس زعلت وقالت انها اهانة للمرأة
مافيش اهانة بين الزوج وزوجته لانهم جسد واحد
وهى ممكن تكون بتوصل رساله محبة واتضاع واحترام
ليه ناخد الوحش ونسيب الحلو

[اوفا]

بصى يا رينا هى من حقها تعبر عن حبها دا يعنى لو لحقت تروح
معاه مطلقوش يعنى هههههههههههههههههههههه
بس مش فى يوم زى دا المفروض يوم فرحها بتبقى
هى الملكة مش الشغالة اللى جايبها للملكة يا اختى ههههههههههه
بس دا رأى بجد بعيد عن الهزار

[magdy-f]

على فكرة الصورة دى فى البيت لما روحوا
وده تواضع وحب من الزوجة
يَنْبَغيْ أَنْ تَخضَعَ الزّوجَاتُ لأَِزوَاجِهِنَّ فِي كُلِّ شَيءٍ، كَمَا تَخضَعُ الكَنِيسَةُ لِلمَسِيحِ..

[Rena Jesus]

طبعا كل واحد ليه رأى مختلف فى اللى شايفها اهانه وفى اللى شايفها حب طبعا الكلام ده كله صح جدا
بس الفكره كلها فى اعلان ده مش اكتر من كده
ميرسى لرأيكم جداااااااااااا كل واحد بيشوف طريقه للحب من وجهه نظره وانا هنزلكم دلوقتى الأراء اللى اتكتبت على الفيس

[Rena Jesus]

كتبت احدي المعلقين تعليق كتبت فيه
"متزعلوش منى بصراحة دى إهانة وإذلال،الست ممكن تغسل رجل زوجها برضاها بينها وبينه فى بيتهم لما تحس أنه جاى من الشغل مرهق لكن فى ليلة فرحها وقدام الكل"، وأكملت موجهة كلامها للعروسة" قابلى بقى ياعروسة المعاملة اللى بعد كده".

وعبرت اخري عن رأيها
"صدقينى مش بغسل الرجلين نهائى،سى السيد مراته كانت بتغسله رجله وكان بيخونها عادى، المحبة الحقيقة أفعال حقيقية ستظهر فى حياتكم وأفعالكم مع بعض بعدين، أنا عارفة أنه كان فى نيتك تعملى حاجة حلوة بس أسأتى أختيار الفكرة جدا والمنظر خارج المألوف تماما".

فيما وجدت المتابعين أن ذلك يعتبر نوعا من أنواع التعبير عن الحب وكتبت
"مسلمة أو مسيحية طاعة الزوج من طاعة ربنا هى حرة فى تعبيرها عن حبها لزوجها فى أى وقت وأى مكان وليس من حق أحد ان ينتقدها"، واستكملت "ربنا يباركلهم فى حياتهم وده مش ذل ولا حاجة ده نوع من أنواع الحب والرحمة ولو هو مايستهلش المعاملة دى وأكثر ماكنتش أتصرفت كده هو اللى وصلها للمرحلة دى من العطاء وحبها له".

فيما وجد البعض أن العروسة قامت بذلك متمثلة بالسيد المسيح حيث قام بغسل أرجل التلاميذ للتعبير عن الحب والتواضع.
فكتب المصور الذى قام بتصوير الصور وهو المصور "جورج أديب"
" مارينا قدمت أجمل رمز للحب والبذل ركعت على الأرض مثل سيدها وهى بكامل زينتها وبهائها لتغسل أرجل عريسها، أول مرة أصور عروسة بتقدم المعنى ده من الحب، وواثق أن رومانى بيبادلك نفس القوة فى المحبة ربنا يسعدكم ويبارك فى بيتكم".

واختلفت احداهما مع رأى المصور الذى وجد مافعلته العروسة مشابها لما فعله السيد المسيح بغسل أرجل التلاميذ وكتبت معلقة على الصور
"اللي عايزة أقولهولك عايزين فعلا أنتوا الاتنين تطبقوا ما فعله المسيح مع تلاميذه لما غسل رجليهم، طب كويس المفروض بقي اللي يقوم بفعل المسيح هو الراجل، يعنی زی ما المسيح غسل أرجل تلاميذه،فالمفروض العريس يغسل رجلين عروسته،لأن من المعروف طقسيا وكنسيا إن لما يحبوا يشبهوا علاقه الزوج بزوجته فى المحبة والتضحية بيشبها بالمسيح والكنيسة اللى فيها المسيح ضحی بنفسه عشانها صح ولا لا".

[كيلارا]

كل واحد بيشوف حسب نظرته للأمور
انا فى نظرى هى عملت كدة ببساطة وبحب
ميرسى على الموضوع الجميل يارينا

[سانام]

دا حب مش اهانة

[Rena Jesus]

ميرسى على رأيكم الغالى

[sama smsma]

دة كان لقاء معاها على اليوم السابع



والصور دى فى البيت مش فى الفرح

عروسة جسر السويس :

أنا مش "أمينة"وغسلت رجل عريسى حباً فيه







أنا مش أمينة وعملت كده علشان بحبه، ورومانى هوعمرى اللى بدأ من 16 سنة".. بهذه الكلمات كشفت مارينا عروس جسر السويس التى أثارت صورها الجدل على صفحات التواصل الاجتماعى، عن سبب هذه الصور وقناعتها بما تفعله.
قالت مارينا رضا التى تبلغ من العمر 26 عاما خريجة كلة تربية نوعية قسم فنى:"أنا عملت كده علشان رومانى حبيبى ، وهافضل أعمل كده لأخر يوم فى عمرى ، أنا زى اى بنت حبت من قلبها وبعد مشوار من العذاب والتعب والبعد والقرب ارتبطت باللى بتحبه وبتحلم بيه"..
وأضافت "لحظة ماعرفت رومانى قلبى قالى هو ده اللى بتحلمى به ، وقلبى دق وفرحت اوى وعلاقتنا كانت مجرد صداقة فى الاول وبعد كده اتولد اجمل قصه حب، ليه بقى الناس بتنتقد الحب" .
ووجهت مارينا رساله لكل منتقديها على صفحات التواصل الاجتماعى :"ده حب مش المقصود به شو اعلامى أو تقليل من دور المرأة المصرية ، أمينة مرات سي السيد فى الفيلم، زمان كانت بتعمل كده حب مش ضعف ولا قهر ، افهموا يعنى إيه حب" .
أما العريس رومانى جميل بدأ حديثه "أنا كراجل مش مكسوف أنى أغسل لزوجتى رجليها ،بعد تعب يوم طويل فى العمل، الحب الحقيقي عمره ما يقلل من صاحبه أبداً ، ومارينا تستاهل كل خير أنا بحبها وبادعيلها ربنا يخليها ليا" .

[ماريا تى ثيؤتوكوس]

لو هو حب ايه لازمة الصور والشو اللى اتعمل
الحب مواقف افعال مش صور
وليلة الفرح كمان
هى شبهة نفسها بالمسيح
ييقى كان لازم هو كمان يغسل رجلها

عجببنى تعليق مارى:d