وجبـــــــة روحيـــــ(†)ــــــــــة يوميـــــــــة

[Mary Naeem]

كنت فى كافيه امبارح مع واحد زميلى فا الكافيه فيه ركن كدا مراجيح للعيال الصغيره اللى جايه مع اهاليها ، فا لفت نظرى طفل عمره حوالى سنتين قاعد على المرجيحه ورافض ابوه يزقه وعاوز يعتمد على نفسه ، فا ابوه سابه ووقف وراه ..
بص على الولد لقاه بيحاول يزق نفس مش قادر ، مره واتنين وتلاته بردو مش قادر ، فا ابوه بقى يزقه كدا بطرف رجله من تحت من غير ما يحس ، اول ما الولد شاف المرجيحه اشتغلت بص لابوه وهو فرحان فيما معناه يعنى ، شوفت شغلتها لوحدى من غيرك ...
الحقيقه الموقف ده بيحصل معانا احنا الكبار دايماااااا مع ربنا ..
اول ما بنقع فى مشكله بنقول لربنا ابعد وانا هاتصرف وتقوم عاصر دماغك وموتر نفسك وسهران الليل وضغط يعلا من التوتر وحرقة الدم وتروح تترجى فلان وعلان عشان يساعدك وفى الاخر تلاقى المشكله اتحلت او طلبتك اتحققت ونجحت ...
وتفتخر بقى بنفسك وتفضل تعظم وتفخم فى نفسك او فى الشخص اللى ساعدك لكن الحقيقه العظيمه اللى انت مش عارفها ان ربنا اللى سهل حياتك وطريقك عشان توصل لحلمك ...
الله يفتح ولا احد يغلق ويغلق ولا احد يفتح ..
اتكل على ربنا دايما فى حياتك ..

[Mary Naeem]

الطير لا عامل حساب لبكره ولا حتى للحظه
اللى جايه هايحصل فيها ايه ،
فارد جناحه وطاير وواثق انه فى حمايه
أعظم اله فى الكون ..

[Mary Naeem]

مابتنساش يارب احتياجنا حتى لو ماطلبناش
منك حتى لو نسينا نطلب
استجابتك جاهزه لينا وبتفاجأنا دايما ����

[Mary Naeem]

كان فى مطعم جنب الشغل عندى كل يوم أعدى عليه وفضولى دايما يقولى ماتيجى تجرب ..
اللى شدنى له انه عليه زحمه شديده وبيعمل الاكل فى الشارع بطريقه تجوعك جدا ..
من شدة الزحمه اللى عليه الناس بتاخد الاكل وبتاكل فى الشارع ..
فى يوم قررت انى اكل من عنده ، بصراحه اكله حرفيا يجنن ، مظبوط جدا وشهى وتحفه....
الصدمه بقى بعدها بحوالى ساعتين بطنى وجعتنى جدا ودخلت فى دور تسمم ..
بعدها ب شهر قولت فى بالى معقول التسمم ده من المطعم ؟؟ ما الناس كلها اهى بتاكل منه ماهو لو وحش ماحدش هاياكل عنده ، بصراحه اكله تحفه مش قادر اقاوم الريحه ..
دخلت كلت عنده ، تحس رجلى شدتنى له بالعافيه ..
هنا بقى حصلت حاجه غريبه لما اكلت من عنده ماحصليش حاجه ..
ساعتها قولت لنفسى انا ظلمت الراجل ده , اكيد انا تعبت من حاجه تانى ..
تانى يوم بقى فطرت واتغديت واتعشيت من عنده ، اخر اليوم بقى على الساعه ١٢ بالليل وانا بقفل المحل وقعت مافوقتش غير تانى يوم وانا فى المستشفى ، ولما سالت قالولى كان عندى حاله تسمم ..
الخلاصه اللى عاوز اقولها هنا ..
الطريق الغلط اللى بتمشى فيه ، مش شرط تتأذى منه ، لكن ربنا ممكن يبعتلك اشاره خفيفه كدا يحذرك منه ، ولو ماسمعتش الكلام يبعتلك ضربه اقوى منها ..
وهايفضل يبعتلك ضربات لغاية ماتفوق وتفهم ان الطريق ده نهايته موت ..
ويابخت اللى يتعلم من اول ضربه ..

[Mary Naeem]

واحد كان نفسه يخلف وعمل المستحيل عشان يخلف لكن ارادة الله ماسمحتش ، فا واحد قاله صوم 40 يوم متواصلين وصلى فيهم بحراره شديده جدا لربنا ، صاحبنا ده صام هو ومراته ، اول يوم صلى جميع الصلوات وكل صلاه يتكلم مع ربنا 5 دقايق ويقول يارب اخلف ويمشى ، تانى يوم فى الصلاه يتكلم مع ربنا عشر دقايق ويقول امنيته ويمشى ، تالت ورابع يوم لغاية ما وصل لمرحله انه بعد كل صلاه يقعد كدا ويحكى مع ربنا بالساعات مايحسش بنفسه ، لغاية ماوصل لليوم الاربعين وصل لمرحله مع ربنا قاله فلتكن مشيئتك انا مش عاوز حاجه من الدنيا غير انى اكون معاك وبس ، الكام ساعه اللى بقعد فيها معاك دى وبحكى معاك فيها عندى بالدنيا ، انا واثق فيك وواثق فى مشيئتك ومتأكد انك بتعمل لى الصالح...
بيحكى الراجل ده ويقول ربنا رزقنى فعلا بطفل بعد الصيام بشهر بالظبط ..
لكن ربنا مارزقنيش بطفل وبس ، ده علمنى اعظم درس فى حياتي ...
علمنى ازاى اعيش مع ربنا حياة التسليم التامه ، علمنى احكى معاه ، علمنى احبه بجد واحب اى حاجه تيجى منه ، واحب توقياتاته ومفجأته العظيمه ..
عزيزى القارىء
ثق تماما ان كل تجربه ربنا بيبعتهالك بيبقى عاوز يعلمك منها درس ، حاول تستفاد من التجربه .
وافتكر كويس ان ربنا دايما سامعك ..

[Mary Naeem]

عارف تطلع نخله وتعرض نفسك للخطر عشان تخد بلح وترميه لحد مستنيك تحت وفى الاخر هو يلم البلح كله ويمشى ويسيبك ...
اهو ده بالظبط اللى بيحصل لما تتعب وتطحن نفسك فى حوار وفى الاخر يجى حد ينسب التعب ده كله لنفسه وياخد هو كل حاجه ويسيبك ..
طيب دى سذاجه منك ولا ثقه زياده ولا ايه ...
نصيحتى بقى ليك اياك تآمن لحد لأن فى لحظه لو اتحط فى خيار ما بين مصلحته ومصلحتك ..
هاتتباع فى أول محطه ..

[Mary Naeem]

من يومين ركبت اتوبيس اللى طالع الغردقه بتاع الساعه ظ§ من عبد المنعم رياض ، انا كنت حاجز عن طريق النت، روحت هناك سالت على الاتوبيس قالولى عشر دقايق وجاى ، قعدت مستنى ساعه ، فا قومت سالت واحد تانى قولتله لو سمحت هو اتوبيس الغردقه بتاع الساعه ظ§ هايجى امتى ؟؟
قالى يافندم الساعه ظ¨ دلوقتى الاتوبيس مشى من بدرى ..
قولتله نعم ؟؟؟
ايه التهريج ده , انا جاى قبل ميعادى بربع ساعه وزميلك قالى عشر دقايق وجاى وماحدش نادى خااااالص على الاتوبيس بتاعى ، انتو شغالين ازاى ؟؟
قالى يا فندم الاتوبيس جه واحنا نادينا عليه فى الميكريفون اكتر من مره للناس ..
قولتله كداب ماحصلش عشان انا قاعد من هنا ليا اكتر من ساعه ماسمعتش خااااالص اتوبيس الغردقه انه وصل ..
قالى خلاص الفيصل هنا اننا نرجع الكاميرات عشان نثبتلك اننا نادينا عليه قولتله طبعا ..
دخلت للمدير ورجع الكاميرات
كانت الكارثه بقى ..
الراجل فعلا نادى على الاتوبيس لكن للأسف الشديد انا كنت بتكلم فى التليفون فى مكالمه حرفيا اقل من تافهه كنت بتخانق مع حد زميلى فى موضوع لمصلحته وبقنع فيه وهو رافض يفهم ورافض يسمع واعيد وازيد معاه وهو رافض تمامااااا يفهم وبيجادل فى الغلط لدرجه انه كان مخلينى فى المكالمه عصبى جدا وصوتى عالى لدرجه انى ماسمعتش الاتوبيس لما نادوا عليه ...
الخلاصه اللى عاوز اقولها ..
لو حد يعز عليك وليك نصيحه له قولها مره واحده بس تقبلها تمام لاقيته هايعند معاك ويدخلك فى حوار تحرق فيه كلام وهلكان وتضيع وقتك قوله انت صح وامشى وسيبه عشان حرفيا النقاش مع الاشخاص اللى زى دى هاتضيع عليك احلى لحظات عمرك ..
لأن فى ناس عندهم الأنا عاليه قوى ومايحبوش ابدا حد يصلح ليهم حاجه او يعدل عليهم فى حاجه ولو نصحتهم حرفيا هايهلكوك ...

[Mary Naeem]

كنت قاعد فى مطعم والترابيزه اللى جنبى عليها اب وابنه ، الولد كان طالب كولا وهايموت ويشرب كولا ، غالبا ابوه مانعه منها عشان الواد كان بيعيط جامد ونفسه فى كولا ، راح ابوه طلبله مشروب غريب كدا بس اللى عرفته انه مليان فواكه كتيره جدا وعليه لبن وعسل ، الولد اخد اول معلقه وصوته وهو بيقول الله���� جاب لغاية اخر الشارع من شدة اعجابه بالكوكتيل ده ، لدرجه انه قال لابوه ده احلى من الكولا يابابا ����..
مشهد جذب انتباهى قوى لدرجة انه خلانى اسرح بخيالى كدا واقول لما الاب على الارض يحب ابنه قوى كدا ويختاره احلى حاجه واصلح حاجه ليه ماباللك بقى من ربنا وشده حبه لينا
ده اكيد بيختار لينا احلى حاجه اينعم توقيتات ربنا فى مفجأته الحلوه لينا بتطول قوى علينا عشان احنا ملهوفين قوى مع قلة ثقه وقله تسليم كامل لربنا ده بيخلى عذاب الانتظار اقوى واحساس ان فترة الانتظار والاستجابه اطول ..
لكن حتماً ولابد سيستجيب فى وقته هو وطريقته هو
وثق تماما انه هايجيلك بمفجأه احلى مليون مره من اللى كان نفسك فيها ..
قريب قوى صوتك هايجيب لأخر الشارع من الفرحه

[Mary Naeem]

"4 خطوات تساعدك تعرف نفسك"
1. **التأمل والتفكر**:

تخصيص وقت للتفكير العميق في الحياة والقيم الشخصية.
2. **التجارب الجديدة**:

خوض تجارب جديدة لتحديد ما يثير الاهتمام والشغف.
3. **الكتابة**:

كتابة الأفكار والمشاعر لمراجعتها وفهمها بوضوح.
4. **التقييم الذاتي**:

مراجعة الإنجازات والإخفاقات لتحليل نقاط القوة والضعف.

[Mary Naeem]

أبنى الغالى .. بنتي الغالية
إن كانت الضيقة أمر غير محبوب لكم
لكن ثقوا أنها بتدبيري لتوقظ نفوسكم
فتصلوا بحرارة وتطلبوا معوني اصرخوا إلي
فتنالوا مراحمي وتعودوا تسمعوا صوتي وتفرحوا بعشرتي