إسكتش عيد القيامة

[magdy-f]

إسكتش عيد القيامة

هاأنا قد رأيتك اليوم معلقا علي خشبة الصليب يا ضابط كل العالم . فكيف تجرأ عليك المخالفون الذين هم من صنعة يديك يا من جذب اليه كل الخطاة وشفي جراحهم . علقوك علي خشبة مثل فاعلي الشر يا من صلبت من اجل خطايانا وأبطلت قوة الموت وجبروته بسلطان لاهوتك وقوة صليبك وقيامتك من بين الاموات . المسيح مخلصنا جاء وتألم عنا لكي بألامه يخلصنا .فلنمجده ونرفع اسمه لأنه صنع معنا رحمة كعظيم رحمته .
اعزائي المشاهدين في كل مكان كل عام وانتم بخير بعيد القيامة المجيد والذي نحتفل فيه كلنا بقيامة ربنا والهنا ومخلصنا يسوع المسيح من بين الاموات منتصرا علي الموت لكي يقيمنا معه من رباط خطايانا . فبقيامته اصبحنا أولاد لملك عظيم هو المسيح المنتصر القائم من بين الاموات .
أعزائي المشاهدين اخرستوس انستي.. بتلك المقدمة نبدأ نشرة اخبار العاشرة والنصف صباحا التي أقدمها لكم من المنتدى من امام الهيكل . والتي سوف يكون عنوانها الرئيسي هو ( المسيح الهنا قام من الاموات وهو باكورة الراقدين )

ونبدأها بأهم واحدث واقوي واخر الاخبار التي وصلت الي وكالة المنتدى من مراسلينا في اورشليم والجلجثة والناصرة وكل حتة المسيح كان فيها . احنا باعتين مراسلين في كل مكان ومن الاخر مش سايبين حتة الا وزارعين فيها مراسل عشان يجيبلنا الاخبار الطاظة.. وصل الينا لولو الشجاع مراسلنا في اورشليم انه قد صور لنا بكاميرة موبايله لقطات حية تفيد بانه قد قام يهوذا الاسخريوطي بتسليم سيده يسوع المسيح وهو يقبله – هذا وقد كان هناك حشد كبير من اليهود اثناء القبض علي السيد المسيح ولكن للأسف هرب كل تلاميذه لأنهم كانو خائفين جدا ... وبالطبع انقطع الارسال عشان لولو الشجاع طلع جبان وهرب هوا كمان عشان خاف لحسن حد يشوفه وهو بيصور اللقطات دي .. وبناءا عليه فقد تم طرد ورفد الاستاذ لولو الجبان من المحطة والاستغناء عن خدماته ... هذا وسوف نذيع علي حضراتكم بعد النشرة تفاصيل عن تسليم يهوذا للسيد المسيح فأبقوا معنا .. وأوعي تسرح مني

واليكم الخبر الثاني..
استطاع مراسلنا لبلب ابو قلب جامد ان ينقل الي وكالة انباء المنتدى ايضا تفاصيل محاكمة السيد المسيح فقد تبع السيد المسيح بكاميرة موبايله (n73) اللي احنا شارينهوله قسط علي حساب قناة المنتدى .. والتقط ايضا لقطات صعبة جدا اثناء محاكمة السيد المسيح فقد ظهر الشعب في الفيديو وهو يضربه ويتف في وجهه ( مش لبلب يا عيال اللي اتضرب لالا دا السيد المسيح- )
ويقول اصلبوه اصلبوه اقتلوه دمه علينا وعلي اولادنا .... +فيديو 1 .. ثم فجأة يا جماعة حصلت حاجة مرعبة جدا .. واحد من الجنود الرومان لمح لبلب ابو قلب جامد وهو بيصور بالموبايل فراحله وقاله انت بتعمل اييييه . فاضطر لبلب انه يكدب ويقوله انا مستني مكالمة من مصر عشان كدة ماسك الموبايل والجندي الروماني قاله انت تعرف الراجل اللي بيتضرب دا .. وبما ان لبلب قلبه جامد ومابيخافش .. طلع جبان المرادي وخاف وقاله ولا اعرفه اصلا يا سعادة الباشا انا لقيت زحمة وهيصة وناس ماشية ورا واحد قلت امشي وراهم وخلاص.. وبناءا عليه فقد تم طرد الاستاذ لبلب ابو قلب جامد ورفده والاستغناء عن خدماته من المحطة لأنه أنكر معرفته بالسيد المسيح ..
هذا وسوف يذيع لكم برنامج البيت بيتك تفاصيل محاكمة السيد المسيح عقب النشرة فتابعونا . وأوعي تسرح مني

[magdy-f]

والان اعزائي المشاهدين حانروح لتقرير النشرة الاقتصادية ( بتاعت الفلوس يعني) وتقدمها لنا تاسوني ....... دولار

النشرة الاقتصادية

-----

اعزائي المشاهدين اهلا ومرحبا بكم في النشرة الاقتصادية والتي نقدمها لكم من داخل استوديوهاتنا في وكالة انباء المنتدى وتذاع علي قناة المنتدى
لقد استطعنا الوصول الي مستر x- money من داخل البنك المركزي ولما عملنا معاه حوار عرفنا انه قد تم عقد صفقة بالامس بين المدعو يهوذا الاسخريوطي وبين جماعة اليهود من الكتبة والفريسين . وتلك الصفقة بتقول ايييييه .. بتقول ان يهوذا يسلمهم السيد المسيح ويقبض منهم مبلغ 30 من الفضة ...ويعتبر هذا المبلغ صغير جدا جدا لا يتعدي في عصرنا هذا ال3 جنيهات (_ تخيلو يا جماعة 3 جنيه يعني مش فلوس خالص وسلمهم السيد المسيح ) علي ان تتم تلك الصفقة في مساء يوم الخميس وان تكون علامة التسليم هي قبلة يهوذا الخائن للسيد المسيح ..
ومن المعروف عن يهوذا انه واحد من تلاميذ السيد المسيح وكان بيحب الفلوس جدا جدا زي عنيه . وكان هو المسئول عن صندوق الفلوس بتاع التلاميذ وطبعا كان بيسرق منه لانه بيحب الفلوس جدا ... وليه بردو موقف ذكره الانجيل لما المرأة الخاطية سكبت الطيب علي رجلين السيد المسيح راح يهوذا اتغاظ وقال ليه مانبيعش الطيب دا ونقبض تمنه ونوزع عالفقراء .. وطبعا يا جماعة هوا كان عايز الطيب دا يتباع عشان يسرق هوا من تمنه .
هذا وقد افاد مراسلنا اللي كان موجود هناك وقت تسليم السيد المسيح انه بعد ما اليهود اخدو السيد المسيح . يهوذا زعل جدا وندم كتير علي خطيته دي وراح رمي الفلوس في وش اليهود( بعد ايه يا يهوذا ) وراح لمكان خلا( مكان فاضي يعني) وشنق نفسه


ومن اخبارنا الاقتصادية المحلية ففي ضوء احتفالات الكنيسة باعياد القيامة المجيدة نطالبكم ونناشدكم برفع العيدية بتاعتكم بمقدار 5 ساسونة وربع .والربع قبل ال5 ساسونة علي رأي زميلنا بمبة .. حتي تستطعيوا ان تتفسحوا وتتبهرجوا في العيد ولا تنسوا ان تقدمو جزء من تلك العيدية للكنيسة حتي يبارك الله في باقي الفلوس
هذا وسوف نعرض بعد النشرة مظاهر احتفالات الاولاد والبنات في الكنيسة في العيد
فأبقو معنا .

[magdy-f]

عودة مرة اخري اعزائي المشاهدين ونشكر الزميلة تاسوني ... دولار علي تغطيتها لاحداث النشرة الاقتصادية ....
اعزائي المشاهدين اليكم هذا الخبر الهام جدا جدا جدا ..
ارسل لنا مراسلنا توتو عضل من داخل القصر الملكي لبيلاطس البنطي مشهدا غريبا جدا استطاع ان يلتقطه بكاميرا موبايله ال(n73) واللي بردو شارينهوله قسط من كارفور علي حساب الوكالة ..هذا المشهد ظهر فيه بيلاطس البنطي وهو يكب ازازتين مياه معدنية ماركة سيوة في طبق بلاستيك ابيض من انتاج شركة مارينا للبلاستيك ثم غسل يديه فيهما وقال اني لا اجد علة واحدة في هذا الانسان .. وهنا صاح الشعب بصوت عالي قائلين اصلبه واقتله . الا انه أمام الضغط الزائد من الشعب قام باصدار قرار بصلب السيد المسيح بالرغم من انه لم يجد فيه خطية واحدة
وسوف نذيع علي حضراتكم تفاصيل محاكمة السيد المسيح مسجلة بعد النشرة . فتابعونا . وأوعي تسرح مني

[magdy-f]

والان اعزائي المشاهدين سنذهب الي نشرة عالم الحيوان ( وهي نشرة جديدة من اختراع قناة المنتدى .. وتهتم بكل ما هو جديد في حياة الحيوانات في حديقة الحيوان ) وتقدمها لنا تاسوني ................

نشرة عالم الحيوان

اعزائي المشاهدين . في اطار جهود العالم للرفق بالحيوان . فقد وصل الي وكالة انباء المنتدى ان هناك بلبلة وكعبلة في حديقة الحيوان بالنزهة . وبالفعل يا جماعة بعتتنا زميلنا الاستاذ دونكاوي donkawy لجنينة الحيوان عشان يعرف ايه سبب المشكلة اللي هناك
وفعلا اول ما دخل دونكاوي الحديقة عرف ان المشكلة جاية من حظيرة الحمير. وراح بالفعل بكاميرته للحظيرة واتكلم مع الحمار حوحو اللي هوا سبب المشكلة اصلا .. ولما سأله عن سبب زعله راح قايله انهم بيعاملوني بطريقة وحشة جدا هنا في جنينة الحيوان ونا مش حابب المعاملة دي. ورد عليه الاستاذ دونكاوي وقاله وفيها ايه ياعم حوحو لما يعاملوك بطريقة وحشة يعني منتا حمار زي باقي الحمير بتتعامل زيهم عايز تتميز عنهم ليه .. وهنا زنجر الحمار حوحو ونهق وقال ازااااااااااي انا انتمي الي عائلة عريقة جدا جدا
لأن جدي الاكبر هوا جحش اتان اللي دخل عليه السيد المسيح وهوا منتصر كملك الي اورشليم في يوم حد الزعف. وبالتالي انا لازم اتعامل بطريقة سبيشيال حبتين ... وفعلا يا جماعة مراسلنا الاستاذ دونكاوي رفع شكوي للاستاذ سيد قفص مدير حديقة الحيوان والمسئول عن كل صغيرة وكبيرة مع الحيوانات .. وفعلا يا جماعة قرر الاستاذ سيد قفص بناء حظيرة خاصة 5 نجوم لحوحو لواحدة وفيها حوضين حوض علشان يشرب فيه ميه وحوض عشان البرسيم . وان يقدموا له البرسيم بالكريم شانتيه . ويتم تعيين موظف مخصوص لكي يعطيه الاكل والشرب بنفسه . وايضا يتم صرف عدد 5 علب عصير انجوي بالمانجة للاستاذ الحمار حوحو وقد تم تغيير اسم حديقة الحيوان الي ( حديقة حوحو حاحا جحش اتان ) والان يعيش الحمار حوحو حياة جميلة جدا

هذا وعلي صعيد اخرفقد اطمأن ايضا الاستاذ جرجاوي فرخة مراسلنا في قطاع اخبار المنتدى علي الديك دودو حيث وصل الينا انه ايضا ينتمي الي عائلة كبيرة جدا وعريقة جدا فجده الاكبر الاستاذ ديك افندي ابو عرف هو الذي صاح امام السيد المسيح حينما انكره بطرس 3 مرات كقول السيد المسيح ( (انه قبل ان يصيح الديك تنكر 3 مرات انك تعرفني) )
وعندما سألناه عن اخباره في الحديقة وكيف يتم معاملته قال ( لالا يا جماعة الصراحة الناس هنا عاملين معايا احلي واجب وزيادة كممان والخدمة هنا 5 نجوم ربنا يخليلنا سيد قفص . اي حاجة بطلبها مش بيأخروهالي
هذا وسوف نذيع علي حضراتكم تفاصيل اللقاء التليفيزيوني مع الحمار حوحو والديك دودو عقب انتهاء النشرة فأبقوا معنا
والان سؤال المشاهدين في المنازل ..
السؤال بيقول.. كم سنة عاشها جحش اتان بعد ما ركبه السيد المسيح ودخل به لأورشليم كملك عظيم ؟؟
اذا عرفت الاجابة اتصل بينا من اي محمول علي النمرة دي زيرو خمس اصفار زيرو زيرو زيرو . او علي الايميل التالي :-
عالم الحيوان أت حوحو و دودو دوت نص كوم .. ومنتظرين تليفوناتكم يا جماعة

[magdy-f]

والان اعزائي المشاهدين حانروح سوا لحالة الطقس والجو وتقدملنا النشرة الجوية تاسوني ........

النشرة الجوية

اعزائي مشاهدي قناة المنتدى أهلا ومرحبا بيكم في نشرتكم الجوية ونقدمها لكم من وكالة المنتدى
حالة الجو يوم الجمعة الماضية لم يكن مستقرا خالص خالص ففي ظاهرة غريبة من نوعها وفي تمام الساعة الثالثة عز الضهر يوم الجمعة اللي فاتت الدنيا ليلت يا جماعة .. طبعا حاجة غريبة جدا ان الدنيا تليل الساعة 3 الضهر.. لذا انتقلت كاميرات المنتدى الي جبل الجلجثة لكي نتأكد من صحة الخبر .وبالفعل ذهبنا الي هناك ولقينا حاجة غريبة خالص .. لقينا ان الدنيا فعلا مليلة وحنا في عز الضهر وكان الجو سقعة جدا وابتدت الدنيا تشتي ..وبعدين حصل برق ورعد راح مخلي كل الناس الموجودة تهرب وتجري ونشاهد الان جزء مما حدث يوم الجمعة العظيمة في جبل الجلجثة فتابعونا
+ فيديو 3.. وفي محاولة تفسير خبراء الارصاد عن تلك الظاهرة فيقول استاذ عبده شمسية خبير الارصاد الجوية في ذلك الوقت ان السبب في ذلك هو حدوث كسوف كلي للشمس .. اي ان الشمس اختفت من الارض ولذلك اختفي شعاع الشمس من علي الارض وهذا جعل الارض تظلم تماما وقت صلب المسيح علي الصليب..
هذا ولدينا نحن تفسير اخر عن تلك الظاهرة . وهو تفسير روحي شوية . وهو ان الشمس اتكسفت انها تشوف خالقها وهو مصلوبا علي الصليب لذلك اختفت ولم تستطيع ان ترسل نورها علي الارض والاله الحي مصلوبا علي الصليب.... هذا وقد حدث ايضا زلزال مما جعل الارض تهتز بشدة ويبدو ان الارض ايضا لم تكن راضية علي صلب المسيح وانكسفت من ان تحمل السيد المسيح وهو مصلوبا علي خشبة الصليب فوقها
اعزائي المشاهدين يبدو ان هناك غضب شديد من الطبيعة فالشمس اختفت و الارض تزلزلت وهذا يدل علي ان الطبيعة غير راضية عن ما يحدث للسيد المسيح ... هذا وفي ذلك الوقت رأي مراسلنا الاستاذ ذيكو ماباخافشي ان هناك حديثا بين اللص اليمين واللص اليسار وبين السيد المسيح واستطاع ان يتسحب ويقف اسفل الصليب لكي يسمع ما يقوله اللصان للسيد المسيح واستطاع بنجاح وسط تلك العواصف والزلزلة ان يسمع تلك الكلمات .ويسجلها ايضا .. واليكم هذا التقرير من بؤرة الاحداث.. + فيديو 4

في ضوء احتفالات الكنيسة اليوم بعيد القيامة المجيد ..فقد خرج كل الاولاد والبنات الي الكنيسة لحضور حفلة العيد لذا نحب اننا نقولكم ان الجو انهاردة بديع والشمس طالعة والجو حلو جدا ويتوقع خبراء الارصاد ان يسود اليوم طقس حرا نهارا ومعتدل ليلا وسوف يستمر ذلك الطقس للغد ايضا في احتفالات شم النسيم ..
قدمنا لكم النشرة الجوية اعزائي المشاهدين ونعود مرة اخري الي استوديو نشرة الاخبار .

[magdy-f]

عودة مرة اخري من حالة الطقس اعزائي المشاهدين وبنشكر تاسوني ........ لتغطيتها نشرة اخبار الطقس.

والان :- اتصال هاتفي مع سمعان القيراوني

والان اعزائي المشاهدين عندنا مفاجأة كبيرة جدا جدا جدا .. مفاجأة مش حاتلاقيها في ولا فى منتدى غير عندنا .. حصريا للمنتدى .. حانقدر نعمل اتصال هاتفي بالتليفون مع واحد من الشخصيات المهمة جدا في احداث الصلب. الشخصية دي محدش بياخد باله منها عشان بنبقي مركزين علي السيد المسيح وهوا رايح يتصلب .. انهاردة حانعمل معاه اتصال تليفوني ونسمعه ونشوف عايز يقولنا ايه ...
الو
الو يابني
· ازيك يا قديس
· اهلا يابني ازيك وازيكم كلكم.. اخرستوس انستي ........ المسيح قام
· احنا عاملين مفاجأة لأولادنا هنا المنتدى وهما لحد دوقتي مايعرفوش مين اللي بيتكلم معانا عالتليفون .. ياريت حضرتك يا قديس تعرفنا بنفسك
· حاضر يابني .. انا يا ولاد سمعان القيرواني. انا اللي شلت الصليب جنب يسوع المسيح . انا اللي هدومي كلها اتعاصت دم من دم السيد المسيح اللي كان مغرق كل حتة..
· طيب يابونا سمعان ممكن تحكيلنا انت اصلا منين
· انا من بلد اسمها قيروان والبلد دي موجودة في ليبيا . وسافرت لفلسطين عشان احضر عيد الفصح هناك
· طيب ايه حكايتك بأه مع السيد المسيح ؟
· انا كنت ماشي في شوارع اورشليم ساعتها وكان الصبح .. وبعدين سمعت ناس بتقول اقتلوه اصلبوه وكانت الدنيا زحمة جدا بس مكنتش شايف حاجة
· وبعدين يابونا سمعان
· قلت اقرب شوية عشان اتفرج واشوف الشعب دا هايج علي مين وبيقول اقتلوه اقتلوه لمين . فجأة ظهر قدامي واحد شكله صعب اوي.. واحد كان متبهدل وهدومة كلها متقطعة وجسمه مليان دم ومتبهدل خالص وكان شايل الصليب وماشي بيتطوح بيه يمين وشمال .. وكان صعبان عليا اوي
· ياااااه وبعدين يابونا سمعان ؟؟؟
· وبعدين يابني مرة واحدة الراجل دا وقع علي الارض ومكنش قادر يشيل الصليب . فا واحد من الجنود راح وقال لقائد المئة . الحق لحسن شكله حايموت قبل ما تصلبووه .. اتصرف وخلي حد تاني يشيل الصليب مكانه .
· يعني السيد المسيح وقع علي الارض ومكنش قادر يشيل الصليب من التعب!!
· ايوة يابني كان تعبان جدا جدا . وبعدين مرة واحدة لقيت قائد المئة قدامي قالي تعالا ..شيييييييل الصليب دا مع يسوع الناصري.. انا علي فكرة كنت ممكن اهرب او أزق حد مكاني .بس يسوع الناصري دا صعب عليا جدا جدا وشيلت فعلا الصليب جنبه
طيب احنا معانا تقرير دلوقتي نشوفه ونرجعلك تاني يا ابونا سمعان القيرواني

+ فيديو 6
· يابختك يا ابونا سمعان القيرواني مكتوبالك تشيل الصليب جنب السيد المسيح .. وياتري ماقلكش حاجة ونتا شايل الصليب معاه ؟
· كان ماشي جنبي بيتوجع من كتر الجلد والضرب .. ونا كمان كنت بتضرب من الشعب معاه . كان واحد بدل ما يجي يضربه يروح ضاربني انا .. وفضلت ماشي جنبه وشايل الصليب معاه ونا هدومي كلها متغرقة من دمه و هوا كان بيتألم جدا لحد ما وصلنا لجبل الجلجثة وهناك قالولي روح روح بيتكم خلاص مهمتك انتهت علي كدة ...
· طيب وبعدين لما روحت البيت عملت ايه بأه؟
· اول ما روحت البيت قالولي عيالي انت تعبان ليه كدة يا بابا قلتلهم انا شلت الصليب جنب يسوع الناصري . فا اتضايقوا جدا جدا وصرخوا في وشي وقالولي اللي انت عملته دا عاار.. الصليب عاار يا بابا ازاي تعمل كدة .. بس انا كنت مقتنع جدا باللي عملته عشان يسوع دا كان صعبان عليا
· طيب هل شفت السيد المسيح بعد كدة ؟
· طبعا .. السيد المسيح دا حنين جدا وطيب جدا .. جالي يوميها بليل في الحلم ونا نايم بس مكنش متعذب ومتبهدل زي ما شفته يوميها الضهر .. لالالالا . كان جايلي في شكل ملك عظيم ووشه زي الشمس وجالي وباسني وقالي بالحرف الواحد " طوباك يا سمعان لأن العار الذي حملته معي سيكون فخرا ابديا لك "
· طيب كتير من اصدقاء البرنامج دلوقتي مستغربين اني بناديك يا قديس سمعان القيرواني . ايه تعليقك علي الكلام دا يا ابونا .
· لالالالا انا فعلا يا ولاد استشهدت علي اسم السيد المسيح وأمنت بيه من بعد ما ظهرلي في الحلم وبيتي كان كنيسة كبيرة اوي واولادي بردو خدمو السيد المسيح .
· طيب يا ابونا سمعان القيرواني بنرحب بقداستك في برنامجنا وبنقولك كل سنة ونت طيب في عيد القيامة
· وانتو طيبين يا اولاد واخرستوس انستي ...... المسيح قام

[magdy-f]

والان :- ودلوقتي يا اعزائي المشاهدين حانذهب لنشرة الوفيات ( بردو دي نشرة جديدة من اختراع المنتدى وبتقولنا اهم المشاهير اللي ماتو) وحاتقولهالنا تاسوني ............ ربنا يعزيكم

نشرة الوفيات

اعزائي المشاهدين .. البقاء لله
اعزائي المشاهدين انهاردة حاقولكم نشرة الوفيات ..
انتقل الي الامجاد السماوية وعلي رجاء القيامة اللص اليمين والملقب بأسم ديماس علي حسب وعد السيد المسيح له علي الصليب حينما قال له اليوم تكون معي في الفردوس هذا وستشيع الجنازة عقب نشرة الاخبار مباشرة وسيتم نقلها على الهواء مباشرة فأبقوا معنا

هذا وعلي صعيد اخر فقد مات اللص الشمال والملقب بأسم اللص يسطاس الي جهنم وبئس المصير لأنه استهزأ بالسيد المسيح علي الصليب وقال له ان كنت انت المسيح خلص نفسك وايانا ... وقد تم كسر ركبتاه الاتنين حتي يموت ويتم انزاله من علي الصليب

وايضا انتقل التلميذ المسمي بيهوذا الاسخريوطي الخائن الي جهنم ايضا مع اللص الشمال لانه قام بتسليم السيد المسيح مقابل 30 من الفضة ..
هذا وقد استطاع الاستاذ لبلب ابو قلب جامد زميلنا في المحطة ان يتتبع يهوذا الاسخريوطي بعد تسليمه للسيد المسيح وقام بتصويره بالموبايل n73 ويظهر في الفيديو وهو يشنق نفسه ندما علي ما فعله مع السيد المسيح ..
اعزائي المشاهدين ياريتنا نقول مع اللص اليمين دايما اذكرني يا رب متي جئت في ملكوتك ..
والبقاء لله

[magdy-f]

اعزائي المشاهدين اليكم هذا الخبر الهام .. قام القديس يوسف الرامي بانزال جسد السيد المسيح من فوق الصليب بعد ما اسلم الروح وقام بدفنه في القبر الذي كان مخصصه لنفسه . وهذا القبر منحوتا في الصخر . ولم يدفن فيه احدا من قبل . هذا وقد تبعهم زميلنا ومراسلنا في وكالة المنتدى الاستاذ فتحي المستخبي . وفضل وراهم لحد ما دخلو بالسيد المسيد المسيح جوا القبر ودفنوه ولما طلعوا حطوا صخرة كبيرة علي القبر وبعدين لقي فتحي المستخبي ان بيلاطس باعتت جنود يحرسو القبر عشان محدش يسرق جسد المسيح .. وفعلا اعزائي المشاهدين سهر الاستاذ فتحي المستخبي مع الحراس بس وهوا مستخبي ورا صخرة كبيرة .
هذا وسوف يرسل لنا فتحي باقي الاخبار اول بأول...


اعزائي المشاهدين اليكم اخر واهم الانباء .. فقد وافانا مراسلنا من وكالة انباء المنتدى وهو فتحي المستخبي واللي المفروض انه يكون سهران جنب القبر انه ماقدرش يسهر ونام طول الليل ولكن في فجر الاحد صحي علي صوت المريمات وهما جايين بحنوط لقبر السيد المسيح .قام بسرعة وجهز الكاميرا بتاعته وابتدي تصوير ولكن لقي حاجة غريبة جدا لقي ان الحجر متدحرج والقبر فاضي .. القبر فاضي يا جماعة والملاك ظهر للمريمات وكلمهم وقالهم المسيح قام من الاموات.. وفعلا بعتلنا الفيديو دا عشان نتفرج عليه .. اسيبكم مع التقرير دا ونرجع كمان شوية



+ فيديو 7

دا معناه ان المسيح مش موجود في القبر
يعني السيد المسيح قام من الاموات في اليوم التالت زي ما كان بيقول . السيد المسيح قام فعلا يا جماعة من بين الاموات .. كل سنة ونتم طيبين اعزائي المشاهدين في عيد قيامة السيد المسيح من بين الاموات ...
اخرستووووس انيستي .. اليسوس انيستي ...... المسيح قاااام.. بالحقيقة قااام. ...

[emy gogo]

ربنا يعوض تعب خدمتك

[Mary Naeem]

مشاركة جميلة جدا

ربنا يبارك حياتك