الغلطة بجرح جديد

[walaa farouk]

الغلطة بفورة
بس الغلطة في حياتي كانت دايمًا بجرح جديد،
جرح نَفسي أو جسدي بس الأكيد إن مافيش غلطة من غير جرح،
كبرت على إن غلطاتي مش بتتغفر ودايمًا بتحاسب عليها وبدفع تمنها،
حتى لو كانت الغلطة دي إني وقعت من غير قصدي وأتجرحت جرح بسيط،
بتحاسب على وقعتي دي.
واتعلمت إني حتى مسامحش نفسي على غلطاتها،
ودايمًا أمشي على السطر،
وبقيت بحس بالذنب تجاه أبسط حاجة لأن عمري ما اتغفرلي،
ولا حسيت إني أستحق الغفران،
لحد ما في يوم سألت نفسي هو أنا أستحق إني أسامحني،
واللي حواليا كمان يسامحوني على أخطائي الكبيرة منها والصغيرة كمان؟
الحقيقة مش عارفة اجابة السؤال ده إيه
قوليلي إمتى عرفتي تغفرلي لنفسك؟ وتفتكري نفسنا تستاهل إننا نسامحها؟