مسلسل اسكتش اعمال الرسل

[Mary Naeem]

مسلسل اسكتش اعمال الرسل

قصص الرسل فى سفر اعمال الرسل
تقسيمات الاسكتش
قصص التلاميذ والفضائل والمعجزات .

- اهداف الاسكتش معرفة المخدومين بقصص
اعمال الرسل والاباء القديسين .

- اكتساب الفضائل والبعد عن الخطايا مثل الكذب فى قصة حنانيا سفيرا .

الحلقة الأولى الخاصة بالاسكتش .

بطرس والتلاميذ وحلول الروح القدس واختيار متياس واعتماد ثلاث الاف .

اسكتش
سفر اعمال الرسل الحلقة الثانية .

الحلقة الثانية بطرس ويوحنا يشفوا الاعرج .

- ادماج المخدوم فى القصة وعمل اسئلة خاصة بكل اسكتش لمعرفة مدى الاستفادة .

مناسب لمراحل ابتدائى ممكن تمثلوه وتعرضوه فقرة افتتاحية فى الصوم لمدارس الاحد او اونلاين ويعرفوا بداية الكنيسة وبشارة التلاميذ والرسل .


يدخل بطرس الرسول والتلاميذ والقديسة العذراء مريم .

يبدأوا صلاة فى سرهم ويتحدث بطرس .

بطرس : يااه النهارده كان يوم حلوه خالص بعد صعود السيد المسيح احنا ادينا فى العلية كلنا التلاميذ وكمان ام ربنا يسوع المسيح واحنا لازم نعمل حاجه مهمة .
يوحنا الرسول : نعمل اى يا بطرس ؟
بطرس: لازم نختار واحد مكان يهوذا اللى كان معانا ويكون من اول ما السيد المسيح اتعمد لحد ما صعد عشان ييشر الناس بكل حاجه وطبعا عارفين يهوذا خنق نفسه ومكتوب فى سفر المزامير ليأخذ وظيفته اخر.
وطبعا احنا لازم نختار تلميذ عشان يتحسب معانا ويبقى من الاثني عشر تلميذ .

يمسك يوحنا اثنين من العصا صغيرين للقاعة .

يوحنا : بس يا بطرس احنا هنكتب اسمين كل عصايا هنكتب عليها اسم ونعمل قرعة .
بطرس: ومين هما يا يوحنا اللى هنكتب اسمهم ؟
يوحنا : نكتب اسم يوسف الملقب يوستس ومتياس ونعمل قرعه .
بطرس موافق يلا نلخبطهم ونرميهم لفوق ونصلى ربنا يختار اللى هيمسك المسؤلية دى .

يرمى العصا فى الارض ويختار واحده منهم .

بطرس : ربنا اختار يا اخوتى متياس عشان يبقى من الاثنى عشر تلميذ .

يدخل متياس الرسول اليهم .

بطرس: مبروك يا متياس انت بقيت من الاثنى عشر تلميذ عشان انت شفت السيد المسيح وعشت معانا من اول ما اتعمد لحد ما صعد للسماء وهتكون شاهد للناس كلها بكدا .
متياس : شكرا خالص يا بطرس انا بحب ربنا خالص وهبقى مطيع كتير.

يوجه كلامه للاطفال

واحنا لازم يا اصحابى نسمع الكلام دايما سواء فى البيت وماما وبابا وفى الكنيسة ومش نعمل هيصة عشان ربنا بيبقى موجود وشايفنا
يلا يا بطرس نخرج دلوقت عشان نشوف الخدمة اللى هنعملها .

ويخرج الجميع .

يسمع صوت من الداخل وتمر ايام قليله .

يدخل بطرس الرسول والتلاميذ .

بطرس : عارفين يا اخواتى النهارده يوم الخمسين اللى هو يوم الحصاد ده .
واليوم ده اليهود بيجوا من كل مكان فى العالم وناس كتير بردو بتيجى غير اليهود عشان اللى بيصلى واللى بيشترى وحاجات كتير .
يوحنا : ياه ده الساعه تسعه الصبح دلوقت يا بطرس ياترى هيحصل ايه ؟

يسمع صوت هبوب رياح ويقوم بعمل ورق على شكل لسان من النار ووضعه فوق رؤوسهم او وسيلة بسيطة .

بطرس : ايه ده يا يوحنا ؟ شايف هواء شديد خالص وزعابير كتير بص بص كدا شايف السنه من نار فوق راس كل واحد .

يدخل بعض الناس الغريبة بملابس غريبة عن بعض .

احد الاشخاص : اي ده ؟ شايف شايف الناس اللى هناك دى تعال نشوفهم بيعملوا اى.
احد الاشخاص : ايه ده ؟ ده بيتكلموا عربى نفس اللغة اللى اتولدت بيها .
احد الاشخاص: ايه ده ؟ بسمعهم بيتكلموا يونانى .
احد الاشخاص : وانا بسمعهم بلغتى بردو .
احد الاشخاص : وانا كمان الناس دى سكرانه ولا اى ههههههه .

يقف بطرس الرسل وينادى .

بطرس : يا حبايبى احنا مش سكرانين زى ما انتوا فاكرين عشان دلوقت احنا فى الصبح بس زمان نبى اسمه يوئيل اتنبأ وقال ان ربنا هيخلى روحه على ناس كتير وناس كتير هتقدر تصلى وتعمل معجزات وحجات حلوه خالص وعايز اقولك حاجه تانى .
احد الاشخاص: ايه ممكن تعرفنا ؟
بطرس : يسوع الناصرى اللى انتوا صلبتموه وقتلتموه ده كان بيعمل معجزات وهو قام من الاموات وكمان صعد للسماء واحنا شوفناه عشان هو المسيح وانتوا مكنتوش مصدقين .
احد الاشخاص : طيب نعمل ايه دلوقت ؟
بطرس : لازم يا حبايبى نتوب ونعمل اعمال حلوه وننسى االى فات ونبقى ناس جديدة وكمان لازم تتعمدوا ونبدا صفحة جديدة .
احد الاشخاص : ياااه احنا لازم نعمل كدا صح ونبقى ناس كويسه ونتوب ومنعملش حاجه وحشه تانى ونتعمد يلا بينا يا بطرس عايزين نتعمد كلنا والناس اللى بره كتير بردو عايزه تتعمد وترجع لربنا وتعمل اعمال صالحة .

بطرس يلا بينا ويخرج الجميع .

يدخل بطرس لوحده .

بطرس يحدث الأطفال .

بطرس: ياااه يا اصحابى النهارده كان يوم حلو خالص عشان احنا عمدنا ثلاث الاف شخص وبقوا مسيحين وبقينا نصلى مع بعض وناكل اكل بسيط ونبقى فرحانين ونصوم ونعمل حاجات حلوه .
انتوا كمان لازم نحترم الكنيسة ومش نشتم ولا نكدب ونحترم بيت ربنا ونقف كويس فى طابور التناول ومنعملش هيصه عشان ربنا بيبقى موجود معانا .

يخرج بطرس الى الخارج .

يدخل بطرس ويوحنا وجنبهم راجل مشلول نايم .

بطرس: يلا يا يوحنا عشان نروح نصلى فى الهيكل .
يوحنا: ايوه اهو انا جاى يلا بينا شايف يا بطرس الراجل ده مشلول من ساعة ما اتولد يا ترى هيعمل ايه دلوقت ؟

بطرس يمشى ويصل عند الراجل المشلول وينظر اليهم .

بطرس: على فكرة احنا مش معانا فلوس خالص بس معانا حاجه حلوه هنديها ليك.
الراجل المشلول.: امممم ياترى ايه ؟
بطرس: باسم يسوع المسيح يلا قوم وامشى .

يقوم الراجل وهو فرحان هيه هيه هيه هيه انا بمشى هيه

يدخل بعض الناس عليهم

احد الاشخاص: ايه ده شايفين الراجل المشلول اتشفى ازاى .
بطرس: يا اخواتى مش انا اللى شفتيه ده باسم يسوع الناصرى اللى انتوا صلبتوه وقتلتموه وقام من الاموات وعشان الايمان باسمه الراجل ده خف وبقى يمشى كويس .
فلازم نتوب ونعمل اعمال كويسه ونؤمن ان اللى قام من الاموات هو المسيح اللى كنتوا مستنينه ومنتظرين انه يجى ويخلص اسرائيل .

وهو يتكلم يدخل كاهن من اليهود بلبس كاهن ومعه اثنين من الجنود

الكاهن: ايه ده ؟ كفايه امسكوهم واقبضوا عليهم وتعالوا نحطوهم فى السجن عشان يبطلوا يتكلموا كل شويه بكدا مش هينفع الناس دى تتكلم كدا خالص .

ويخرج الجميع .

نضع تربيزة ويجلس حنان رئيس الكهنه وكم كاهن اخر وكم جندى ويتحدثون فى سرهم ثوانى وينادى رئيس الكهنه .

رئيس الكهنه : انا حنان رئيس الكهنه لازم اخلى الناس دى تبطل ما تتكلمش تانى باسم يسوع الناصرى ولازم اعلمهم ان ده غلط مينفعش يتكلموا كدا تانى .
يلا هاتوهم من السجن بسرعه .

يخرج احد الحراس ويدخل معه بطرس ويوحنا .

رئيس الكهنه: مينفعش دلوقت الكلام ده لحد دلوقت .
يجى خمس الاف واحد تبعهم واحنا لازم نخليهم يبطلوا يتكلموا باسم يسوع ده .
رئيس الكهنه: انتوا ازاى عملتوا كدا وبأى اسم وقوة قولولى يلا بسرعه ازاى ؟
بطرس : عارفين يا شيوخ اسرائيل احنا عملنا خير والراجل المشلول قام وبقى يمشى بس ده مش بنفسنا عملنا كدا ده باسم يسوع الناصرى الللى انتوا صلبتموه وقتلتموه ده قام من الاموات وباسمه الراجل المشلول مشى .

يتحدث رئيس الكهنه مع احد الكهنه قيافا الجالسين .

رئيس : اخرجوهم بره يا حراس .

يخرج بطرس ويوحنا ويتحدث رئيس الكهنه .

رئيس الكهنه: انا مش عارف ازاى دول مش بيعرفوا يقروا ولا يكتبوا ازاى يتكلموا كدا بس احنا شفنا الراجل المشلول قام وبقى يمشى .
يا ترى نعمل ايه مع الناس دى يا قيافا ؟
قيافا : احنا منخليهمش يتكلموا تانى باسم يسوع ده .
حنان : ايوه صح دخلوهم يلا تانى .

يدخل بطرس ويوحنا .

حنان : انتوا بلاش تتكلموا باسم يسوع ده تانى سامعين ولالا .
بطرس: احنا بنسمع كلام الله وزى ما يقول لينا بنتكلم عشان احنا بنتكلم زى ما شوفنا وسمعنا والمشلول ده ليه اربعين سنه وانتوا شفتوه خف طبعا وبقى كويس .
حنان : يلا طلعوهم بره يلا امشوا .

يخرج الجميع ويدخل بطرس ويوحنا والتلاميذ .

يصلوا فى سرهم ويتحدث بطرس .

بطرس : يارب ساعدنا نتكلم بكلامك ونعمل معجزات باسمك وكمان منخافش من حد ولا التهديد اللى بيقولوا لينا ساعدنا يارب .

يتزعزع المكان

يوحنا شايف يا بطرس المكان اتهز ازاى احنا لازم نسمع كلام ربنا علطلول ومنعملش اى حاجه غلط عشان ربنا يساعدنا ويقف معانا يلا بينا .



يخرج الجميع وتنتهى الحلقة .


- كانت بداية الاسكتش هو بداية
سفر اعمال الرسل بعد صعود ربنا يسوع المسيح وحلول الروح القدس على التلاميذ واعتماد الالاف فى هذا اليوم والتبشير وعظة القديس بطرس التى ضمت للكنيسة انفس كثيرة .
من هذا علي كل مخدوم ان يعرف ان الرب يسوع حاضر معنا دايما فى الكنيسة وموجود فى القداس وعلينا ان نحترم الكنيسة لانها بيت الرب لان الرب يسوع بيكون وسطنا مع الملائكة والقديسين .
علينا ان نعرف قوة حلول الروح القدس من خلال عظة القديس بطرس حيث كان شجاع وفى عظة واحدة انضم للكنيسة عدد كثير وهذا يدل ان الرب بيعمل بقوة فى التلاميذ من اجل البشارة .
- ونجد فى القصة الاخرى وهى شفاء الاعرج والذى كان عند هيكل الجميل وبالرغم من ذلك لم يؤمن اليهود ويعترفوا بالرب يسوع وارادوا من التلاميذ ان لا يذكروا اسم الرب يسوع فى اى مكان ولكن الرب كان معهم واستمروا فى البشارة وعمل المعجزات باسم الهنا يسوع المسيح .
ويتعلم المخدوم فى هذه القصة ان الايمان شئ مهم جدا فى حياتنا ونعلم ان كل الاشياء تعمل للخير مهما لاقينا الكثير من المتاعب نجد الراحة والرب يعطينا القوة ولا ننسى الصلاة من اجل المحتاجين والمرضى لكى يتمجد الرب ويشفيهم .