|
 |
 |
 |
|
رقم المشاركة : ( 1 )
14 - 10 - 2024, 12:35 PM
|
|||||||||||
|
|||||||||||
 اسكتش مسلسل اعمال الرسل الثالثة والرابعة الحلقة الثالثه والرابعه من اسكتش اعمال الرسل الحلقة الثالثة قصة حنانيا وسفيرا اهداف الاسكتش - طريقة مبسطة لمراحل ابتدائى ممكن العرض للاطفال فقرة افتتاحية . - معرفة سفر اعمال الرسل وحكايات حلوه ويتعلموا فضيلة جديدة . - نقول الصدق مهما كانت الظروف ولا نكذب . - لا نخاف مهما قابلنا صعوبات لأن الرب معنا دائما . الحلقة الرابعه امام رؤساء الكهنه بداية الحلقة فى قصة التلاميذ امام رؤساء الكهنه والشيوخ يدخل حنانيا وينادى على سفيرا . حنانيا : يا سفيرا يا سفيرا جهزتى الاكل ولسه لسه جعان . سفيرا : ايوه يا حنانيا تعال يلا بينا ناكل . تدخل سفيرا ومعها طبق وعيش ويأكلوا . سفيرا : ايه رايك يا حنانيا فى اللى بيعملوه الرسل دول ؟ حنانيا: ناس كتير يا سفيرا بتأمن بالمسيح وتبيع فلوسها وارضها عشان غيرهم ياكلوا منها. سفيرا : طيب وانت اي رايك هل نعمل زيهم ؟ حنانيا : انا كنت بفكر فى كدا بس عندى خطة حلوه خالص . سفيرا : ايه يا حنانيا ؟ حنانيا : تعالى نبيع الارض اللى عندنا ونخبى شوية فلوس ونروح لبطرس والرسل ونقولهم احنا اهو بعنا الحاجات اللى عندنا عشانكم وادى فلوسها اى رايك ؟ سفيرا : اممممم فكره حلوه ونحط الفلوس تحت رجلين الرسل ونعمل زى الناس اننا بعنا كل حاجه ومحدش هيعرف اننا اخدنا فلوس منهم . حنانيا : صح انا هروح اجهز الحاجات وبعدين تعالى ورايا عن الرسل ونشوف هيقولوا ايه اهم حاجه ميعرفوش حاجه عن الموضوع ده . يخرج حنانيا وسفيرا . يدخل بطرس وهو جالس على كرسى وجنبه بعض من تلاميذ ويدخل عليه حنانيا . بطرس : تعال يا حنانيا عايز ايه ؟ حنانيا : ايوه يا معلمى بطرس احنا بعنا الارض اللى عندنا وادى فلوسها كلها اهو عشان تعرف اننا ناس كويسه . بطرس: ليه يا حنانيا تعمل كدا ؟ الشيطان يضحك عليك انت مش كذبت عليا انت كذبت على الروح القدس اللى هو روح الله انت فاكر عشان اخدت منهم ربنا مش شايفك ولا ايه مش الحاجات دى بتاعتك و لا ايه انت مش كذبت على الناس انت كدا بتكذب على الله. يقع حنانيا على الارض ويموت . احد التلاميذ : الحق يا بطرس ده مات . بطرس: هو كذب على الله وده يا اصحابى غلط مينفعش نكدب على بعض عشان ربنا شايفنا ولازم نتعلم نقول الصدق مهما حصل عشان الكذب حاجه وحشه خالص خلاص شيلوه وروحوا ادفنوه . يرفع التلاميذ حنانيا ويخرجوا ويدخلوا مره تانى . احد التلاميذ : يا بطرس سفيرا زوجة حنانيا عايزه تدخل تقولك حاجه ؟ بطرس خليها تدخل نشوفها محتاجه ايه . تدخل سفيرا على بطرس وتبدأ بالحديث . سفيرا : سلام يا معلمى بطرس بطرس : سلام يا سفيرا خير فى حاجه ؟ سفيرا : امممممم . بطرس : قوليلى يا سفيرا انتوا بالفلوس دى كلها بعتوا الحقل ؟ سفيرا: ايوه يا سيدي صح انا وزوجى بنفس الفلوس دى . بطرس: ليه يا سفيرا تتفقوا مع بعض انتى وزوجك على ربنا وتضحكوا عليه وتكذبوا على الله ؟ الناس اللى شالت زوجك هتشيلك دلوقتى زيه . سفيرا: ايه حنانيا مات لالالا . تقع سفيرا ثم يقترب منها احد التلاميذ ليرى ما حدث لها . احد التلاميذ : يا سيدى بطرس دى ماتت . بطرس : الله اراد بكدا عشان الناس تعرف ان الكذب حاجه وحشه ولازم الناس تعرف كدا خلاص طلعوها وادفنوها . ويحملوها للخارج ويخرج الجميع . يدخل حنان رئيس الكهنه ومعه بعض الكهنه والجنود حنانيا : هنعمل ايه بقى دلوقت فى تلاميذ يسوع دول ؟ احد الكهنه : لازم يا سيدنا حنان نشوف حل . حنان : ابعت احد الجنود يروح يقبض عليهم كلهم واحبسوهم فى السجن . احد الكهنه : حاضر يا جنود يلا بينا . يخرج الجميع ويدخل الرسل مربوطه ايديهم وجندى يدخلهم السجن . احد الجنود: ادخلوا يلا ادخلوا السجن . يدخل التلاميذ السجن ويصلوا فى سرهم بطرس : يلا نصلى يا اخواتى عشان ربنا يساعدنا . يصلى التلاميذ وفجاه يظهر ليهم ملاك ويشاور على الباب الملاك : يلا يا بطرس انت والتلاميذ اطلعوا من السجن وروحوا كلموا الناس تانى بكلام ربنا متخافوش من اى حاجه يلا اخرجوا . يخرج الملاك . بطرس : يلا يا اخواتى تعالوا نطلع بسرعه بسرعه . ويخرج الجميع . يدخل حنانيا رئيس الكهنه واحد الخدام . حنان: روح هات التلاميذ من السجن . يخرج الخادم ويدخل بسرعه . الخادم: يا سيدى حنان الحق ملقناش حد فى السجن خالص . حنان: ازاى ازاى ؟ الخادم: صح بصينا وملقناش حد وفتحنا الابواب كلها لقينها مقفوله والحراس واقفين وملقناش حد خالص . يدخل احد الخدام بسرعه عليهم . الخادم الثانى : الحق يا سيدى حنان الحق . حنان: ايه فى ايه ؟ الخادم الثانى : تلاميذ يسوع اللى حبستوهم امبارح لقيناهم فى الهيكل بيعلموا الناس نعمل ايه معاهم عشان هما دلوقتى قاعدين فى الهيكل بيوعظوا الناس . حنان : اممم روحوا امسكوهم وهاتوهم بس بالراحه عشان منعملش هيصة عليهم . يخرج الجميع ويدخل حنان ويجلس ومعه بعض الكهنه . حنان رئيس الكهنه: ادخلوا تلاميذ يسوع اما نشوفهم . احد الخدام: حاضر يا سيدى حنان . يدخل التلاميذ ومربوطين بايديهم . حنان : احنا مش قولنا متتكلموش تانى بالكلام ده مينفعش كدا والا هنعمل حاجات كتير فيكم هتسمعوا كلامنا لازم عشان مش نغضب عليكم . بطرس: ينبغى ان يطاع الله اكثر من الناس احنا هنقعد نبشر الناس بالرب يسوع ده اللى قتلتوه وصلبتوه قام من الاموات واحنا بنسمع كلام ربنا وهنقول للناس كلها . حنان يغضب عليهم ويتشاور فى سرهم مع الكهنه . حنان : اممم بقى كدا يا حراس . احد الحراس : امرك يا سيدى حنان . حنان : خد تلاميذ يسوع دول واجلدوهم عشان يحرموا يتكلموا تانى سامع . الحارس: حاضر يلا اخرجوا . يخرج الجميع ويسمع صوت من الداخل جلد . احد الحراس : يلا اخرجوهم بره . ثم يخرج الجميع وبعد ذلك يقفل الستار . نهاية الاسكتش يتعرف المخدومين عن قصة التلاميذ وخطورة الكذب وعلينا ان تعلم ان نقول الصدق مهما كلفنا الامر لان الله لا يحب الكذب . وحيث ان التلاميذ امام رؤساء الكهنه نتعلم ان نشهد للمسيح فى حياتنا من خلال الاحترام وعدم الشتيمة والصلاة وان نحترم الكبير وان نحترم الكنيسة والتى هى بيت الله . قصتنا فى هذا اليوم هى قصة حنانيا وسفيرا ونجد انهم بالرغم ان المال كان فى ايديهم لكن استغلوا الكذب كوسيلة لمطامعهم ولكن وجود الكذب فى حياتنا مهما كانت لدينا اموال او مناصب سوف نخسر الحياة الابدية . بسبب هذا الكذب علينا ان نلاحظ كل كلمة تخرج من افواهنا ولا نستغل الفرصة لنكذب حتى لو كان الكذب سوف ينجينا من مواقف صعبة علينا ان نقول دائما الصدق . وكلمة صدقنى علينا ان تخرج من داخلنا بدون تردد وكل طفل يخرج من الكنيسة بعد هذا الاسكتش والمسرحية ان يجعل فى داخله ان يكون الصدق هو اساس كل شئ وان نهاية الكذب قد تكون نهاية غير موفقة فنحن يجب علينا ان نتعلم الكلام بدون مراوغة ولا مماطلة وبدون الكذب فى كل المواقف حياتنا الروحية اهم من اى شئ . - القصة الاخرى هى قصة وقوف التلاميذ امام رؤساء الكهنة والتى نستفاد منها من خلال الثقة فى الرب والايمان بوجوده معنا فى جميع حياتنا وعدم الشك ولا نخاف مهما كانت ظروف الحياة صعبة الرب يسوع قادر ان ينجى وهنا نجد ان الهنا ارسل الملاك واخرج التلاميذ ليلا واستمروا بالتبشير بالرغم من الإهانات والعذابات قدموا حياتهم ذبيحة حية للرب يسوع بركة الاباء القديسين تكون معنا امين . 
|
 |
|
العرض العادي
