|
 |
 |
 |
|
|
|
رقم المشاركة : ( 1 )
02 - 09 - 2024, 04:02 PM
|
|||||||||||
|
|||||||||||
 كلمت ربنا وعلى قد بساطة طلبتى لكنى كنت بكلم بحماس شديد جداً زمان وانا فى المدرسه كنت فى رابعه إبتدائى ، مشوار المدرسه لغاية البيت حوالى ساعه مشى عشان المدرسه كانت على أول البلد.. المهم اليوم ده قبل ماخرج من البيت كنت حاطط كيس السندوتشات على المكتب وجنبه مصروفى ٥٠ قرش .. صحيت متأخر ومن إستعجالى نسيت السندوتشات والمصروف .. ده غير انى نزلت من غير مافطر بسبب انى كنت متأخر .. عدت الحصه الأولى والتانيه والجوع بدأ يشد عليا ، ماكنتش عارف أعمل ايه ، لغاية ما جات الحصه اللى قبل الفسحه كان علينا حساب ، وكنت جعان جداً ومش مركز خالص ولا قادر اسمع حاجه .. جات الاستاذ وقفنى عشان يسألنى ، وماعرفتش أجاوب .. واخدت عصايتين على إيديى لغاية إنهرده مستحيل أنساهم ، لأنهم سبب معجزه كبيره فى حياتى .. بعد ما أتضربت العصايتين ، قعدت وفضلت أعيط جامد من الألم .. ساعتها افتكرت كلمه قالهالى مدرس كان بيقول فيها.. لما يشد عليك الألم كلم ربنا هو اكتر واحد هايسمعك فى اللحظه دى .. بالفعل فى اللحظه دى كلمت ربنا وعلى قد بساطة طلبتى لكنى كنت بكلم بحماس شديد جداً .. بعدها بالظبط بخمس دقايق .. دخل علينا مدير المدرسه وزع على كل واحد فينا علبه كان فيها سندوتشات ، مش فاكر ايه المناسبه لكن كل اللى فاكره انى لمست إستجابة ربنا لطلبتى بطريقه عجيبه جداً .. عزيزى القارىء لما يشد عليك الألم كلم ربنا هو أكتر واحد سامعك وحاسس بيك، وإستنى إستجابته لأن عطاياه مافيش أحلى منها ، مش هايتأخر عليك ماتقلقش . 
|
 |
|
العرض المتطور