|
 |
 |
 |
|
رقم المشاركة : ( 1 )
31 - 07 - 2023, 09:25 PM
|
|||||||||||
|
|||||||||||
 عارف ليه أغلب الناس لما تشوف حد صاحبهم معاه كاميرا بروفيشنال بتطلب يصورهم بعدسة الكاميرا بالرغم من إن موبايلاتهم معاهم ؟ عدسة الكاميرا فيها خاصية إنها بتبرز نقاط الجمال في الصورة و تركز عليها و توضحها و بتقلل من العيوب فالصورة تطلع حلوة .. تركز علي ملامح الشخص و تبرزها بوضوح و بتضيف كمان ألوان وإضاءة تجمل من الصورة أكتر . العدسة بتشوفهم حلوين و بتطلعهم قصاد الناس حلوين .. فبالتالي الناس يحبوا يتشافوا و يتصوروا بالعدسة دي . في خلال رحلة حياتنا بنقابل نوع نادر من الناس زي عدسة الكاميرا دي .. قادر يظهر الجمال اللي فينا و يوضحه و يبرزه رغم عيوبنا .. يدخل علي شخص كل الناس بتنتقد عيوبه يروح مطلع نقطة جماله و قوته و يظهرها له و يقول للناس عليها . المسيح كان عنده الصفة دي .. كان من قلب القبح يظهر جمال .. كان يدخل مكان كله زناة و عشارين وخطاة يقول الناس دي جواهم قلوب حلوة عطشانة ليا أنا هتعامل معاهم وأغيرهم .. يا يسوع ده فيهم حد كان لسه بيزني إمبارح بالليل وفيهم ناس مدمنين للخطية و الذنوب . . يقول ده بسبب بيئتهم الصعبة لكن جوة في أعماقهم أنا شايف حاجة جميلة هشتغل عليها . شايفين الست الي هناك دي بتحط فلسين حاجة كدة زي ٢ جنيه .. بس دي بالنسبالي أغني من كل الأغنياء أنا الوحيد اللي شايف جواها إيه و هركز علي الجمال ده و هخليها شخصية تاريخية في الانجيل الناس كلها تحكي عنها وعن مثلها عبر التاريخ . ياريت يكون عندنا العدسة دي في عيون بصيرتنا اللي تعرف تطلع الجمال في أي شخص بنقابله و أي مكان بنروحه .. متكونش عدسات عيوننا رديئة زي كاميرات موبايل زمان بتطلع الناس شكلهم مبكسل و هزيل و مش حلو . يارب أخلق في قلبي عدسات تشوف الناس بعينيك ♥️🙏 
|
 |
| أدوات الموضوع | |
| انواع عرض الموضوع | |
|
العرض العادي
