حكايات المشاعر

[Mary Naeem]

حكايات المشاعر


إنهارت لما شافت عربية الإسعاف واقفة وبيطلعوا منها صندوق!

صندوق؟!

آخر مرة تشوفه يكون في صندوق؟!

حاجة كانت لا على البال ولا على الخاطر!

ناس شالت ”الصندوق“ ودخلت بيه بسرعة

الكل لابس أسود وقاعد مستني مراسم الصلاة تبتدي،

هي هنا ومش هنا

طلعت قعدت في أقرب مكان تقدر تشوفه، تشوف صندوقه!

بتفتكر آخر كلام ما بينهم

وازاي كده تخلص حكايتهم؟!

١٠٠ ازاي وازاي؟

ابتدت الصلاة وكانت عايزاهم يطولوا،

مش عشان تصلي، لكن..

عشان تملي عنيها منه قبل ما يندفن!

سرحت وهي مش مستوعبة ازاي بسرعة كده؟

ازاي هو نايم جوه؟!

انتشلها من سرحانها السكوت المفاجئ

طلع خادم على المنبر عشان يقول كلمة،

طول عمرها بتصدق إنه مالوش لزوم خدمات وكتر كلام في الوقت ده بالذات،

مين بس فايق يسمع؟! سيبوني في المصيبة اللي أنا فيها دي!

رجعت تبص تاني على الصندوق

لكن انتشلها تاني من أفكارها صوت الخادم وهو بيقول «نِهَايَةُ أَمْرٍ خَيْرٌ مِنْ بَدَايَتِهِ» (جامعة٧: ٨).

اتعجبت!

قالت في بالها

الآية دي ليها ذكرى معايا

ذكرى أما اتفاجئت بالنهاية اللي طلعت أحسن ١٠٠ مرة من البداية!

بس إيه علاقة ده بالوجع اللي أنا فيه دلوقتي؟!

كمل كلامه الخادم وقال:

كلنا فاكرين إن الموت هو النهاية

لكن الموت هو البداية لحياة مع المسيح من غير حدود

حياة إلى الأبد

رفعت عينيها وكانت الكلمات طوق نجاة

من بحر الوجع والفقد المُخيف.

النهاية مش شر دي بداية الخير

الصديق يُضَم من وجه الشر

اتشددت برسالة ربنا ليها

وسط وحشة الفراق الباردة الكئيبة.

خلصت الصلاة وراحوا مكان ما هيندفن

هناك وقفت تزاحم وسط الناس عشان تخطف اللحظات الأخيرة

زقها واحد وقالها ”رايحة فين؟ مفيش حد هنا، هو فوق“

خرجوا بعدها اللي كانوا شايلين الصندوق

وهتف واحد منهم وعينيه بتلمع بالدموع ”مبرووك السما“

لقت نفسها بتودع الجسد بسهولة لأنها متطمنة إن الروح دلوقتي في السما مع اللي كان بيحبه وبيعيش ليه ومستني لقاه.

رجعت للحياة من تاني تتعلم مرادفاتها من غيره، من أول وجديد

اللي مصبرها إن الفراق ده مش دايم،

هيتقابلوا تاني عن قريب،

الرجاء بعد ما كان كلمة محفوظة أصبح ليه مكان كبير في حياتها،

لأنها راجية فهي صابرة.

والدنيا رحلة،

جه ميعاد سفره وهي كمان ليها ميعاد،

ده الموت حقيقة أكيده مفيهاش شك،

ساعتها الرجا باللقا هيصبح يقين.

الناس من برة رايحة راجعة عليها

اللي عاوز يعمل الواجب

واللي عاوز يعزي بجد لكنه مليان بالعجز، ومش عارف ازاي يساعد!

فيه اللي صلى

واللي قعد معاها وبكى

واللي سمعها من غير ما يقاطعها ويمنع دموعها أو لخبطتها!

وفيه اللي أتكلم ويا ريته ما اتكلم،

لخبطها ووجعها أكتر مما هي موجوعة.

ييجوا الناس أو يمشوا

ويفضل اللي موجود وكائن اللي مبيفارقهاش

كان بيضايق معاها في ضيقتها والوحيد اللي بيعرف ينتشلها منه

زي الأم اللي بتهدي رضيعها عشان يدخل في النوم، هو كالأم ليها

كانت السما هي الحقيقة اللي عارفة تسكب في قلبها التعزية

عارف ومجهز المعونة اللي هتسندها وهي بتعبر وادي دموعها.

من ساعة اللي حصل

وزي ما يكون بقى عندها طفرة في النظر!

ابتدت تشوف العالم بحجمه الطبيعي

”كل العالم باطل... كله قبض الريح“

في فرح آه بس مش دايم!

زي ما الحزن برضة مش دايم!!

في استقرار آه بس مش مضمون

وهي دايقة يعني إيه الدنيا تطربق فوق راسها في يوم وليلة!

في إيمان - مقولناش حاجة - بيشددنا فالبرية،

بس متعب ومرهق،

زي ما قال حد من الخدام الحلوين:

”امتى يا رب نروح السما عشان نبطل إيمان!“

صغر العالم في عنيها

استوعبت قد إيه الجسد هش

وقد إيه الكل إلى زوال!

حتة منها بقت في السما

فبقت عاوزة تعمل كل حاجة هنا بمنظور السما!

كل ده غيَّر مفاهيم،

إيه اللي يستاهل؟

وإيه اللي لأ؟

إيه اللي تبذل فيه مجهود؟

وإيه اللي بهدلة على الفاضي!

إحساسها بقيمة الوقت!

ضغط تأثير كلام الناس عليها،

وغير كده كتير من التفاصيل

اللي بقي ملهاش نِفس تضيع وقت فيها

من كتر ما عنيها متشعلقة لفوق

عالسما!

ومع كل حد يسافر

ويروح للبيت الأبدي

بتفرح بالعزوة اللي بتتجمع فوق

تحس بالغربة وتبتسم فقلبها

وتقول: ”يا بختكم“

ترجع من تاني تتشدد وتعمل اللي عليها

بحماس من غير لزقة بزيادة فالعالم

بتركيز من غير تشتيت في كلام فاضي

من جواها بقت صلاتها:

”الدنيا يا رب عاملة زي البخار، هيظهر شوية ويختفي!

فعلمني أحصى أيامي واديني القلب الحكيم،

أعيش اليومين اللي فاضلينلي بأمانة

لحد ما تجمعنا عندك ونكون دايمًا فرحانين

من غير فراق تاني ولا أنين

آمين“