شــباب حـــبوب

[نونا بنت البابا]

حبايبنا شباب اليومين دول ... ياسلام عليهم حاجه تفرح بيطبقوا وصية الإنجيل حرفيا ، لكن وصية واحدة وياريتهم فاهمنها صح وهى " أحبوا بعضكم بعضاً " .
الشاب من دول قبل مايخش الجامعة وتاقيه " عاوز يحب" تقوله ياابنى أنت لسة صغير . يقولك بكل ثقة " إيه ... بخطط لمستقبلى " .!!
أما البنت من دول مابتصدق حد بس يقولها كلمة إعجاب ... تلاقيها بتبنى فى خيالها أحلام رومانسية وعالم وردى وردى وفارس وحصان أبيض فى أبيض ولما تيجى تكلمها تقولك :" أشمعنى أنا ماكل البنات بتعمل كده " .
حبايبنا شباب اليومين دول بيعانوا من نزيف خطير اسمه نزيف الوقت ونزيف المشاعر ... والنوعين دول ممكن يضيعوا حياة أى إنسان .
وتلاقى الولد أو البنت بيعتبر عواطفه ده شىء رخيص ..." يبعتر يمين وشمال " وينزف ومش عارف أن ده نزيف ويطلع من قصة لقصة ومن صدمة لصدمة وتلاقى حياته النفسية بتتدمر وكمان معاها الجوانب الروحية و الأجتماعية والدراسية فى أغلب الأحيان .

حبايبنا شباب اليومين دول وقتهم رخيص مش غالى ... عمرهم بيضيع مشاعر وقلوب فيها اسهم وحروف ... والوقت الى المفروض تتبنى فيه الشخصية ماتتبناش والمفروض يشبع فيه روحيا مابيشبعش والمفروض يون فيه علاقات سويه ما بيكونش والمفروض ينموا فيه عقليا وينجح دراا مابيحصلش ... وكل ده علشان البيه غرقان فى بحر " الشوق " والهانم بتعد نجوم " الهوى " .

حبايبنا شباب اليومين دول فاكرين يوم عيد الحب ، لكن ناسيين حاجات كتير ...
ناسيين أن كل حاجه بحساب ويوم الرب على الأبواب ... هايسألنى عن نفسى وخلاصا ، هايسألنى عن أسرتى وإزاى خدمتهم وفرحتهم ، هايسألنى عن جسدى وطهارته وسلامته وصحته ، هايسألنى عن دراستى ونجاحى وعملى واخلاصى وابداعى ، وكمان هايسألنى عن صحابى وعلاقاتى وخدمتى .

آه لو شباب اليومين دول يعرفوا أن الحب ده شىء خطير مش ممكن يعيش بدونه الإنسان زى الهواء والمياة ، ولكن الحب ده لما يكون مقدس فى المسيح يسوع بيكون موجه لكل الناس ... حتى الأعداء . الحب أنك تقبل الرأى المختلف وتحب أخوك الإنسان . الحب أنك تعطى من غير ماحد يطلب منك وأن قلبك يوجعك على كل واحد خاطىء أو فى خطر .

آه لو شباب اليومين دول يعرفوا أن مايسموه حباً أحيانا بيكون هروب من الواقع المرير ... أو أنه الميل الغريزى والطبيعى بين الجنسين ، أو أنه حالة فراغ داخلى عاوز يملاها عواطف وبس ، أو أنه إندفاع عنيف للجنس الآخر نتيجة تغيرات المراهقة . أخيراً أحيانا بيكون الحب ده ماهو إلا أن الشخص عاوز يشعر أنه مرغوب ومحبوب فى نظر الناس فيحب شخص ويعبر له عن حبه كى يسمع هو بدوره الفاظ الرغبة والإعجاب .

آه ياشباب اليومين دول لو نوفر عواطفنا للوقت المناسب وعطيها كلها " بخيرها " لشريك حياتنا اللى هانقضى معاه العمر كله ..

آه لو الشباب يفكر بعقله قبل عواطفه ... آه لو أدركنا معنى الحب الحقيقى ... أنه مش بس عواطف ولقمة ناشفة تشبعنا وعش العصفور يدفينا ... الحب اتعلمناه من ربنا لما أحب العالم حتى بذل إبنه الوحيد . أتعلمنا من الصليب معنى الحب .

آه لو شباب اليومين دول يعيدوا توجيه طاقتهم العاطفية فى أمور مفيدة ... كان حاله أتغير وأتغير معاه حال كنيسته ووطنه ومبقاش ده حالنا ...

[Mary Naeem]

شكرا على المشاركة الجميلة
ربنا يباركك

[نونا بنت البابا]

ميرسى على المرور

[Hany Meshel]

مشاركة اكتر من رائعة
يا نونا

[نونا بنت البابا]

ميرسى للمرور الجميل