كيفية صناعة إبن مُدمر و مُنحرف في ١٠ خطوات

[walaa farouk]

إزاي تصنع طفل أو شاب مراهق مُدمر نفسياً و مُدمن مُنحرف :

بقابل شباب صغير بيكون منحرف و عبء علي المجتمع و ده مش بيكون وليد اللحظة لكن بياخد خطوات من البيت لحد ما نشوف النموذج ده فحبيت أجمع ده في خطوات :

1) إستعملوا العنف ، إضربوه ضرب مبرح في الطفولة .

2) او العكس دللوه زيادة عن اللزوم وسيبوه يعمل كل اللي عايزه بدون سؤال او حساب .

3) إتخانقوا مع بعض كزوجين ، إتخانقوا كتير مع بعض و يا سلام لو شتايم و ضرب كمان و تكمل بإنفصال و طلاق .

4) قدمله النموذج السئ كأب ، النموذج المنفلت اللي عايش حياته غلط و مش منضبط مع نفسه ، و مفيش اي حاجة ياخدها قدوة او مثال .

5) قدميله النموذج السئ للأمومة ، اعملي كل اللي عايزاه و خليه هو يلاحظ ان مامته بتعمل و تسوي .

6) بلاش أي متابعة (دراسية ، روحية ، نفسية ، تربوية)
خلوه هو في وادي وانتوا في وادي .

7) كبروا دماغكم من الصرف عليه دراسياً و ترفيهياً أو العكس ادوله فلوس يصرف ببزخ .

8 ) متسألوش عن أصحابه عن حياته عن يومه ، مصاحب مين عايش ازاي يومه في المدرسة و غيره كان إيه .. هنتعبكم ليه ؟

9) شوية مقارنات بقي .. قارنوه بأصحابه و قرايبه الافضل منه في السلوك و الدرجات .. ويبقي كملتم جميلكم .

10) إنزعوا مخافة الله من البيت و كل اللي نفسه في حاجة يعملها .

و بكدة نقول مبرووووك عليكم و علينا صناعة إنسان مِدمر نفسياً و منحرف هيدمر نفسه و يمكن اللي حواليه .. و تقولوا الحقونا الولد مدمن او البنت مشيت و الكل يبذل مجهود 100 ضعف علشان يتعافي نفسياً و من ادمانه و يمكن بلا نتيجة .



✍️