رسالة إلى صديقي الله

[walaa farouk]

يارب مش هخبي عليك و لا علي الناس الصراع اللي جوايا .
. أنا الوقت ده بصارع بشدة مع فكرة ( ليه حياتي مكانتش تمشي سهلة زي ناس كتير حواليا ) أنا مش بنكر إن كل حد عنده ألم معين في الحياة و مش ده قصدي لكن أقصد ان ناس كتير أمور حياتها مشيت سهلة و بسيطة و عادية زي ( الطفولة ، الدراسة ، الصداقة ، التخرج ، الشغل ، الارتباط ، الجواز ، السفر ...) الحياة مشيت بسلاسة و ببساطة
.. و مش بنكر يارب ان الألم له فوايد عظيمة أقدر أكتب عنها كتب
.. أنا مدرك جدا ان الطريق السهل مش بيصنع قائد ماهر ، لكن الطريق الصعب بيصنع قائد حكيم و ذكي و مختبر و صبور و خدوم .

مش بنكر ان رحلتي الصعبة دي طلعت مني إبداعات كتير مكانتش هتخرج غير من آلامات صعبة .. معظم نجاحاتي اللي حققتها خرجت من بطن المخاض و الألم .. أمور كتير أدركتها في الحياة الروحية و العملية كانت بفضل الصدمات الصعبة .

لكن أنا صراعي ده لإني لسه موجوع .
. بتحرك و بنطلق و بنجح بس جوايا في الأعماق إرهاق
، وجع ، كسرة ، إحباط ، حيرة من بواقي الماضي
.. بحس بيهم وقت التعب في نص الطريق
.. و زهقت من تجاهل الألم ده و التظاهر دايما بالقوة و النجاح علشان مفيش حد اكون أنا مصدر تشجيع يحبط لكن جاي بحط أوجاعي علي أوجاعهم .

تعبت من وجعي اللي مخليني مش قادر أفجر طاقة الحب اللي جوايا و أتحرك تجاه الناس اللي بحبهم من قلبي بجد لان وجعي في كل الظروف ااغامضة عامل إعاقة مش قادر أعبر لهم عن حبي زي الأول .. تعبت من وجعي اللي مخليني أوقات بدي أعذار لنفسي أمشي خطوات لا ترضيك علشان بكون حاسس بالشفقة علي نفسي و إني معذور .. تعبت من عدم وجود إجابات مخلياني أوقات مش بقدر أقوم من النوم بسهولة أواجه الحياة .

أنا بكتب الوجع ده لإنك صديقي و حبيبي ..
و لإني بحس براحة أكتر لما بكتب و بعبر ، حتي لو بعض اللي مش بيحبوني شمتوا في و فسروا وجعي ده بتفسيراتهم الشخصية .
. لكن أنا مرتاح جدا و أنا بعمل ده معاك و في حضورك و علي الملأ ..
يمكن حد يشوف أوجاعه بين السطور فيكون سبب انه يكلمك أو دموعه تنزل عند قدميك و تكون صرخة او حد يتحد معايا بالصلاة و يئن معايا ..

منتظرك كالعادة تحول الوجع لبركات متشافة و غير متشافة .. منتظرك حتي لو مدتش فهم و إجابات يكون حضورك القوي في حياتي مغطي علي كل أصوات حيرة و يأس .

سامحني إني مكتبتش عن إحساناتك المرة دي
و كتبت عن وجعي في رحلتك

بس اللي أنا متأكد منه جدا ..
بالرغم إني موجوع ..

لكن بحبك .