ولادنا بيتولدوا زي الورقة البيضا

[walaa farouk]

لية بنفترض لما بنقول للطفل الصغير " لأ " من اول مرة ف هو فاهمنا 🤔🤔🤔

او نقوله اوعي تمد ايدك مع هاااااا بصوت عالي و تبريقة ، و نعتقد انه فاهم ال ٣ الكلمات دول
( وارد يبقي عارف ايدك لو بتكلميه عن جسمه من و هو صغير )
بس تفتكري فاهم يعني اية " اوعي " و يعني اية " تمد " ؟! 🤷‍♀️🤷‍♀️

طب لما بنقول للطفل حتسمع الكلام ولااااااا مع نفس التبريقة اياها 🤨🤨 !!
( ولا اية بقي ولا هو فهم اية كدا ! متعرفوش 😁 )

♡ للاسف امهات كتبر بتبعتلي تشتكي لي من اولادها و انهم مش بيسمعوا الكلام و بيصمموا يعملوا الغلط 🤔🤔

♡ و لما بتكلم معاهم شوية بلاقيهم ان الاطفال صغيرين اوي من سنة لسنتين 🙈🙈 و كمان بيستخدموا مفرادات كبيرة اوي عليهم ، او مدوش لنفسهم الفرصة انهم يعلموها لاطفالهم لسة ..

♡ ف لازم قبل ما اطلب من طفلي طلب او اوجهه و اتهمه انه مش بيسمع كلامي و ابدأ ازعق و اتنرفز و اعلي صوتي عليه 🙄🙄 و للاسف فيها امهات بيضربوا 😔😔

لازم نفكر ف 👌٣ نقاط مهمين جدااااااا

🔴 افكر كدا مع نفسي هو اصلا طفلي فاهم كل كلمة بقولها ؟!

🟡 طب هو محتاج مني اوريه او ادربه يعمل اية الاول ؟!

🔵 طب امثل الفعل دا قدامه عشان يقلدني مع الشرح بالكلام عشان يربط الاتنين ببعض ؟!

🔄 الاطفال بتتعلم بالتكرار 🔄

عارفين كدا واحد يتغرب في بلد ميفهمش ولا كلمة في لغتهم و اول كام شهر بيبقي تايهه و مشتت و مش فاهم اي حاجة ، و بعد كدا واحدة واحدة يستوعب ان صباح الخير يعني كذا ، و بكام يعني كذا و مساء الخير يعني كذا و مع سلامة يعني كذا 😁

بيتعلم بالتكرار و السماع ، مش بالورقة و القلم و التلقين

نفس الفكرة بالظبط مع الطفل بيبدأ يستوعب الكلام من ٦ شهور و يخزنه و يربط الكلمة بتصرف مامته او الي حواليه مع " التكرار " .

📚📚و عشان كدا بينصح اننا نقرا لاطفالنا من اول ما يقدروا يقعدوا كويس و دايما نتكلم معاهم في كل حاجة بتحصل او موجودة حواليهم .

و زي ما بنعرفهم الاسماء زي كورة 🏀 و كوباية 🥃 و لعبه 🎠 ، نعرفهم كمان الافعال ، بتشرب ، بتاكل ، بتزحف ، بتمشي ، بتلعب ، بتبني و تركب و هكذا .

اولادنا بيتولدوا زي الورقة البيضا و احنا الي بنكتب فيها كل حاجة و بيتعلموا مننا كل حاجة في الدنيا ، احنا مش بس امهاتهم و ابائهم احنا اول معلمين ليهم ، و اول صحاب ، و اول جمهور ليهم و اول مدربين ليهم في شتي مجلات الحياة ❣